ديوان قصائد لشعراء المملكة العربية السعودية (متجدد)☘️☘️

قصيدة الله يخليك
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

يا ذا الغريب اللي جروحك منافيك

مالك وطن يستوعب أحلام دنياك

عمرك تسرّب من سنينه لياليك

وما عاد تدري وين؟ أو كيف وداك؟

من واقعك.. أحلام قلبك تصحيّك

على السواد اللي من سنين صحّاك

كنك تقول لحزنك: الله يخليك

شف لك أحد غيري وانا اوعدك ما انساك

في وحدتك ما غير حزنك يسليك

مواجعك تكتبك والحزن يقراك

ما بينك وبينك أغانيك تغنيك

لو الفرح ما عمره ف يوم غنّاك

وحيد تشعلك الدقايق وتطفيك

منسي.. تدوّر في عيونك خطاياك

إحساسك إنك! صرت ما عدت تعنيك

يجعلك ما تحرص إذا ضعت تلقاك

مرات.. رشدك للضلالة يوديك

مرات غيّك هو طريقك للإدراك

ياسك: أملك إنك تحقق أمانيك

أملك: ياسك ف ابتسامة محيّاك

حتى ولو ضحكتك لحظة تداريك

ما للشقي غير الشقاء أرض وأفلاك

ويا شينها لا صارت أرضك منافيك

غريب في أرضك وناسك ودنياك

قصيدة كاس الما
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

من الآخر.. باجيب الحزن واكتب كيف خلاني

مجرّد روح يسكنها الجفاف وتسكن الظلما!

حبيبي وانت عمرٍ قبل اعيشه تاهت الواني

ولوّنت الحياة بضحكتك قبل اشربك واظما

حبيبي وين غبت؟ وليه غبت؟ وليه يا جاني

تضيّعني من يدين الغلا يا الغادر الأسمى!!

يداهمني سؤالٍ كل ما مرّتني احزاني

وانا المح في عيوني ضحكتك حتى ف كاس الما!!

نساني؟ ما نساني؟؟ احتمال انه تناساني

!وانا مالي سواه ولو تحاصرني كثير اسما!!

رحل! إلا عن عيوني وتفكيري ووجداني

ورحلت بكل مافيني وقلت استوطن الظلما!!!

قصيدة طفلة نجديه
الشاعر: زايد الرويس زايد الرويس
#العصر الحديث
#المملكة العربية السعودية
0
103 مشاهدة

تدرين يا حلوتي ويش اخر امالي

لا صارت ايامنا تركض رماديه

لحظة لقا تجمع الغالي مع الغالي

وتكون بالفعل لحظه غير عاديه

اما خطفت لك نجمٍ فالسما عالي

والا زرعتك غمامة حسن ورديه

وانا حبيبك وابقهر كل عذالي

لا شافوا ان القمر يختال فيديه

تأكدي وقتها لو ينشغل بالي

فيك انشغاله وتفكيره بجديه

وشلون يقدر يخلط المر والحالي

وتصير سجاته لشفتك مهديه

يا اعذب من الما وش اللي حطم اغلالي

غير ابتسامتك مع نظرات جديه

والله ما يرخص الأول مع التالي

الا غلا طفلةٍ ترفه ونجديه

قصيدة فرحة حزين
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

يا نكهة الصبح طل الصبح بانفاسه

وانا اتنفس غيابك ويتنفسني

غريب.. فيني بلد يبكي على ناسه

ويطيح دمعه على اسواره ويحرسني

يصبني بعض هذا الحزن في كاسه

يسكر على ضيقتي كنّه يوّنسني

يرمقني بعين حرص إن مرّه نعاسه

يخاف من فرحةٍ تغلط! وتلمسني

والصبر حطّاب.. لكن.. منكسر فاسه

واحلامي ان جيت اوّقفها... تجلّسني

وينك؟.. بدا الخوف يقرع حولي اجراسه

والحيرة ف دربها المجهول تغرسني

محتاج لك.. ليت للضيقات كرّاسه

كان اكتب الضيقة اللي دوم تخرسني

والعشق اشوفه كثر ما تمطر اتعاسه

أحسه اكثر على قربك يكرّسني

وانا اعشقك يا ولادة حلمي وياسه

وابيك لو لحظة بقربك تحسسني

من كثر ما اشوف قلبي يابسٍ راسه

على غرامك أشك انه تلبّسني

وافكر اني أقص القلب ب احساسه

من خوفي انه على حبك ينافسني!

قصيدة كثير من السهر
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

كثير من السهر يعني كثير من الوله والشوق

وانا كل ما سهرتك صاح جرحي يا مسهرّني

ورا هذا السهر تنهيدتين وخافقٍ محروق

وانا ما اتصوّر انك يا حبيبي ما تصوّرني

أنا يا حضرة السارق! إذا تتذكّر!.. المسروق

أنا اللي ضعت في عتم السنين السود ادوّرني!

غيابك طال واللي منتظرك بغيبتك مخنوق

أحس ان الفرح يرفض بدونك لا يعبّرني

يا ليت العمر كله ضحكتين وعاشق ومعشوق

عشان اطيّر انفاس الغلا مدري تطيّرني

أحبك.. آآآآه لو مطرود قلبي فالهوى ملحوق!!

أو ان اللي كسرني مر في باله يجبّرني!!

