ديوان قصائد لشعراء المملكة العربية السعودية (متجدد)☘️☘️

بدر بن عبد المحسن » الروح الجريحه

يا عذولي .. وش تفيد به النصيحه
لا تعذل القلب .. وجروحه طريّه
من يداوي علة الروح الجريحه
ومن يسلي دمعة العين الشقيه
ان شكيت من الهوى .. قالوا فضيحه
وان سكت استنقضوا جرحي عليه
وان نويت البعد .. ضاقت بي الفسيحه
وان بغيت القرب .. خان القرب فيه
من عذلني في الهوى الله يبيحه
ومن عذرني .. ما حصل مني خطيه

بدر بن عبد المحسن » سافري


سافري كان يرضيك السفر
جربي لو ورى ليلي صباح
بدلي الرمل بأمواج البحر
واتبعي الغيم تحملك الرياح
سافري لين تبكين المطر
واضحكي لين ما يضيق البراح
ولا تعبتي وحسيتي بضجر
خلي الشوق لديارك جناح
أرجعي في ابتساماتك عذر
مثل ما الدمع في عيني سماح
انتي العين من طول النظر
وانتي القلب من كثر الجراح

بدر بن عبد المحسن » دروبي رمل


في دروبي رمل لامن جيت ساري
ينبت الأشواك لامن رحت ساري
صاحبي ماجيتك إلا وفي طريقي
من ربيع العام نوّار وخباري
ولا تواعدنا وبه في الأرض زهره
ولا تفارقنا وبه للبرق طاري
لا تأخر دام لي في العمر ساعه
ولا تقدم لين أشوفك في انتظاري
الزمن ورده .. سهرت أحسب ورقها
وإن قضا ماجيت في دموعي عواري
حبّني كثر اللذي نلقى بوعدنا
من ظلال وريح ونجوم وغداري
صاحبي مثل الخجل لو تكتسي بي
قبل أصير الشال يذهلني انحساري
ياقريب البعد .. للشكوى أسامي
الجفا .. والخوف .. وآخرها حذاري
وانت لو خان الزمن بقول وافي
لا أنا تركي .. ولا أظنك مشاري

بدر بن عبد المحسن » دروب الأرض

دروب الارض ..
توصلنا الاماكن وترجع !!
ويكفي هالسفر عذروب
بأن الارض ما تقوى الهروب ..
دروب وغير الارض
وين بتروح تسافر..
كان الصوت يرجع للحناجر ..
كان الجرح يرجع للخناجر
مثل كل الطيور اللي تهاجر
وترجع كل مرة
تعب هالبحر لا يجتاز
جدران السواحل
انا لي سنين راحل
حملت الطين
كله .. لكل الطين
قلي يا انا
الى متى وانت
على هذا الأنا مصلوب
دروب الأرض .. لكن
لكن

بدر بن عبد المحسن » سيف الغضب

أفداك أنا كلي ..
عودي غصن يابس ..
لا تحرقيني اليوم ..
حر .. وسموم .. وصيف ..
إنتي إجلسي فـ ظلي .. ولا جا الشتاء يمدي
لا تجرديني اليوم .. خليني في غمدي ..
سيف الغضب ماضي خلي الكلام يموت ..
ووقت الغضب ماضي .. لا ترجعيه .. بصوت ..
وش كثر أنا راضي حبيبتي عندي ..
قولي لي يا بعدي .. يومين ماشفتك ..
يومين مالي عيون ..
محروقه أجفاني بشموع إحساسي
كانت دموعي فوق وجهي وانفاسي ..
وظلي على كتفك .. وراسي على زندي ..
أفداك أنا والله لاتسمعي رعدي
ولا يزعجك برقي ..
انا لو شكيت أحلم ..
ما به زمن نندم .. ومابه عمر للخوف ..
إنتي احفظيني فم .. ولا تحفظيني حروف ..
ولو غرقت فـ يم ..
لا تعشقي بعدي ..

