فوق هام السحب ( الشعر الشعبي) على متن القوافي

ياصاحبي اصبر ولو قلبك مصاب
وابعد عن اصحاب النفوس العايبة

درس المواقف خير من درس الكتاب
ولا معرفة تُكسب سوى بالتجربة

والنفس لا تكثر عليها بالعتاب
ما شي معانا غير مالله يكتبه

واحسن ظنونك ثق بنفسك فالصعاب
تلقى بحسن الظن حسن العاقبة

....

‏لو عقد وجه الزمان المستبد حجاجه
‏بين اموت بعزتي والا اعيش بذلي

‏ما رضيت الذل لو وقتي يشد سياجه
‏ولا قبلت الهون من دقي ولا من جلي

....

‏معاه السوالف غير ياحلوها حلواه
‏تذوب الحروف الأبجديه وانا معها

‏لذيذه مساء الخير لا قالها بشفاه
‏يا حلو اللي قايلها وياحظ سامعها

....

‏مديت لك عمري على كف يمناك
‏وغيرك على رجوى هلا مد عمره

‏نزعت بيبان الثقل غاية رضاك
‏وشرّعت لك قلبي ويا طول صبره

‏ميّت شعور وفز قلبي لطرياك
‏وأعرف شعوري ما يجي غير مرّه

....

وانا هوى قلبي وليفٍ انتاجه
بين الضلوع العوج حسرات وجروح

عليه قلبي مايوقف خلاجه
منّ حيث م وجُه ومن حيث ماروح

اشفق على شوفه وضحكة حجَاجه
واشتاق له شُوق المغاليق للبوح

واليا ارتخى ليله وولع سراجه
جريتّ له صوت من الشوق مبحوح

....

‏ياقلبّي المسكين إسمعني وطيع
‏الحب دربه مرٌ لو قالوا حلو
‏
محد لحد لاتتبع أوهامك تضيع
‏ياكثرهم قالوا نحبك وارحلوا

....

‏لولا ظروف الوقت ماقيل لاباس
‏ولولا الأمل مايبتسم فالزمن حي

‏الله خلق هالناس تحتاج للناس
‏لاتبخل اليا صرت تقدر على شئ

....

بنت الشيوخ اللي يفكون الأنشاب
خل الغلا والحب تبقى على جنب

تكتب شعر تلفت نظر تحرق أعصاب
والذنب ذنب الشعر هي مالها ذنب

....

‏نخطي ونستغفر مِن الذنب ونتوب
‏ونرجع عَلى نفس الخطا مادرينا
‏
‏يارب يامن رد يوسف ليعقوب
‏عفوك وغفرانك وسترك علينا

....

متفرد بحسنك وطبعك عن الناس
واسلوب متميز وكلك فخامة

حتى المشاعر والمحبة والاحساس
الناس فيهم من صفاتك علامة

....