فوق هام السحب ( الشعر الشعبي) على متن القوافي

يامتابعين ابيات بوحي لو ابوح
‏شكري وتقديري لكم مايكفي

‏ما اقدر أقول الا من الروح للروح
‏متابعتكم تاج ع الراس والعين

بقلمي

يدور الزمان وكل غالي يبي يخليك
‏هذا درس كنت اسمع به وشفته بعيني
‏ㅤㅤ
‏خذاك النصيب ورحت جعل الله يهنيك
‏لو ان خاطري بك وانت لو خاطرك فيني

....

قلبي على شوفك من الشوق هلّا

‏والشوق من طاريك يا زين هزه

‏مابيــك عن حبي تصــد وتخــلا

‏قلب يحبك فــوق الاحبــاب عزه

‏جيتـك غلا ما جيت لك بـ اتسلى

‏حــبٍ عن عيــون الخـلايق تنـزّه

‏حبــك خـذا قلبـي ولا شــي خلّا

‏حتـى شعــوري بالغــلا يستفــزه

....

انتي اجمل من كتبته في حروفي
وانت اروع من له الهاجس تكلف

وانتي احلا من تحلت به وصوفي
وانتي اطيب من رحيق الورد والطف

وانتي اول من دعمني في ظروفي
وانتي اوفا من وفي فالناس وانصف

وانتي اول من كسر شكي وخـوفـي
وانتي انزه من سكن قلبي وشـــرف

....

من دروب اهل الهوى والعاشقين
‏جعـل مـا غيـرك غـرام ولا حبيب

‏وعن دروب اهل الجفا والراحلين
‏جعل عينك عـن عيوني مـا تغيب

....

اهديت لك من زهور الشوق كم باقه
‏ومجنونه الود ماينفع بها الراقي

‏النفس ولهه وروح الرح مشتاقه
‏وماينعش الزرع غير الماء مع الساقي

....

قلبي اخذته وانا والله ما اعطيتك
‏وشلون تاخذ خفوقي يا مشقيني

‏والله ما جيتلك وشلون انا جيتك
‏علمي بنفسي ترى يومك تناديني

‏رحبت يامرحبا واثر الحشى بيتك
‏كنك تبي عن حزن قلبي تنسيني

....

يابوي عطني موترك خلني اسوق
‏صبري على بعده تعدى الحدودي

‏الغالي اللي هزني يمه الشوق
‏وبيح خفايا خاطري والسدودي

‏ماتشوفني يابوي متعب ومحروق
‏والحال ناحل والتعب في خدودي

....

يالله يا رازق البايع من الشاري
‏يامعطي الخلق من فضلك بلا منّه

‏إنك تبارك صباح اليوم للقاري
‏وتكتب له الخير والتوفيق والجنه
‏
بقلمي

تمنيتك وقلت في خاطري ليته تمناني
‏وانا ماكل واحد شافته عيني تمنييته

‏على كيفك تذكرني على كيفك تناساني
‏وانا طاريك في قلبي ولا يوم تناسيته

‏زرعتك وردة حمرا تزين كل بستاني
‏ودفنت القلب في تربة مشاعرنا وخليته


....