ديوان قصائد لشعراء المملكة العربية السعودية (متجدد)☘️☘️

قصيدة البرقع الذوق
الشاعر: محمد بن عمار محمد بن عمار
#العصر الحديث
#المملكة العربية السعودية
0
81 مشاهدة

اللي ذبحني، راعي البرقع الذوق

تاهت عيوني..! بين نظرات، عينه

الله أكبر..! كوكبٍ طاح من فوق

مع جملة أهل الأرض، ماشفت زينه

العنق، عنق الريم، والقد ممشوق

والورد، من فوق الوجن، زارعينه

حارت بي الأقدام في مدخل السوق

وضاعت علومي مدري الدرب وينه

شكيت ضعفي،، للذي معتلي، فوق

يلطف بحالٍ، عقب شوفه حزينه

وهليت دمعٍ أحرق الجفن، والموق

ولملمت جرحي، وإرتضيت الغبينه

عوّدت أبي قلبي وإلى القلب مسروق

خذه معه..! زين الوصايف رهينه

قصيدة الوجيه المكفهرّه
الشاعر: محمد بن عمار محمد بن عمار
#العصر الحديث
#المملكة العربية السعودية
0
80 مشاهدة

الله أقوى من صباح أهل الوجيه المكفهّرة

والله أعلم، باقي الأيام، وش هي مخفية

من صروف الوقت هاللي في عنادي مستمرّة

العمر، شمسه توارى، والليالي، مقفية

التجئ لك يا منجّي كل نفسٍ مستضرّة

راجيٍ لطفك من ظروف السنين المزرية

يامغيث اللي ببطن الحوت يا كاشف لضرّة

ترحم، اللي بالعنا، نفسه لنفسه مشقية

ما حدٍ غيرك له الشكوى وعطفه نستدرّه

يا ولي العرش، يا جزل العطايا المغنية

أشتكي لك علةٍ في وسط جوفي مستقرّة

وأعترف لك بالخطأ وأبوح لك بالمعصية

برحمتك كل النفوس اللي حزينة مستسرّة

بجودك وعطفك عليها من حمولٍ مضنية

أنت أهل المغفرة والجود والتقوى ببرّه

وأنت أهل المرحمة، وأهل اليدين المعطية

قصيدة الأصل غلاّب
الشاعر: محمد بن عمار محمد بن عمار
#العصر الحديث
#المملكة العربية السعودية
0
76 مشاهدة

وزنت أنا القاف، يوم الغشم لعبوا به

هرجٍ صحيحٍ ولا به زيف، وخداعي

وإلا رخيص الحكي، ما أروحٍ أنا صوبه

إ مّا، كلامٍ يفيد، أو ما لها، داعي

سبحان ربٍ عصمني منه بإعجوبة

نقل الحكي خصلةٍ ماهي من أطباعي

كم من حبيبٍ،، تفارق هو، ومحبوبه

بأ سباب هرجٍ، بوسط المجتمع، شاعي

وما ألوم راعي الظليمة، لو فرى ثوبه

الظلم، نزّل رفيع الشان، للقاعي

راعي الكرم لوسكن بخيام منصوبة

يكرمك لوكان في وسط العرب راعي

وراعي البخل لو يجامل واضح إسلوبه

الأصل غلاّب، في العادة والأطباعي

قصيدة بالخير متبرّع
الشاعر: محمد بن عمار محمد بن عمار
#العصر الحديث
#المملكة العربية السعودية
0
79 مشاهدة

يا حظ من هو سعى بالخير متبرّع

يرجي الجزاء من إله الخلق والينا

بكفوف مرفوعةٍ، يدعيه متضرّع

لأخواننا بسوريا، واللي بفلسطينا

عسى يلين الذي، بالدّين، متذرّع

طول السنة بالحجج والعذر مشقينا

دام الجشع، شيمته ماهو بمتورّع

عن كل، فعلٍ بغيض، الله ينجّينا

وصارالبخل خصلةٍ بالدم متفرع

وبدّل بدنياه، عقبى الدار، والدّينا

ينام ليله، وهو شبعان، ومتترّع

ويظن، كل البشر، للبطن، مالينا

ماحس باللي، لسّم الفقر متجرّع

ما يسأل أحدٍ؟ يقول الرب، مغنينا

الحال، يرثى لها والثوب متمرّع

والعيد، ما قد فرح به، مدة سنينا

أحد عياله بسيف الجوع متصرّع

يقول رزقي، على اللي معتني فينا

واحد من الهم واللوعات متخرّع

ويقول صبرٍ على ربي،، شكاوينا

من يبذر الخير يلقى الخيرمتزرّع

يحصد جنا مازرع لوهو بعد حينا

ومن يطلب الآخرة يكون متدرّع

بأعماله الصالحة،، عند الموازينا

قصيدة شيخة القصيد
الشاعر: محمد بن عمار محمد بن عمار
#العصر الحديث
#المملكة العربية السعودية
0
79 مشاهدة

