فوق هام السحب ( الشعر الشعبي) على متن القوافي

بعض البشر ترتاح له في ثواني
كنك تعرفه صار لك عدة سنين

وبعض البشر دمه ثقيل واناني
ما ينهضم لو يجلس اسنين وسنين

....

لا تكثر اقـوالك اذا مالك أفعـال
المفترض مثلك من القول خاجل

سهله عليك تكون عادي ورجال
لكـنها صعبه عليك المراجل

....

يسبنا جاهل من الناس مــقـرود
وينسى تواريـخ الليالي القديمه

حـنـا مـقر الـطيب مـركاز للجود
وقت الـمـلاقأ مـانـذب الخـريمه

ياصاحبي من راح ماعنه منشود
محدن يبي قرب الديار الوخيمه

دور وتـلـقـانا ليـا صـرت مضهود
ماهو عـلى كبر الصحن والوليمه

....

نمشي في الدنياء مع خط مرسوم
نحو الهدف مهما يكلف رسومه

نرضى بما جانا مقدر ومقسسوم
والراس من دون الكرامه نسومه

....

‏الطيب في روس النشاما علامات
واللي كسب نعمين لله دره

احدن يموت وتبكي العين لا مات
واحدن يموت ويكفي الناس شره

....

يا عزة النفس مــا عد باقي الا انتي
بتحفظي ماء وجهي ساعة الحاجه

الله يطول بعمرك كيف ما كنتي
والله يديمك ودمتي للوفي تاجه

....

من يشتكي همه على ساير الناس
ان كان ما زادوه ما ينفعونه

ما يجلي هموم المخاليق والباس
غير الله اللي ما تغمض عيونه

....

ليالي تكلفنا مواجيبنا كلاف
علاشان لايدفن براهينها السافي

وليله علا حمر الوبر نبدي المشراف
وليله نوردها علا المنهل الصافي

....

لو تجور الليالي ماتلين الجهود
عمر الاجواد ماجور الزمن هدها

كل مازاد جور الوقت زدنا صمود
خل الايام تمضي كيف ما ودها

....

‏ما عادت الأيام هي نفس الأيام
‏ولا عادت الناس الحبيبه حبيبه
‏
‏أحتار فكري قبل تحتار الأقدام
‏الدرب موحش و المشاعر غريبة

....