ديوان قصائد لشعراء المملكة العربية السعودية (متجدد)☘️☘️

قصيدة الشعر أكذبه أعذبه
الشاعر: محمد بن عمار محمد بن عمار
#العصر الحديث
#المملكة العربية السعودية
0
107 مشاهدة

من لا يعرف القصيد ويفهم أسلوبه

لا هو بشاعر ولا له في الشعر داعي

ترى أكذب الشعر،، كله فن وعذوبة

لا صار من شاعرٍ عاشق وملتاعي

ومعذور راعي المودة لو فرى ثوبه

الحب، نزلّ، رفيع الشأن، للقاعي

والوصف فنيّ متى ما شفت رعبوبه

تستاهل أحلى القصيد وزبدة إبداعي

خشف المها كنها، الألماس مصبوبة

الطرف عن شوفها بالصد ماطاعي

أوكنها، من بنات الحور، مجلوبة

كل من نظرحسنها منه العقل ضاعي

لامن تثنتّ، تتل الروح، بأعجوبة

ومن زفرتي بالحشا تخالف أضلاعي

أصفق عليها بكف، لكف مضروبة

وأدق صدري وأعض بنابي إصباعي

إذا حكت، كنها للهرج، مغصوبة

في صفحة الخد نورٍ يرسل شعاعي

منها الحياء يحتشم إلى مشت صوبه

يقصر لها خطوته بالشبر، والباعي

وكن المجامر، بوسط الثغر مشبوبة

والثلج كلما تبسّم، فى الجمر ماعي

ومجدلاتٍ على الأمتان، مذبوبه

وفي روضة الصدر طلعٍ روسه رفاعي

الدانة، اللي عن الأعيان، محجوبة

تخشى على نفسها، من كل طماعي

تسبى العقل والإرادة، شبه مسلوبة

بخيالها اللي إلى جاء قمت مر تاعي

من بين ضلعين كن الروح مسحوبة

ساعة رمتني بلدّة سود، ووساعي

حب الشرف مايعرف العيب والحوبه

مادام سرّه من الأثنين، ما شاعي

وهروج بعض البشر ماهي بمرغوبة

البيع، في سوقهم جملة، وقطّاعي

وإلا البعض هرجهم بألفاظ محسوبة

إلى اشتروا سلعةٍ، ماهيب تنباعي

بحر الهوى كان به عشاق مرّوا، به

فأنا بوسطه،غريق، لغاية نخاعي

واللي ابتلى في الغرام وبانت عيوبه

الله يعينه،على الحسرة والأوجاعي

كم واحدٍ في العمر، مانال مطلوبة

ماحصّل إلا الشقاء من كل الأنواعي

وإن كان طرق الهوى للمبلي عقوبة

فالله غفورٍ مجيب، لدعوة الداعي

بأدعية، تالي حياتي، يقبل التوبة

عن كل زلة، جناها الطرف وذراعي

قصيدة طري العود
الشاعر: محمد بن عمار محمد بن عمار
#العصر الحديث
#المملكة العربية السعودية
0
103 مشاهدة