أنا لا قلت شيخات القصايد فتنة العشاق

يسوق بداخلي شعرٍ شعوري ينظم أبياته

ونيران المعاني تشتعل في ضامري بإحراق

ويطير النوم من عيني وفكري زايد شتاته

وأشوف الحرف يتهادى وفيني حرّك الأشواق

على روض المشاعر هلّ وبلٍ من سحاباته

يروم القاف في صدري تناهيدٍ من الأعماق

ويبكيه القلم حبرٍ يسطرّ لي معاناته

أعصر الماء من اليابس وأنشّف أخضرالأوراق

على صوتٍ سحب من داخل الوجدان وناته

وأجيبه من شواهيق الغمام بعالي الآفاق

وأسوقه نوّ، لرياض الحشا يسقي نباتاته

وأراعي للنجوم اللي على نور القمر تنساق

تسابق في فضانا، سابحاتٍ مع مداراته

أبا امدح من لها زين المعاني والحكي سبّاق

ولكن القصايد، عاجزاتٍ عن مجازاته

تقود الصيد رعبوبٍ تباهى في أدب وأخلاق

لها بصمات سجّلها الزمن داخل سجلاته

ومعدنها ذهب وأصل الذهب من عادته برّاق

جماله في عيون الناس وسعره في جنيهاته

قصيدة السلامه من الله
الشاعر: محمد بن عمار محمد بن عمار
#العصر الحديث
#المملكة العربية السعودية
0
79 مشاهدة

ألف لا بأس يالدحمي وجعله طهور

أشكر الله على ماجاد به وأحمده

عقب ما كان موتٍ يختلج بالشعور

قدرة الله تجلت، والأجل مدده

جعله آخر مصاب في حياتك يزور

أدعي الله بظهر الغيب لك وأنشده

صارت المصلحة للناس دفتر عبور

واسطتها.! تحل الحبل ما تعقده

بدونها أقرب قريبٍ لك بوصله يبور

وصاحبك عقب ذاك الود لك يجحده

اللي يدفع بتخضع له صعاب الأمور

واللي يمنع بتنزع منه روح ولده

وإلا كل الخلايق موتهم في النحور

والسلامه من الله، والشفاء في يده

لو يدوم العمر، عدة سنين وشهور

القدر واردٍ، مهما الدعاء، يبعده

والدعاء لو دفع بلوى صغار الشرور

فالأجل كاينٍ في حينه وموعده

دام الأقلام رفعت لين يوم النشور

وجف مافي الصحايف والقضاء حدده

فكل إنسان له يوم القيامة حضور

إما شاف التعاسة وإلا شاف سعده

قصيدة منثور الشعر
الشاعر: محمد بن عمار محمد بن عمار
#العصر الحديث
#المملكة العربية السعودية
0
78 مشاهدة

أنا شاعر مشاعر أبدع المنظوم ممالاق

يجيني الحرف إلى حدّي يقدم لي خياراته

أعسف القاف وأبحربه أساير معظم الأذواق

وأروّض نايفات القيل وأفصح عن عباراته

وعشقي مايعرفه غير ربٍ واحدٍ خلاقّ

عليم اللي بقلب العبد في ساعة مناجاته

عنودٍ خدها نوره شبيه الجدول الرقراق

وبين الجمرتين الموت يقدح بإبتساماته

ومنثور الشعر يسبح جديله واصلٍ الساق

ورمش العين إلاسلهم جرح قلبي بطعناته

أنا ماشفت بين الناس من هو في جماله فاق

وليفي بالحسن والزين لو تكثرشبيهاته

تمركز في الحشا وأرسى القواعد في خفا الخفاق

وبيته صار وسط الجوف وقلبفي محاذاته

ضلوعي صارت الأطناب وصدري حولهن رواق

وشوقه والغلا في مهجتي يدعم أساساته

عطيته قلبي الهايم وخذت العهد والميثاق

وعاهدني أمام الله وقدم لي ضماناته

وعاهدته بأمان الله هوانا ينتهي بفراق

إلامنّي نقضت العهد وخنته في موالا

قصيدة حلايا الحووور
الشاعر: محمد بن عمار محمد بن عمار
#العصر الحديث
#المملكة العربية السعودية
0
78 مشاهدة

