ديوان قصائد لشعراء المملكة العربية السعودية (متجدد)☘️☘️

قصيدة نار اللقاء
الشاعر: محمد بن عمار محمد بن عمار
#العصر الحديث
#المملكة العربية السعودية
0
181 مشاهدة

على ناراللقاء خذني القدم في شوق للميعاد

أحلّّق مع بقايا جروح قلبٍ فيك هيماني

أسابق شوقي اللي به لهيب مصافحك وقّاد

يمنيني مع الأحلام ويآمرني.. وينهاني

وقفت! بجانبك جسمٍ وعقلي للخيال إنقاد

وتهت بغمرة الفرحة وعشت بعالمٍ ثاني

أمد الكف، يرجف من هيام الخافق الرعّاد

شفاهي خانها التعبير، وهرجيٍ مات بلساني

ومن شدّة هيامي، نبض قلبي بالحشا يزداد

رجف مستشعرٍ دافي الكفوف لنجل الأعياني

تضيع، علومي بنظرات شهلا رمشها لداد

ونشوة داخل أعماقي سرت وإهتزت أركاني

يذوب القلب وضلوعي على ماصار به شهّاد

ويموت من الغبن حسرة وعندي فيه برهاني

أنا البرهان عندي! حالي المعلول، يالأجواد

وجلدٍ فوق عظمٍ عايشٍ في صورة إنساني

سجنتيني رهين الحب وحطيتي لي الأصفاد

وقيّدتي المشاعر في خفوقٍ منك حيراني

منحتك للوفاء فرصة على ما ظن ما تنعاد

أبي إثبات حبك...! كان قلبك، ما تناساني

على زايد غرامك صار لك وسط الحشا مقعاد

وبيتٍ من وحي فكري بنيته وسط وجداني

نحّت من الصخر بيتٍ أنافس به ثمود وعاد

وبنيت أهرامٍ تنافس بناء فرعون وهاماني

وخلدّ ت إسمك، بخارج مدار الكون بالأرصاد

محطة بالحشا،، تستقبل إرسالك،، إذا جاني

عليم الله،، كم ليلٍ قضيته،، وقفةٍ وقعاد

وكفي يحتضن راسي ودمعي غرّق أوجاني

أهدّي ثاير العبرة...! بد معٍ لا مسحته زاد

وأقنعّ نفسي إني في غرامك كنت خسراني

وجع! معقولة إحساسك توفى في حشاك وكاد

عليك الله أكبر،، ما تجمّلتي،، على شاني

ولا لي في هواكم عقب هذا غايةٍ ومراد

أبا أمشي في طريقي وأترك القاصين والداني

عزيزٍ ما أنحني إلا بفرضي راكعٍ سجّاد

أخضع الرأس للي خالقه، وأرجيه غفراني

قصيدة يازمن قاسي
الشاعر: محمد بن عمار محمد بن عمار
#العصر الحديث
#المملكة العربية السعودية
0
178 مشاهدة

علامك يازمن قاسي عليّ بقسمة التوزيع

تقربني من العذال وتقصي القلب عن خله

يوادعني ولا لي حيلةٍ غير أنطق التوديع

فمان الله وأستدرك خطاي إن كان به زله

عسى يشفع إلا مني تركت اللوم والتقريع

أنا بالله، ويش اللي جنيته، لاجل ذا. كله

أنا ماكنت أصدق من وشي في صاحبي وأطيع

ولا ني بأستمع لاهل القلوب اللي بهاعله

أنا شاعر مشاعر ما يكفيني سوى التبديع

كلامٍ وازنه بالعقل،، والمنطق، دليلٍ له

إلى مني بغيت القاف جبته عسفٍ اوتطويع

أصور وافي المنظوم والمعنى على حله

أصيغ الشعر موزونٍ، بلا تفعيلة وتقطيع

موازينه براسي،، كاملاتٍ مابها خله

ورثته عن علوم رجال لاحفظٍ ولا تسميع

وترى الماء من جبل لاشك ماكلٍ بيفطن له

قصيدة عيونه الخرسا
الشاعر: محمد بن عمار محمد بن عمار
#العصر الحديث
#المملكة العربية السعودية
0
175 مشاهدة