هلا بالريم يوم أقبل يسابق ظلّه بممشاه

تعثر بالخطى خايف وهوفي منطقة مرماي

هلاوالشوق له حيّاه من مسراه إلى ملفاه

كما شوق الزروع اللي هجرها الماء من السّقاي

عيونه ترمش المعنى وقلبي بلحظها يقراه

إلى جت عينه بعيني تترجم قصدي ومعناي

طرّي العود رعبوبٍ جماله والحسن أطغاه

ولحظ الموت بالنظرة متى ماطالعت بأغضاي

متى ما ابحرت بعيونه أغوص بعمقها وألقاه

بعيدٍ مايوصّلني قرارة هاجسي ومناي

أشوف البسمة ويعجز لساني وصفها بشفاه

وتخون الذاكرة فكري وأحمّل غلطتي دنياي

وترى الأيام حبلى والليالي تنولد أشباه

تصاريف الدهر والضيم حدّتني على أقصاي

على صفحة جبينه ينعكس نورالقمر بضياه

ينوّرلي ظلام الفكر، لحظة يبتدي مسراي

سريت بهاجسي لأجله توغّلت بمحيط حماه

أروّض مهرة أفكاره تعود لموطني وحماي

أسافر مع خيال الشوق سابح في بحور رضاه

أجدّف بالغلا مركب هواه ويرسي بمرساي

إذا خذت القلم كل القوافي من يدي تخشاه

تقول السمع والطاعة وفيما قلت هذا امضاي

أعسف القاف والمعنى بكيفي آمره وأنهاه

أطوّع نايفات القيل وهذا في الشعر مبداي

أنا لفّيت بحر القاف من أقصاه ألين أدناه

معاني تحتضرمغتالها شخصٍ سفيه الراي

وأنا مالي مرامٍ كان فكره مبعد بمغزاه

ولا لي في الهجاء إلا إن بلاني شاعرٍ خطاّي

كماعدٍ قراحٍ ماورد، ماه الدلو ورشاه

متى مافاض جمّي ترتوي شهب القفاربماي

وعرضي ماتدنس، يوم كلٍ هاجسه أغواه

حفظت النفس عن عوج الدروب بفعلي بيمناي

أعرف الرجل بأفعاله، تدسمّ شاربه يمناه

ودربٍ يوصل المنقود عن مشيه تشوم خطاي

ورثته عن رجالٍ درّسوني العلم، من مبداه

وطابت سيرتي من طيب أبوي وجدي ومجناي

ومن يشري رضاي بدين نقدٍ إشتريت رضاه

فداه اللآش دامه ماتغالا، في العمر مشراي

عزيزٍ ما أصاحب غير من مثلي عزيز الجاه

يثمّن طاعة الله والردى، ماهوب، به مشّاي

قصيدة الظبي يفرس أسدها
الشاعر: محمد بن عمار محمد بن عمار
#العصر الحديث
#المملكة العربية السعودية
0
98 مشاهدة

ياويل قلبي كلما تطري الشوق

يفز فزّة، طفلةٍ، في مهدها

ويحن حن معقلاتٍ من النوق

وإلا خلوجٍ ماخذينٍ ولدها

للجادل اللي حسنها تلبسه طوق

ما لبسه أحدٍ قبلها، أو بعدها

أقدام رجلي إنثنت داخل السوق

كلما بغيت آقف، تردّى جهدها

على فتاةٍ خلّت الشعر مفروق

والصدر زاهي فيه زمّة نهدها

ينتل قلبي، تلة الدلو، مصفوق

بجال الركية وإنقطع من قددها

كلما تمخطر فارع القد ممشوق

أخشى عيون الناس تبدي حسدها

لولا الحيا لااخليّ الثوب مشقوق

من واهجٍ في وسط كبدي لهدها

الجوف من نيرانها صار محروق

والطرف يسهر، ليلته ما رقدها

أهل دمعٍ أحرق الخد، والموق

والعين مما شفت طاول سهدها

ماعاد لي بالسوق ياناس ماسوق

من يوم صارالظبي يفرس أسدها

مافات مات وكل مطرود ملحوق

ياما عشير وعشرتك له، جحدها

من عقبها والقلب والفكر مغلوق

وروس الحبال يحلّها اللي عقدها

مسكين منهو بالهوى ماله وفوق

لي من بغى له حاجةٍ ما وجدها

حظ النكد ما طاوعه لين وارفوق

وغيب الليالي،، ما تبيّن وكدها

وإلاّ الشعر بابٍ من الكل مطروق

هروجٍ ينقّط من حلاها، شهدها

كما روايح صيف لوناضت بروق

تمطر وهي لا شك ما اسقت بلدها

قصيدة غريزة غلاك
الشاعر: محمد بن عمار محمد بن عمار
#العصر الحديث
#المملكة العربية السعودية
0
97 مشاهدة

