فوق هام السحب ( الشعر الشعبي) على متن القوافي

يالله ياللي بأمرك الرزق مقسوم
‏منك العفو ومنك الرجا والثباتي

‏إنك تشيل الهم عن كل مهموم
‏وإنك تزين ما بقى من حياتي

....

مديت لك يمنى تحب المواجيب
‏وخليتك اللي في زماني مبدا

‏واعطيتني درسٍ حفظته ترا غيب
‏درسٍ لا مر الذاكره ماتعدى

‏اثر الردي مهما تسوي له الطيب
‏يرجع لساسه بالردى ويتردى

....

الساكت الممتلي بـ الياس
‏يبكي على الغدّ من أمسه

‏دايم قليل الخطا فـ الناس
‏أكثر خطاياه في نفسه

أيمن الرويلي

خبروه إني على وصله حييت
و إن تفارقنا ترى موتي دنا

لي حبيب يوم روّح ما سليت
يعلم الله تو ما ذقت العنا

عبرتي هليتها حزن وبكيت
يا ردى عمر الحسوفه ما جنا

ذقت من دنيا حبيبي وما إرتويت
جنة الدنيا حبيبي والمنا

عشت بأحلام الهوى ليـل وبنيت
كل أمالي تداركها الفنا

في حياتي ما ذكــرت إني شكيت
في هوانا ضحكت الدنيا لنا

لا حياة ً عقب محبوبي رأيت
والممات أرحم ولا فرقا السنا

هو سنا شمسي وغيره ماهقيت
يفرح بوصلي ولو موته دنا

....

يالقهوجي شايك ولو جونا حر
‏كيفٍ يعدل راس منهو يعاني

‏عجل لي وعند الله النفع والضر
‏ومافيه حميه كان مالله حماني

‏جب لي من الحالى ولاتجيب لى مر
‏في المر ماقصر لك الله زماني

....

كل ما وطيت راسك توطوك الرجال
‏الرجال اللي عليهم تنص اللايحه

‏ياكريم الوجه ترزقني الرزق الحلال
‏لاتطيح حظي مع الحظوظ الطايحه

‏القناعة والكرامة غناة وراس مال
‏من ملكها مانشد وين بقعا رايحه

....

المــرجلة ماهـــي بعلـم وشهـادة
والعلم يابن الناس له فضل معلوم

المرجلــة لو صـــرت راعـــي ارادة
والله عطـــاك ايمان واخلاق وعزوم

والصـــدق والهمــة مـلاك القيـادة
ان ما وصلت اليـــوم توصل بها يوم

للنـــاس في كل المجــالات عـــادة
واحــد جزاه الطيب واخــر له القوم

واحــد يهــدم في المـواقف عنــاده
وواحد عنـاده يجعل القــاعد يقــوم

دنيـــاك يابــن ادم عــزوم وركـــادة
ولا تقضيهــا ســواليـــف وهمـــوم

....

‏كم لي وانا ادوّر على قارب نجاه
تقول في صدري من الضيقه حجر

ولا لقيت الراحة ألا فـ الصلاه
والركعتين اللي قبل فرض الفجر

....

والهوى معروف شيٍ لا إرادي
‏والنتيجه مؤسفه ما احدٍ حمدها

‏يتسرب مع حلاه من المبادي
‏سم حيّه والفراق أَمَر وادهى

‏لو صبر راع الهوى صبر المهادي
‏الجروح تبين لو انه جحدها

....

‏لا تنشدوني عن علومي والعلوم
‏ماهيب تفرح لا رفيّق ولا عدو
‏
‏من كثر مايقلط على صدري هموم
‏راسي ثلاث ايام ما ذاق الهدوّ
‏
‏في داخله من زحمة الافكار كوم
‏متشابكه تشابك خيوط السدو
‏
‏يا حظ تكفى قم وقومني واقوم
‏صبري نفذ واحلامي قريّب بدو

....