صوّبتني نظرة، النعسا

في فؤادي وانكسر باسه

العمر عشرٍ مع الخمسَا

والخصر، والقدّ، مياسة

انحمس قلبي معه حمسا

وانقلب في راسي الطاسة

آتمنى القرب، لو لمسَا

كود حظي، ينطوي ياسه

ماوجد له، بالبشر جنسَ

درةٍ في، وسطها ماسة

طبت أنا من شو فته نفسا

وشيمتي طابت من أجناسه

في بحور الود له مرسى

داخل، الوجدان، غطّاسه

لدّني، بعيونه، الخرساء

في هدبها، صف حراسه

حطّ له في مهجتي غرسا

في الحشا، عطّر بنسناسه

لا هرج هرجه لنا همسا

وإن تبسّم، بانت أضراسه

كم، سهرنا، ليلةٍ غلسا

والفجر، قد، دقت أجراسه

المشاعر،، بيننا، حبسا

محتويني، بدافي، أنفاسه

وضّمتي، لكفوفه الملساء

في يميني ينبض إحساسه

ما خبرت إن الغلا يقسا

في طبوعه، بين، جلا سّه

وعاد! بن عمار ما ينسى

بالقصايد، ربعه، وناسه

كان يومه صار مثل أمسا

خبرته، في الشعر نبراسه

دارسٍ طبع الهوى درسا

في المحافل، رافعٍ راسه

قصيدة دلعهن عالي المستوى
الشاعر: محمد بن عمار محمد بن عمار
#العصر الحديث
#المملكة العربية السعودية
0
173 مشاهدة

الهوى والمحبة، والدلع والجمال

والقلوب الرهيفه، ماتخاون سوى

راعي القلب الأخضرلوتكلّف وشال

شال ثنتين منهن،، كان قلبه قوى

بس أنا، شايلٍ قلبي همومٍ ثقال

أربعٍ فوق الأربع لين ذاب وذوى

همّ فرقا، عشيري والتوجد، ليال

وحرقة البعد في قلبٍ جزع وإنكوى

لو أعدّد همومي وأضرب ابهن مثال

ماهقيت إن قافي، يشمل المحتوى

كنت أنا في طريقي ماشيٍ بالعدال

متركٍ كل ذيبٍ فوق رجمه عوى

لين قابلت في، دربي شبيه الغزال

غضة العود غروٍ، عقلها مااستوى

يوم لدّت بطرفٍ، زاهي الإكتحال

وسلهمت رمشها اللي للمحاجر زوى

وجيدها اللي مداريته بطرحه وشال

مثل عنق الوضيحي لا إنثنت إلتوى

وصفحة الخد تزهابه من الذوق خال

وأبيض اللولو، اللي،، للثنايا حوى

والشفايف، لها ينبوع عذبٍ زلال

راعي الغي عمره لوشرب ما إرتوى

قلت ياريم صبري، بالمعاناة طال

ما تشوفين حالي، بالعذاب إنطوى

أسهرالليل ودمعي من على الخد سال

وآتعبّر وراسي، من ونيني، خوى

وآآآهني الذي عمره، تمنّى، ونال

مرةٍ في حياته، أدرك اللي نوى

لضامرات البطون ومترفات الدلال

بالتغنّج، دلعهن، عالي، المستوى

بس ياليت،، ما تنفع على كل حال

التمنّي، تجنّي، والسلامه، دواء

قصيدة ذكريات الأمس
الشاعر: محمد بن عمار محمد بن عمار
#العصر الحديث
#المملكة العربية السعودية
0
150 مشاهدة