هلااااا يالغزال اللي لك الشوق وقاّدي

غريزة غلاك، مثبته، في طبايعنا

أنا، ما احتمل فرقاك، ياغاية مرادي

ولكن ظروف الوقت، عيّت تطاوعنا

تصاريف حال الخلق، من قرب وبعادي

على ما يريد الله،، ويمليه، واقعنا

وشوفك حبيبي عندي أفراح وأعيادي

شرينا رضاك وغالي الروح لك بعنا

على همس شوقك قمت مفجوع وأنادي

صدى الصوت جدد بالضماير مواجعنا

سرت في عروقي نشوةٍ هزّت فوادي

عقب ما تفارقنا،، وهلّت مدامعنا

وليلي قضيته بين، وقفات، وقعادي

أنا،والسهر، والهم، وإبليس، رابعنا

أجاوب حمام الورق، بالنوح في الوادي

وطير القميري،لا تغنتّ، تساجعنا

أحاول أسليّ النفس، لاشك، مافادي

تواصيف شوقك يالغلا، جزلة المعنى

وصارت هجوسي والسهر شئ معتادي

وقالت شياطين الهوى انبسط، معنا

نظمت القصيد، وجبت طيران وأعوادي

وشالوا لي السامر،وطربت مسامعنا

ولكن هموم القلب، في الصدرتزدادي

ولا له دواء إلاّ الوصل ياللي مولعنا

عزيزٍ وراك القلب، مجبور، ينقادي

عسى الله على الطاعات والخير يجمعنا

قصيدة قتيل البناتي
الشاعر: محمد بن عمار محمد بن عمار
#العصر الحديث
#المملكة العربية السعودية
0
97 مشاهدة

يامغرّبٍ عني وأنا وجهتي شرق

ملفاك لي لو درت كل الجهاتي

عالج طريحٍ بالهوى مركبه غرق

في بحر حبك مشرفٍ بالمماتي

طرقت كل أبواب درب الهوى طرق

شايل صواب، طعوني الخافياتي

ماشفت أنا في موجعات الولع فرق

من مات،، قالوا له قتيل البناتي

حبك سرق بسماتنا والفرح سرق

ولأجل الغلا، داريتها بالسكاتي

أجاوب بزود البكاء، نايح الورق

سهران ليلي، ما اهتني بالمباتي

سحايب دموعي غشا نوّها برق

من موق عيني، حدّرن ماطراتي

سهم العيون اللي زرق بالحشا زرق

بحد الرموش، اللي بهن قاتلاتي

ناره كوتني وأحرقت خافقي حرق

وأصبحت عقبه، مخطرٍ بالوفاتي

قصيدة القناااع
الشاعر: محمد بن عمار محمد بن عمار
#العصر الحديث
#المملكة العربية السعودية
0
97 مشاهدة

إنكشف عنك القناع وبيّن الوجه الصحيح

وصارعلمك في الحقيقة مايجي له وزن ذر

لا تسبب في زوالك، والله إني لك نصيح

مثل، من سبب زواله،، يوم للناقة، عقر

المثل يقول إذا طاح الفصيح، فلا يصيح

وأنت ماسمى عليك بطيحتك أحدٍ حضر

أبدع بمنظوم قافي، لا لذم ولا مديح

وصرت له شاعر مشاعر، وأتباها به، فخر

لا تمادى في غرورك وأنت بالساحة جريح

مهما تفعل، ما بيشفع لك تأسف أوعذر

كم حشمتك وإحترمتك، ماتبين فيك ضيح

وكم دمحت الزلة، وكل الخطأ مهما كبر

مكرمك لاشك كفك.! في العطايا لي شحيح

وكان راسي عاش، لقنتك بدايل ما بدر

قصيدة عديم المشاعر
الشاعر: محمد بن عمار محمد بن عمار
#العصر الحديث
#المملكة العربية السعودية
0
96 مشاهدة

عديم المشاعر هالزمن كيف نوثق به

حرام الثقة في مثل شرواه ياناسي

تناسى عهودي والوفاء صار يلعب به

ونسى اني بشر كلّي مشاعر واحساسي

تغاضيت عن صده وهجره بلا سبِّه

وتجرّعت لأجله علقم الصبر بالكاسي

رماني هواه، بوسط بحرٍ بلا غبّه

ظلامٍ بلجّة،، ما تبيّن له إغلاسي

دقاقٍ قوامه يشبه الغصن في هبِّه

تهزّع متى ما، مال به ريح نسناسي

بمجدول شعرٍ ينتثر، كلما ذبّه

على اردافه اللي تشبه لروس الأطعاسي

وغضيض الثمردون النحروأسفل اللبِّه

تفافيح شامِ طابت لقطف غرّاسي

عليه الله أكبر كيف ماخاف من ربه

وعالج طريحٍ من سواياه محتاسي

اذا صار جرحه في الحشا مانفع طبِِِِِِِّه

قطعت الرجاء وأعلنت من حالتي ياسي

ولاشك عيبي مهما سوّى بي أحبّه

من أخمص قدم رجله الى هامة الراسي

قصيدة أخالف هاجسي
الشاعر: محمد بن عمار محمد بن عمار
#العصر الحديث
#المملكة العربية السعودية
0
96 مشاهدة

