ديوان قصائد لشعراء المملكة العربية السعودية (متجدد)☘️☘️

بدر بن عبد المحسن » كل ما دعاني الشوق

كل ما دعاني الشوق للقلب الأول
القى مكان القلب في الصدر تنهيد
وطيوف ذكرى في الحنايا تجول
تجمع صور وأوراق من باقي العيد
مدري سبقني الوقت والا تحول
أخلف ربيعي وادهرن المواعيد
أو هو الصبا .. نجمٍ رقى ثم حول
غاب وسما وجهي مشيب وتجاعيد
أحبابنا ليت الذي راح طول
وليت الذي باقي لما فات تجديد
انتم مثل قلبٍ عرفته امنول
وأصبح مكان القلب في الصدر تنهيد

بدر بن عبد المحسن » لاوالذي سواك


لا والذي سواك ما اريد سلواك
ما أخبر به نفسٍ تمنت قدرها
وكان التفرق يا ادعج العين عناك
أنا الذي روحي عذابه صهرها
والله لو ما اعي .. نفسي برجواك
واجزم وَكاد إنه يهمك خبرها
لأطفي شعاع العمر .. لا غيّب ضياك
عميت عيونٍ ما يطولك نظرها
أغلي حياتي .. من ثواني بها ألقاك
لولاك ما تسوى حياتي كدرها
ودنيا خلت من صافي الود وياك
يا عل تكسف شمسها مع قمر

بدر بن عبد المحسن » لا تناظرين بعيد


تعبت اناظر فوق ..
واتعلق بشوفي ..
تحتي الثرى مشقوق ..
وهمك على كتوفي ..
ولاتناظرين بعيد ..
وبلادي في عيونك
توي قطعت البيد ..
لرضاك .. وبدونك ..
ماعاد فيني اعروق ..
ودمي على سيوفي ..
لاتمطريني ورد ..
مشقوقه كفوفي ..
مثل الثرى .. والقلب ..
قمح ونخل محروق ..
وجدراني حروفي ..
تعبت اناظر فوق ..
تحتي الثرى مشقوق ..
قمح ونخل محروق ..
ماعاد فيني عروق ..
ماتنزلي لخوفي ..؟

بدر بن عبد المحسن » لحظة وداع

عيني عن النوم جزاعه
وكثر الهواجيس قزّني
وأشبح متى عقرب الساعة
يطوي ظلام الكدر عني
قلبي زوال الرجا راعه
ما ارتاح يوم ابعدوا مني
وقفت انا لحظة وداعه
أبكي .. وأنا ضاحك سني
مسكين من صاحبه باعه
وعيّن لياليه يشرني

بدر بن عبد المحسن » ليلكم شمس

ليلكم شمس .. اتصلنا ..
اتصلنا امس ..
ما لقينا صوتكم ..
اشتكينا اسكوتكم ..
لسكوتكم
ولمَّا ملينا الكلام .. كانت الساعه ظلام ..
قلنا .. بنحاول ننام ..
ونتصل باكر
ليلكم شمس ..اتصلنا
اتصلنا اليوم
جاوبتنا داركم
اشتكينا اعذاركم ..
لا عذاركم ..
ولمَّا ملينا العتب .. كانت الساعه تعب
قلنا لو ننسى الغضب ..
ونتصل باكر ..
ان لقيناكم عسى .. وان هجرتونا عسى ..
بنغسل اجروح المسا..
بالمسا..
حنا ملينا الصبر .. كانت الساعه عمر
اقبلو منا العذر ..
لكل شي آخر
لكل شي آخر

بدر بن عبد المحسن » ليلة القمر الشحيح

يوم أصيح .. كنت أهزك ..
يا نخيل الوادي ..
غصب اهزك .. مثل ريح ..
والوي أعناق الجريد ..
للقصيد .. ولبحّة الشادي ..
كانت أسراب الحمام .. تنشر فـ صوتي جناح ..
ولا بدى وجه الظلام .. تضوي فـ صمتي هديل ..
كنت أهزك .. يا نخيل ..
يا نخيل الوادي
وليلة القمر الشحيح ..
ما طاح في الساقي ..
طير على حبري رذاذ
وابتلت أوراقي ..
كانت حروف القصيده
حب .. في نخله وحيده ..
وما درت بي ..
أصيح .. أصيح ..
وانا صدري .. روض شوك ..
وخاطري طيرٍ جريح ...
وما دريتي بي ..
أقضبي لجام مهرة الشعر ..
با ترجل .. قبل اطيح .

