فوق هام السحب ( الشعر الشعبي) على متن القوافي

‏يـالله يـا جالي صدى حـزن يعـقـوب
عـقـب التـوجـد والـرجـاء والتماني

جاه القميص وشم بـه ريح محبـوب
وعـاد البصـر من يوم جته التهاني

يـا فـارج الشـدات عن عبـدك أيـوب
أطـلب نـجـوحي كـان صار أمتحاني

في ساعـة يلفح على الوجه لاهـوب
يـوم الحشر به واهج الشمس داني

....

يالله فرّج ضيق صدري إذا ضاق
واجعل مطاريق الحزن لاتجيني

والخير دايم في دروبي والارزاق
يااارب واغفر زلتي واقض ديني

....

والله ماأنسى صاحب مانساني
لو طالت الغيبه وضاعت نواحيه

يبقى معي مابين قلبي وعيني
والنفس من بد المخاليق تغليه
وأنشد عن أحواله بعاصف سنيني
وأرتاح لازانت وطابت لياليه

....

اللي تبينه على خشمي وجعله فداك
والطعنة اللي تجيني من يدك جايزة

إن كان هذا تغلي مايغرك غلاك
وإن كان هذا تحدي فـ أنتي الفايزة

....

البنت هذي هناي وجنتي فـ الغرام
لو حولي الحور قلبي ما يبي غيرها

مياسةٍ في جسدها لـ الحلي أنسجام
من كعبها لي قلايدها لـ أساويرها

الفتح ماهو جلوسي في رصافة هشام
الفتح هو فتح أصابعها لـ ازاريرها

....

سوْ ما ودّك حبيبي لا يهمّك
من يشوفك حلم ما ودّه يفيقك

ما حسدت إلاّ عيون أبيك وأمّك
والتراب اللي وطيته في طريقك

ألثمك من واهج اللهفة وأشمّك
أنت ما أحلى من شهدْكْ إلاّ رحيقك

الدفى ما يجهله صدر يضمّك
و الظماء ما يعرفه من ذاق ريقك

....

يا الله يامن رحمتك مثل وصفك
يامستجيب لكل داعــي دعاويه

حقق لنا كل الامانـــي بعطفك
وجودك اللي مالجودك يجاريه

يارب كل انسان طامـع بلطفك
وكل من له حلم نفسه تساويه

يامن امانـي كل واحـــد بكفك
يارب حقق مـن دعا لك امانيه

....

‏نعتذر بـالصمت من كبر الجروح
‏ونبتسم للحزن لو متنا ألم

‏وش يفيد البوح لو نبغى نبوح
‏دام بعض البوح يوصل للندم

....

‏دروس الأيام خذنا قسمنا منها
‏وأسرار الأيام ما نعرف خوافيها

‏اللّي حفر حفرةٍ لاخيه يدفنها
‏يمكن يدور الزمان و يندفن فيها

....

‏‌

رزه طويلة عنق وعيونها وساع
متسيده بالزين سيد المفاريع

ياكن ممشاها على جرهد القاع
خطوا غزالٍ ذيروها البواتيع

غروٍ يتل القلب من بين الاضلاع
تل الحرار الصارمات الطواليع

....