قصيدة المعقول واللا معقول
الشاعر: زايد الرويس زايد الرويس
#العصر الحديث
#المملكة العربية السعودية
0
104 مشاهدة

بعد ما رفعت اقلام السكون وجفّت أوراقه

تطايح من ظلام الوقت ليلة نور مسروقه

تعبت من التعب من بابه المفتوح للطاقه

مشيت بخطوتينٍ لاحقه في درب ملحوقه

أبشعل شمعتين وباترك الهقوات منساقه

مع ان اخر هقاوي ضحكتي بالحزن مشنوقه

أبكتب فيك يا حزني قصيدٍ لاح برّاقه

وابمطر من عذابي دمعةٍ ماهيب مفهوقه

كذا يا وقت تهديني من سنين الألم باقه

وتتركني لنخل جروحي اللي مالت عذوقه

وانا يا وقت مالي فيك لا قدره ولا طاقه

ولااحدٍ في حياته جت حياته له على ذوقه

اشوف الناس من حولي على السجّات سباقه

واشوف اني لحالي في طريقٍ تاهت وفوقه

بديت استوعب المعقول واغرس حرف فاعماقه

علشان ابتساماتي تجي ماهيب مخنوقه

أبرحل عنك يا دنياٍ تشد الفرح بوثاقه

أبرحل لاي سكه تنتشل قلبي من عروقه

كفن أبيض وتنهيده ودمعة حزن حرّاقه

تكفي في زمن فيه اللحى بالذل محلوقه

قصيدة الجاني والمتهم
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

يا حضرة الليل.. يا جاني واناالمتهّم

ضيعت عمري وانا مانيب ناقص ضياع

ضاعت سنيني.. وهي ضاعت! وهذا الأهم

مُر الموادع وامرّ البعد دون الوداع!

يا غربة اللي شكى حزنه ولا احدٍ فهم

يا ضيقة المنتظر لا صار دمعه متاع

يا حسرة اللي يفل العمر سبحة وهم

يرجي سراب السنين ولحظتين اجتماع

حبيبتي لو نزعت من الحنايا سهم

آلاف غيره تنازعني بليا نزاع

حبيبتي.. من هو الجاني؟ من المتهم؟

من ضيّع الثاني وشكّل فصول الضياع؟

قصيدة جنيف
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

مدّي كفوفك وصل

يا غايبه عني

مدّي طيوفك شوق

خليني اتنفس!

خليني اتحسّس

ملامحك.. واقراك

ف كتاب عشقي لك

ميّت من اول فصل!

فقدتك واختنقت بغيبتك بانفاس من حولي

تعالي قبل اموت من الوله والشوق ف غيابك!

فقدتك آآآآآه يا هي فوق متني تصرخ حمولي

تعالي والمحيني... من سنه! ميت على بابك!يا رب صبّرني

صيف وغياب احباب!

والحزن يعبرني

ب اسباب وبلا اسباب

مُتعب.. تعب هالصيف

جوّ الرياض يهد!

باالله قولي لي

ش اخبار جو جنيف؟

مستانسه والا؟؟

جو الرياض ارحم!!

متى تجين.. الشوق سوّى سواياه

وانا هنا مزروع ف ايامي السودكل الوجيه اشباح

لو تلتفت يمّي

في غيبتك يرتاح

في نبضتي همّي

محتاج اسولف لك

عنّي.. عن احزاني

محتاج اسولف بك

لحكاية احزاني

محتاج لك كلك

صمت وحنين وبوح

تعالي... ودّي اتظلل... بفيّة غصنك... الريّان

باموت من الظما... يرضيك اموت من الظما.. يرضيك؟؟

قصيدة قبل الحفلة
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

جننيهم لا دخلتي بينهم في غفلة

وكل عينٍ طالعت بك غمّضت مبهورة

والله انك لا دخلتي تبتدين الحفلة

تتعب قلوب البنات وتحترق مقهورة

حسنك اللي يلزم العالم تجي تاقف له

من شعرك الين ساقك فتنتك مصهورة

وكان خصرك مال طير المذهلة رفرف له

رقصتك لازم تكون ببسمتك ممهورة

أنثري جوري دلالك كنّك اكبر طفلة

واستحي لا من غديتي بينهم مشهورة

ما حدٍ بعدك بيرقص دام رقصك قفله

للحفل والحسن دايم ما يُمل ظهوره

جننيهم لا انسحبتي بينهم في غفلة

وكل عينٍ طالعت بك فتحت مبهورة

قصيدة عايش وسط بيتك
الشاعر: زايد الرويس زايد الرويس
#العصر الحديث
#المملكة العربية السعودية
0
104 مشاهدة

حبيبة قلبي المغرم.. فديتك

نده قلبك على قلبي.. وجيتك

لقيتك حلم لوّن لي حياتي

كأني كنت ادوّرك ولقيتك

كتبتيني ب دفتر أمنياتك

وانا في مورق أحلامي قريتك

جنونك صمتك أحلامك فضولك

هدوءك اشتعالك لا ظميتك

حنانك عطرك المسكوب فيني

رحيق احساس وردك لا انتشيتك

فضاءك عالمك سحرك خيالك

كأني معك عايش وسط بيتك

أحبك.. إيه أحبك!.. ليه أحبك؟

لأني كثر ما اعطيتك.. خذيتك

أغني بك صباحات المحبة

واضمك ف ابتسامك لا غفيتك

وانا مشكلتي إن قلتي: أحبك

أضيع! وما أقول الا فديتك