إرتعي ياحلايا الحور وحرّ الحرير

في شموخٍ يضاهي بك طيور الحرار

وإفرشي لي خمايل، ثوبك المستدير

آتثني معه، إلى إنطوى، واستدار

وإفردي لي جناح الشوق ودي أطير

لاني أول ولا آخرمن تعلى وطار

وداعبيني، بساحة خافقي هالصغير

ساحةٍ قد ملكتيها، وحنا، صغار

وإنثري عطرك، لنسمات نفح العبير

عطرّيني وردّي لروحي الإعتبار

وطيّري لي حمام البال عبر الأثير

كلما نسنس الغربي، لك الشوق ثار

كلما قلت، هذا يالغلا، ما يصير

قال قلبي وش اللي شفت منها؟ وصار

ماهقيتك بحبك، لأحدٍ تستشير

وأنت، لأهل المودة، والهوى مستشار

خابرك، في فنون الحب، فكرك كبير

وخابرٍ الحبيبة، بنت ناسٍ كبار

آية الله، وهبها الحسن شيءٍ كثير

شوفها مغنيٍ، عن شوف ناسٍ كثار

قلت جفنٍ غطاء والجفن الأخر حصير

والمشاعر بجوفي ضارباتٍ حصار

ليتها عن افراقي والهجر تستخير

نجمع الشمل وماقد خاب منهو استخار

فالهوى مهما طال العمرعهده قصير

ومهما طال الزمن عمرالليالي قصار

قصيدة الرجاء واليأس
الشاعر: محمد بن عمار محمد بن عمار
#العصر الحديث
#المملكة العربية السعودية
0
76 مشاهدة

يا ويل قلبٍ، باديٍ به ضياعه

ويا ويل جسمٍ، واقعٍ بين نارين

إحترت أنا والوضع للقلب، لاعه

بحال الفراق ونار هجر المحبين

وعلى الصبر ماعاد لي إستطاعه

روحي وحيلي منه والحال قاضين

سود الليالي، فرّ قتنا،، بساعة

أنحت بنا، وصرنا شتاتٍ بعيدين

وما دمت أنا سالم فهذي الطماعة

وش عاد لوالناس بالوضع دارين

أنا على ماشفت، عندي قناعة

بس البلا، بعض المعارف والأدنين

ذولي من الأصحاب، وذولا جماعة

ما منهم اللي مصلحٍ بيننا البين

ولا نيب أقوله، للفخر والشجاعة

يشهد على ماقلت،، عامٍ وعامين

ثلاثة أعوامٍ مضت، للقطاعة

والرابع أحسب له مضا منه شهرين

بين الرجاء واليأس، قلبي بضاعة

ذولا، يبيعونه وذولاك، شارين

قصيدة المعاناة الشديدة
الشاعر: محمد بن عمار محمد بن عمار
#العصر الحديث
#المملكة العربية السعودية
0
76 مشاهدة

كنت ضيفٍ بالحفل، سارح بأفكارٍ عديدة

أتنقل بالنظر،، والبال، مشغولٍ، بهمّه

واقف لوحدي أهوجس وارمق بنظرة بعيدة

مرة أمدح في الزواج، وعشر مراتٍ أذمّه

اخترق سمعي بكاء طفلٍ على شيءٍ يريده

وانقلب لوني وجسمي من شحوبه جف دمّه

طار قلبي يوم قفاّ،، يمسح الدمعات بإ يده

بعبرةٍ مكتومةٍ، حطت بوسط القلب غمّه

هلتّ دموعي تسابق من على خدي بديدة

واندفعت بلا شعورٍ متجه صوبه، وأخمّه

قلت له لو كان تسمح مطلبك ممكن تعيده

يوم كرر مطلبه مخزون عيني فاض جمّه

إنتهض في داخلي رغم المعاناة الشديدة

باقي إنسانٍ تداعى من جروحٍ مستسمّه

صرت في دنياي هايم عايش أحلامٍ سعيدة

يوم قرّبت أحتفي، بمعانقة وأبكي وألمّه

وانتشيت بريح طيبٍ شب في قلبي وقيدة

يوم جت كفه بكفي والعطر أصبحت أشمّه

قالوا الناس اللي حولي هذي علومٍ جديدة

كل ها للي صار بأسباب الطفل يومك تضمّه

قلت والله الطفل،، عذرٍ تدبّر به، مكيدة

مع بقايا عطرها، اللي عالقٍ بأطراف كمّه

وكان تبغون، الحقيقة،، للمعاناة الأكيدة

فالحقيقة، ماذبحني! غير شمّة ريحة أمّه