تذكرت الغروب وضحتك لي مع مغيب الشمس

تذكرت البحريعكس مع الأمواج بسماتك

تذكرت النسيم اللي وصلني مع أثيره همس

أماني شوقك الزايد معطّرمع تحياتك

تذكرت الكفوف اللي تشابك خمسها بالخمس

ودافي دمعةٍ هلّت فرح لحظة ملاقاتك

تذكرت الربيع اللي غمس ورده بخدك غمس

حوى لون الشفايف وايتمخطر فوق وجناتك

تذكرت وذكرت إن المشاعرتحترك باللمس

وأنا فيني المشاعرميّته من شح لمساتك

تذكرت الحنين اللي حمس قلبي بناره حمس

حطبها من ضلوعي وإحتراقه مصدر سكاتك

تذكرت الفراق اللي طمس ماضي هوانا طمس

على أنقاض قلبٍ يحتضرلحظة مناجاتك

تذكرت الهيام اللي غدى من ذكريات الأمس

غرامٍ يجحده قلبك وأشوفه بين نظراتك

قصيدة خصلتينٍ فوق خدّه
الشاعر: محمد بن عمار محمد بن عمار
#العصر الحديث
#المملكة العربية السعودية
0
149 مشاهدة

ويل منهو صارت الأيام ضدّه

كلما تصفى، يكدّرها، شوايب

ضامرالسرجوف مدري ويش حدّه

يبتعد عني بلا ذنب وسبايب

حبل وصله كلما حاولت أمدّه

يقطعه، ماخاف من ربي عقايب

وآعذابي،، لا تمايل لي بقدّه

غصن موزٍ ذعذعه هب الهبايب

ايتهصّر بالمشي، لارحم جدّه

وايتعمّد يظهرأنصاف الذوايب

مرخيٍ له خصلتينٍ فوق خدّه

ماشيٍ يلعب بهن والقلب ذايب

لا فتلهن انطون بإصباع يدّه

وإن تركهن وصلن حدود الترايب

ونابيٍ يشكي المضايق منه ندّه

لا تثنّى، شفت انا منه العجايب

صاب قلبي لحظ عينه يوم لدّه

وإنتثر دمعي، على خدي سكايب

صارمن عقب الرخا حالي بشدّه

وأنا كم لي عن دروب الغي تايب

والله إن قلب العنا ماهو، بودّه

لكن الأ قدار، به مخطي وصايب

قصيدة معدن ذهب
الشاعر: محمد بن عمار محمد بن عمار
#العصر الحديث
#المملكة العربية السعودية
0
149 مشاهدة

عن جملة الناس قلبي مختلف نبضه

وعن باقي الغيد كن العين مخطوفه

ملك غلاه الخفوق بطوله وعرضه

وحرم عيوني مشاهد غيره وشوفه

معدن ذهب لابرونز ولا من الفضه

غالي ثمن سلعته فى السوق معروفه

العين مدعوجةٍ بالكحل مكتضه

روس الهدب كلما أغضى يشهرسيوفه

وتفاح شامي ثمرها في الصدرغضه

والخصر مزموم والساقين ملفوفه

ومجدول يسبح على المتنين إلى قضه

أطرافه إليا مشى تلامس ردوفه

ياما عليه البنان، بحسرة أعضه

من حرقةٍ بالحشا، والنفس ملهوفه

قصيدة أدري ومدري
الشاعر: محمد بن عمار محمد بن عمار
#العصر الحديث
#المملكة العربية السعودية
0
143 مشاهدة