بدر بن عبد المحسن » راعي الهوى مسكين

شعر موج .. وقمر خد ..
دفا روح .. وطغى قد ..
وراعي الهوى مسكين ..
زهى الكحل .. في الحاجر الفتان
وسرى الليل .. تو الفجر ما بان
وراعي الهوى مسكين
كما الشمس .. يجهر سنا نوره
ما اقدر أناظر .. والعين مكسوره
وراعي الهوى مسكين ..
ثغر ورد .. ورده شكت ورده
من دونها الشوق .. والرمح والقرده
وراعي الهوى مسكين ..

بدر بن عبد المحسن » شكرا سحايب


شكرا سحايب على لطفك
انتي مطر والصحاري الناس
قلبك شكا من كثر عطفك
لا باس هذا التعب لاباس
أغليك وان كنت ما عرفك
اخوين يجمعهم الاحساس
رسمك لحن رائع وعزتك
على القلم نوَّرالقرطاس

بدر بن عبد المحسن » زل الطرب


تلعب وانا .. ما عاد لي بالطرب شف
لعبك بروحي بدل الفرح بجراح
زل الطرب يا موجع الطار بالكف
شابت قوافي الليل .. نور الضحى لاح
كانك تدق القلب .. دقك على الدف
عسى الضلوع توقي القلب لا طاح
شفتك .. ولا ادري من قضب بعدك الصف
ناس ٍ كثير .. وكنهم عندي أشباح
نورك دعاني عندك الشوف وقف
كنه فنارٍٍٍ لاح في عين ملاح
من له ثمان اسنين من راح منكف
خلّى السفين وعارض الموج سباح
من فرحته ما حسب االحيل يتلف
غلب عليه الموج والقاع منزاح

بدر بن عبد المحسن » ردي سلامي

حبيبتي...
ردي سلامي للهوى .. عذب السلام ..
وأغلى الأماني وللأمل .. كلمة ملام ..
قولي له إني ما هقيت ...
إني الى نحت وشكيت ..
ترجع ليالينا سوى شوق وغرام ...
سنين .. مرت وما أدري عن الأيام ..
يقولوا تفرق الأحباب ..
وانا أقول القمر ما غاب ..
من أول يوم تواعدنا ..
أثاري الوقت يخدعنا ..
ويبعد عننا الأحلام ..
قولي له إني ما هقيت ...
إني الى نحت وشكيت ..
ترجع ليالينا سوى شوق وغرام ...
حبيبتي يا نظر عيني ..
أشوف الليل ما بيني .. وبينك .. وكل الناس ..
أحس فـ نظرتك معنى ..
ودربٍ كان يجمعنا على الإحساس ..
قولي له إني ما هقيت ...
إني الى نحت وشكيت ..
ترجع ليالينا سوى شوق وغرام ...

بدر بن عبد المحسن » سوالف عرب على جال ضوهم

عبر العصور .. السالفه ..
كانوا العرب .. يشرون
المهر .. بمية ناقة
كانوا الرجال .. مثل الرماح ..
قاماتهم مشدودةٍ .. ودقاقة
وكانوا الحريم .. صبرٍ قديم
وفا .. وسماح ..
والى .. اقطعوا عن الفطيم .. الحليب
قصوا عسيب .. من انخله
واعطوه له وقالوا فرس
اعطوا الصغير .. سيفٍ خشب
ومجدٍ يحبه .. يوالفه
السالفه .. رغم الفقر
والجهل .. واوقات المرض
ماكان للبسمة غرض
ولا كان للدمعه .. غرض
ماكان في الدنيا .. سوى
ثوب ورغيف .. وعرض نظيف
وكرامةٍ ماهي تمس ..
السالفه .. اني أحس
انا عكسنا السالفه
صحيح قهرنا الفقر
والجهل .. وايام المرض
لكن غدى لكل شي .. غرض
السالفه .. ان القديم
كله غدينا .. انخالفه
ابدون وعى .. والابوعى
ماانتم معي .. انها قديمه السالفه