فوق هام السحب ( الشعر الشعبي) على متن القوافي

‏يا قلبي أدري فيك طاهر وحسّاس
لا باس وإن كانت جروحك كثيره

حزنك وضيقك وإنعزالك عن الناس
صدقني إنها ببعض الأحيان خيره

....

دام وصلكَ فيه شي منَ المذله
اعتبرنيَ فرصه جاتك وراحتَ

يامطيح دمعِتي ودعتكَ الله
والله أنك طحتَ معها يوم طاحتَ

....

‏الزين في وجه الفتى مايعزه
ان كان ماهو في الطبايع والافعال

بيت ٍ لـ أبو الطيّب عظيمٍ منزه
سقته بتعبيري ولاهان من قال

ترى الفتى لاصار مافيه فزه
والله مايبلغ من العز مثقال

ودك اذا شفت الهلامه تكزه
حتى يسير مثل الرجاجيل رجال

....

حكم القدر ماشي علا الكل ماشي
والكل للمكتوب لابد يلقاه

والحض ما ياتي نفاق و تراشي
من عزه الرحمن فالناس رقّاه

كم من فقير الأمس لازال ناشي
واليوم ناشط فوق ماحد تعداه

وكم من غني مغرور كاذب ولاشي
ورده ذبل مهما من الماء سقّاه

غره زمانه في نعيم و تماشي
حتى تناسى من له المال واغناه

دنيا دنيه ما تساوي ولا شي
ويا ويل من يغتر في عز دنياه

....

‏ليت المواجع تبتعد عن طريقي
وليت المأسي ماتجيني من الساس

وليت الملل والياس ماهو رفيقي
وليت الزهـق ماحل قلبي والانفاس

وليت الامل يملا الشعور العميقي
وليت الفرح يملاخفوقي والاحساس

وليت ان حظي ما تعلق بضيقي
وليت ان قلبي ماعرف لحظةالياس

....

أبتسم للنـاس وأضحـك للحيـاه
‏ولو تضيق اليوم قل:بكره تزين

‏أعــرف أن اللـه وحـده لا سـواه
‏قـادر إنـه يبهج الصـدر الحزين

....

فديت منهو لا لقى الصدر ضايق
اقبل يجر الصوت لا تضايقونه

وضحكت كني طول هالوقت رايق
مدري لصوته او لخاطر عيونه

....

يارب وان ضاقت عليّ الوسيعه
انت الذي لا ضاق صدري اناجيه

وعبدك لو ان الوقت عيّا يطيعه
ما ينحني راسه لغيرك ويرجيه

....

‏اللي يحبك صدق بـ القلب والروح
‏مهما حصل يبقـى غراامك محله

‏واللي غرامه تقضية وقت ومزوح
‏يقدر يضـحي بك على ايـة زلــه

....

على الهقوه اللي في رحاب الظنون تدوج
اركاب الاماني دكها شح مرعاها

لاصار العشم بابه بـ قفل الصبر مزلوج
لا يمكن نحد اهل المعاذير لاقصاها

عزاز النفوس تجنب المشرب المسهوج
لو الفقر تطبع بصمته في محياها

زحول المعرفه هرجها ماهو بمفلوج
وآكبار البخت زين النبا يخدم اسماها

صحيح الظروف تحدنا والسنين تحوج
لاكن الوجيه البيض ندرى على ماها

لا شفنا الروابع تصتفق مثل صفق الموج
نصينا البيوت اللي على العز مبناها

مانقلط على اللي منكبه كنه مبنى هوج
حصيل الرمال الزاحفه وسط مذراها

عيال الرخى سكبت ملابس وصف هروج
ولا تغر غير اوادم كنها اياها

ترى اهل المهايط والحكي والعلوم العوج
زمول لاثقل حمولها طنب رغاها

سوالف طحاطيح السعه مالها منتوج
يامكبر دعاويها ومقرب معشاها

الى شان وجه الوقت والفوج قابل فوج
فريس المجالس خلها تمسك سراها

تحيزم لساعات النشب ببلج مرجوج
يشوف الجموع الهايله ويتمثناها

....