مدري الشوق صادق يوم داعب غلاك

مدري إنه أمل يكذب مع العاطفة

مدري طول النوى والبعد زوّد قساك

مدري أطباعنا في الحب متخالفة

مدري ألحق بقايا، مابقى من هواك

مدري إن الظروف بدربنا واقفه

مدري النور نور الكون وإلا،ضياك

مدري الشمس من نورك بدت كاسفه

مدري الذوق هذا، ناتجٍ من حلاك

مدري إنه ثقل، وإلا أنتي وش شايفه

مدري أسبح مع التيار وأمشي معاك

مدري أقاوم أمواج،الغلا الجارفه

مدري أستسلم لحبك وأساير رضاك

مدري أحارب أوهام الجفا العاصفة

أدري تحلّق أفكاري، بواسع فضاك

وأدري أسابق أحلام الهوى الزايفه

أدري إنك شقا، قلبٍ تعذبّ وجاك

وأدري إنك سبايب حالي الناحفه

أدري إنك ملكتي القلب والله عطاك

وأدري إنك عزيزة شيمتك، نايفه

أدري إنك على خبري عساني فداك

وأدري إنك تعيشين الهوى وعارفه

أدري إنك شتاي، ومستجير بدفاك

وأدري إنك ربيع أشجاري الوارفه

أدري إني أموت لبسمةٍ من شفاك

وأدري إني أذوب بنظرةٍ خاطفه

أدري إني أعسف القاف لك ياملاك

وأدري الشعر بحرٍ له يدي غارفه

أدري إني حكاية حب عشت بخفاك

وأدري إني أماني عمرك الهادفه

أدري إني عليلٍ مرتمي في حماك

وادري إني رهين، الدمعة الذارفه

أدري ني صويبٍ ماحصلي دواك

وأدري إني أسير جروحك النازفه

أدري إني قتيلٍ في مجاهل فناك

وأدري السهم ماأخطى وأنتي الحاذفه

أدري إني خسرت العمر كله وراك

وأدري العذر طبعا ، قولتك آسفه

قصيدة ضاع الوفاء
الشاعر: محمد بن عمار محمد بن عمار
#العصر الحديث
#المملكة العربية السعودية
0
143 مشاهدة

ضاع الوفاء والهجر في القلب ينساق

والحال من طول المفارق طريحة

سهران اسامر، ساري النجم براق

بين الكواكب في سمانا الفسيحة

حبي وشوقي له عهودٍ وميثاق

ما اطيع شور اللي يقول النصيحة

حبٍ دفنته في ضميري بالأعماق

خلف الضلوع وتحت قلبي ضريحه

لوتختلف في صاحبي كل الأذواق

ذوقي أنا، ثابت، ولا احدٍ يزيحه

ياعاذلي قلبي من الحب ما فاق

هايم بشوق، اللي عيونه، مليحة

خلاّ فؤادي في الحشا منه خفاّق

هنيكم،، ياأهل القلوب،، المريحة

نار ا لغلا في مهجتي تحرق إحراق

وكم قلتها له، في، عبارة صريحة

إمّا يجي، يطفي لهيبي والأشواق

وإلاّ، يروح، وجعل ربي، يبيحه

قصيدة مفهوم التميّز
الشاعر: محمد بن عمار محمد بن عمار
#العصر الحديث
#المملكة العربية السعودية
0
131 مشاهدة

على شط القوافي والعاني سابحه جوّاي

قصيدي مركبه مبحر وحرفي صايرٍ ربّان

تحشرج داخل أعماقي فلول الشعرلي شكّاي

وأعسفه قاف منثورٍ من الياقوت والمرجان

بمفهوم التميّز سطّرت معنى الشعر يمناي

متى ما أبدعت بالمنظوم يقرأ قافي العميان

أترجم نفحة إلهامي على نور القمر بالناي

يقوم اللي فقد سمعه من النشوة لها طربان

وشلاّل المشاعرمنبع إبداعه من أقصى احشاي

هطوله ينهمر شعر وشعورٍ يشعل الوجدان

طريق إبداعي لنظم القصايد راسمه بخطاي

على صدر الزمن مجدٍ ابن عمار له عنوان

عزيزٍ شامخ القامة وصيتي قاهرٍ اعداي

معانق للسحاب، وصرت فيهم شاعر وفنان