الله أكبر وش اللي في حياتي جنيت

يوم حظي يعاندني.! ويرجع وراء

كلما قلت عن درب العذارى سليت

مرّ طيفٍ وجدد جرحي اللي برى

أبتعد عن مراتعهن، إلى من مشيت

وأتحاشى وأخالف هاجسي لا سرى

أحسب إنيّ على نفسي وفكري قويت

ما دريت إن قلبي، في هواهن ضرا

كلما قمت أكبّر، للصلاة، ونويت

طاف في شاشة عيوني خيالٍ طرى

وأرتبش بالتلاوة ناسيٍ وش قريت

وأقطع الفرض مدري عقبها وش جرى

السّهو، له سجودٍ لوسرحت وسهيت

واللي يغلط يصحّح له، إلا، من قرأ

وكان نظم القصايد ذنبي اللي افتريت

لا ني أول ولا آخر شاعرٍ افترى

قصيدة البارعة
الشاعر: محمد بن عمار محمد بن عمار
#العصر الحديث
#المملكة العربية السعودية
0
96 مشاهدة

بارعة في، فن تعذيبي بروع

بالتغزّل، والهروج الدافية

ماحسبتي العاقبة قبل الشروع

بإرتكابك، للغلط، يالهافية

عزتي بالنفس، ماتقبل خنوع

من مفاهيمٍ،، بفكري وافيه

ماانحني إلاّ بفرضي والركوع

للذي محصي الأمور الخافية

ولاتظنين التسامح لك خضوع

وأنتي طبعك للحقايق نافيه

كلما كبرّت أصليّ في خشوع

إنبرى طيفك، وشال القافية

وشتت أفكاري تفاريد وجموع

وأنا بالي، به همومٍ كافيه

سبة اللي ذاويٍ بين الضلوع

ينتظر منك، الحلول الشافية

من غيابك عنه مخطورٍ يموع

وعن منام الليل عيني جافيه

كلما شق البدر ستر الهجوع

قلت ذي محبوبتي، جت لافيه

وان طريتي لي بعزالنوم أفوع

وأشعل أنوارالهجوس الطافية

أنتظر نور الفجر يبدأ الطلوع

ساهر، وكل الخلايق غافية

وش يفيد اللي تحاشا للوقوع

بالحذر، وأقدام رجله حافية

فالعمر ماعاد به فرصة رجوع

والغنيمة في العفو، والعافية

قصيدة الشمس والفيّ
الشاعر: محمد بن عمار محمد بن عمار
#العصر الحديث
#المملكة العربية السعودية
0
92 مشاهدة

معه صرت مثل الشمس تتبع نزوح الفي

مسارٍ به الأهداف ماهي بمشروكة

عجب! للمسافة بيننا في طريق الغي

متاهات حسيّة وخطوات مربوكة

وكم قلت له لاجيت أحاكيك صدّ وعيّ

ولاترحم اللي صحته دوم موعوكة

بعد مانقص قدره ولاعاد يسوى شيّ

غدت أغلب الساعات ببلاه مبروكة

بقلبي غرامه مات لايحسب انه حي

كتبت التنازل عنه وآبحرق صكوكة

سجلّه طويته من حياتي بيديني طي

قتلت بيقيني مارد الظن وشكوكة

كواني غيابه في سويداء خفوقي كيّ

دموعي على الأوجان والخد مسفوكة

تذكّرت عهدٍ لاطرى قلت أنا ياويّ

على شوفته جالس معي تضحك حنوكة

بهاك الجبين اللي كما البرق يشعل ضي

وشهل العيون اللي من الكحل مدعوكة

وخدٍ مثل ورد البساتين حوله مي

ومنثورشعرٍ سابحٍ ياصل وروكة

هجرني بعد ماارووه كاس المكابر،ري

وطاوع كلام اللي خذه في الهوى دوكة

عقب مالوى بالكذب عنق الحقيقة لي

تركته لو إن الروح بحماه مملوكة

عرفت إن حظّي دايما في المحبة سي

وثبت إن حبه لي ألاعيب محبوكة