فوق هام السحب ( الشعر الشعبي) على متن القوافي

يا ويــل قلبي منـــك لاحــل طاريك
نفسي وهــي نفسي تشــك بـغلاها

أنسى اسامي الناس واغلط واناديك
قلبي معــك كـل الاسامـــي نساها

ياساكـن اعماقــي انا ميتن فيك
ومشاعــري بالقلــب حبك خذاها

وقلبي مولـع بك وهايـــم بطاريك
وروحي تحبـك حــب لاخـر مداها

......

‏أحبك وأشوف إن العمر في مداك يدور
‏حنيني على لقياك ما يسعفه صبري

‏عسى الليلة اللي تفرش أحلامنا بالدور
‏سماها يتوه الفجر عنها ولا تسري

......

يازين الخيال اللي بلا موعد ومرسول
‏لا صور لي اللي ما تصّوره كيمرتي

‏تمرين مثل الحلم فالذاكره و اقول
‏عسى الله يخلي لي خيالي وذاكرتي

......

‏ليت قلبي حديد وليت نفسي جريّه
‏في مواجه مقادير الزمن الازدواجي

‏صار حتى القصيد اللي طروقه عذيّه
‏أكبر أسباب ضيقة خاطري وانزعاجي

‏ودي أغيب و أبعد في الفجوج الخليّه
‏وانقطع مع طريق الانقطاع المفاجىء

......

إتركيني بين الأحلام أنا أحب الخيال
الخيال أحلا من الواقع الواقع مرير

جيت أقاتل و إنقتلت أوّل أيام القتال
دايم أوّل ثوره تثور فالراس الكبير

......

‏عـرفنا صـروف الـدهــر هبة بهبة
وعشـنا وشـفنا في زمنـا تجـاريب

الاعمــار تفــنى والليـالــي مغبــة
ومن لا يخاف الله ما يعرف العيب

ومن لا قضاهـا بالرضـا عنــد ربـه
ما ينفعـه مدح العرب والاجـانيب


......

لا لمحت الكبر في منطق رفاقي
قلت يا نفسي ولا نصبر دقيقه

الكرامه دونها لو ما نلاقي
من نصاحب كل واحد في طريقه

من تغير واختلف ماعاد باقي
في وجوده اي داعي فالحقيقه

من يريد البعد ويدور فراقي
لا يدور عن سبب ولا طريقه

يبتعد ما دام ما ناسب مذاقي
لا يجيني في تصرف ما اطيقه


......

‏وش رأيكم في شخص بارد مشاعر
‏يحمل جنون العشق وأسلوبه الصمت

‏صحيح هـو طيب ويراعي الخواطر
‏لكنني مـن صمـت بوحـه تألمت

......

‏خلك بحر غامض وباعماقك أسرار
وفي ظاهرك للناس عزه وهيبه

لاتشتكي جرح الليالي والاقدار
يدوس جرحك من تحسبه طبيبه

......

مالله خلقني للمخاليق تباع
ولا اشرب الشربة وغيري سكبهاا

إما خذينا مطلب الروح بذراع
وإلا تعف أرواحنا عن طلبها

......