بدر بن عبد المحسن » ليتي معك دايم

ليتي معك دايم .. روحي فـ هواك هايم
واخفيك مع روحي .. آمالي وجروحي
وانت السهر والليل .. وانت القمر وسهيل
وانت سبب نوحي ..
ومالي فـ هواك لايم .. ليتي معك دايم
ليتي معك خطوة .. تمشي لهواك دروب
ونسمة هوى حلوه .. تحيّي الأمل فـ قلوب
ليتي معك وارتاح .. وانسى الضنى اللي راح
واخفيك مع روحي .. آمالي وجروحي
وانت السهر والليل .. وانت القمر وسهيل
وانت سبب نوحي ..
آه .. من الهوى والليل .. فـ عيونك السودا
غربه ومالي دليل .. والخطوه معدودة
والله الزمان غلاب .. والبسمه محسوده
ونور الأمل كذاب .. والراحه مفقوده
واخفيك مع روحي .. آمالي وجروحي
وانت السهر والليل .. وانت القمر وسهيل
وانت سبب نوحي ..

» بدر بن عبد المحسن » لا

لا .. لا ..
هالكلمة المرة ..
لا .. لا ..
إسمعها مره ..
جرب هالقلب القاسي ..
حبك عذب إحساسي ..
وتسأل باشوفك بكره ..
لا ما هو هالمره ..
ارجع .. واترك لي ليلي..
تجرح قلبي .. وتشكي لي ..
نادم هذا منديلي .. وابكي .. بالمره
وتسأل باشوفك بكره ..
لا .. ما هو هالمره ..
كيف بدا القمر الباكي ..
عمري .. وردي واشواكي ..
حبك .. أرضي وافلاكي ..
وليتك تفهمني مره ..

بدر بن عبد المحسن » الليالي

سب لي الليالي .. وامشي بعيد
سبني في حالي .. اسهر وحيد
ابعد هناك .. انت وهناك ..
حتى السعاده .. خذها معاك ..
وسبني في حالي .. سب لي الليالي ..
سبني فـ حياتي ..
اطوي حياتك ..
خليني افرق .. ذاتي وذاتك
امشي طريقي .. واطفي حريقي
والحق في عمري .. اللي فاتك
ابعد هناك .. انت وهناك ..
حتى السعاده .. خذها معاك ..
وسبني في حالي .. سب لي الليالي ..
صبري عليك .. ظلمك ليَّ ..
نسى حنان الدنيا علي َّ..
نسى ظنوني .. قسى عيوني ..
خلاها تضحك .. للأسيه ..
ندمي عليك .. ندمي عليه ..
ندمي .. وانا حبي الضحيه
طفى شموعي .. خلّف دموعي
وشمعة حياتي .. ما هي شويَّ
ابعد هناك .. انت وهناك ..
حتى السعاده خذها معاك ..
وسبني في حالي .. سب لي الليالي ..

بدر بن عبد المحسن » اللوعة


ياللي نسيت الزمن وقلوبنا تعده
كم ليلةٍ غبت والهاجوس يلعب بي
لا انت مع القلب يالغالي ولا ضده
كله سوى راحتي والا تعب قلبي
يسيل قلبي على الخدين .. وارده
خبرت قلبٍ من اللوعات ينحبي
وان قلت لا بد يبرد زادت الشده
شقيت انا منك والشكوى على ربي
يا من يغيب القمر لا من ظهر خده
الزين زينك وانا كثر الوله ذنبي
من عانق السيف لازم يجرحه خده
ومن يعشق الجمر فيه النار تشتبي