فوق هام السحب ( الشعر الشعبي) على متن القوافي

‏وأنت الذي زينت يا غاية الزّين
‏ حياتي اللي نورها من حياتك

‏أحب فيك الحب يا جامع اثنين
‏الزين وطبوعٍ تكمل حلاتك

‏وأحب فيك العطف واللطف واللين
‏وأحب فيك رضاك عقب زعلاتك

......

ماني بناسخ ولاصق كل ما جاني
‏ذوقي فريد ولا كل شي يعجبني

‏اما كلامن يحرك كل وجداني
‏والا سكوتي بصمت الذوق يكتبني

ذائقة

ماني ضعيف إيمان لكني انسان
تجرحني الكلمة ويقتلني الظن

قصة مشاعر خلفها الف خذلان
عاشت وكبرت مثل مايكبر السن

انا ضحية صمت في ظلم الأزمان
صابر واقول الجاي يارب احسن

ياكثر شرهاتي علئ ماضي كان
وياكبر هقواتي علئ احلام ماجن

......

اعمارنا تجري مع خط الاقلام
‏تطوي بها الأيام طي الوثايق

‏فيها الفرح مره ومرات أوهام
‏وهذا هو الواقع بجد وحقايق

......

ماكلّ غـايـــب عـن عـيــونـي فقدته
‏و ماكل شخص القاه يستاهل اغليه

‏مـن بـعْـــد ما قلبي شقيتــه وعدته
‏ما يسكنه غـيــــر الّـذي يعتني فيه

......

‏بكره تشع إن قالها الله أمانيك
‏مهما غفت في ليل الأقدار شمسك

‏لا يشغلك عن فرحة الجاي ماضيك
‏ولا يسرقك من واقعك صوت هجسك

‏ولا تيأس إن يبست منابت مساعيك
‏بكره يسيل الغيم ويطول غرسك

‏رضاك عنك عن رضاهم يكفيك
‏ويغنيك عن حب البشر حب نفسك

......

غرك اني في فضاء دنياك هايم
‏في سواك من البشر ما انا اتفكر

‏وغرك اني ما اتسمع فيك لايم
‏من مجاميع المؤنث والمذكر

‏تحسب ان قلبي ملكته ملك دايم
‏يوم شفته لا يخون ولا تنكر

‏انتبه من سجة القلب المهايم
‏لا نسى ينسى ولا عاد يتذكر

ذائقة

‏لاتحسب انك تخدع الناس بالهرج
الناس تعرف كل صادق وكذّاب

الكذب يلقى صاحبه موقفٍ حرج
والصدق نور ومن مشى فيه ماخاب

ولاخير باللي يتبع العوج والعرج
من عاش بالحيلات يخسر ولا طاب

......

ياصدري اللي على الكتمان متعوّد
ياكبر قدرك مادام الناس ما تدري

خلك على واقعك بـ الصبر متجوّد
لين الله يبدل الأحوال ياصدري

......

القلب صافي والنوايا سليمه
امزح مع هذا وادردش مع ذاك

عندي احترام الناس اكبر غنيمه
دربي سليم ماتنزرع فيه الاشواك

بقلمي