فوق هام السحب ( الشعر الشعبي) على متن القوافي

‏مجامل المخطي على فعله خطأ
وفـ المجتمع عـاده نفاق ورديه

يامجامل المخطي ولوطال البطا
لابد مـا تاصلك منه الخطيه

....

أستقبلك كن مالي قبل عرفك طراه
وأستدبر الأرض عنوه والبساط احمدي

سمي دروبي بـ أساميها مضيق ونفاه
وأخذي من الشعر إذعان الرضا واخلدي

محتاج وجهٍ يرجعني أحب الحياة
وأنتِ جميع الحلول الممكنة في يدي

....

احبها صح بس احبها باحترام
حتى من النفس صاينها ما ضريتها

كتبت فيها البيوت اللي بعضها حرام
وانا علي الحرام اني ما مسيّتها

اطهر من الغيث لا وطاه بطن الغمام
وانقى من انقى هناديبي لا غنيتها

....

توصّيني تقول الوصل خلّه في رقبتك دين
ترى الأيام ما تترك رداها وأنت عارفها
ㅤ
وأنا عاهدتها ما أبور فيها دامنا حييّن
لها وجهي لو تبور الولايف في ولايفها
ㅤ
ترى حبٍ يغذّيه المواصل والجناب الزين
حياةٍ ثانيه من ذاق لذّتها يوالفها

....

لو خذيتيني من عيون الأوادم راضي
ولو رميتي قلبي بـ حمل الجفيّا شاله

ماعليك من الدوادي والكلام الفاضي
واحدٍ صبّح على وجهك يسرّك حاله

....

أحـبه محبت من تولـع بحـب الـذود
تدابك خطاويها على صوت صاحبها

وأحـبه محبت شايبن لأخر العنقـود
تمكن غـلا بنـته في قلبه ويلاعبها

وأحبه محبت من ذبحها غلات العود
تلبي على زوله وعلى حس شايبها

....

فديتها اللي عليها لاعني لايع
قلبي لها خف ثقله واختلف طبعه

تشبه ضياع الدليل ودلة الضايع
في وصفها كل الاعجابات منجبعه

ماشفت سبع العجايب لكن الرايع
حصلت لي شي نساني من السبعه

مدري وش اللي مخلي خصرها جايع
واللي تحت خصرها ميت من الشبعه

....

عليك من العتب ليلٍ سمرته كنّ ماله نِدّ
مليته بالسهر كنّك معاي وما أنت قدّامي

توارى فيه مرسول السلام وفي خفاه يعدّ
على روس الأصابع كم بقى من ظالم أيامي

....

يا غناتي والليالي ما والله لها ولا عليها
سامريني في ذراها لين ما يسري قمرها
ㅤㅤㅤ
تشبهين الليله اللي تنتصر الاحباب فيها
لا اكتمل وجه البدر والقاع غطاها مطرها

....

يامايس القد لا تحرمني المستحيل
نار المحبة تعبت آطى على جمرها

انفاسك تداوي وبسمتك من سلسبيل
راضي لو ابيع عمري في رجا خمرها

لك فضل يشملني ويشمل بحور الخليل
يا ملهم الروح ولا يا ولي أمرها

فيك القصايد تجي من حالها والدليل
الأربع بيوت هذي كاتبه عمرها