اخترنا لكم شعر نبطي وفصيح

جعل نار الفراق تكون برد اوسـلام
عقب من فرقته ليله تسواي شــهَر

طـوّل الليل وعيوني على التلجرام
ارقب آخـر ضهور وللأسف ماضـهر

.....

الفرق واضح في صفات الأوادمْ
تَلقىٰ كريم الطبع وتَلقىٰ لئيمَهْ

والبعض مثل الكير حارق وفاحمْ
والبعض مثل الطيب تلقىٰ نَسيمَهْ

والأصل يبقىٰ أصل ما عاش دائمْ
مثل الذهب غالي من القدرِ قيمةْ

واللي ربا في العزِّ بين الأكارمْ
تَلقي فعالُه وسيرتُه مُستقيمةْ

واللي ربا عالبهذله والشتائمْ
ما يمشي إلا بالعصا والشتيمةْ

والتربية مطلوب والنُّصح لازمْ
والترك والإهمال ذاكم جريمةْ

في ناس حاقد من شروره وناقمْ
لو خير جا لك صرت غادي غريمهْ

والخير يَغلب في نُفوس الأكارمْ
والشَّر غالب في النفوس اللئيمةْ

خير البشر يا خوك أهل المَكارمْ
أهل النفوس الراقية والكريمةْ

واهل القبائح خَلق مثل البهائمْ
وعادنا يا خوك ظلمت البهيمةْ

في ناس تبيع الحق ببعض الدراهمْ
ربِّي بلاهم بالنفوس السقيمةْ

وناس لا تُشرى بكُثر الغنائمْ
ترى الشرف والعز أعظم غنيمةْ

وناس على مالُه مُدافع وصارمْ
وان تطلُبه حقك يراها جريمةْ

والبعض يحيا في حياته مُسالمْ
والبعض مَبلي بالفعال الذميمةْ

وناس للإحسان ناكر وهادمْ
يَجزيك بالإحسان بلوى وخيمةْ

تلقى بشر في السلم كالسبع هاجمْ
لكن بوقت الحرب يَترُك حَريمَهْ

والمَرجلة ما هي لمن كان ناقمْ
ولا نخيط كذاب وكِبره عقيمةْ

المَرجلة يا خوك ما هي مَحازمْ
المَرجلة نَخوة وهِمَّة وشيمةْ

والهنجمة يا صاح ما هي بلازمْ
في عصرنا هذا تراها قديمةْ

أحيان عالشيلان تعلو المَقارمْ
تسمو على الأشناب حُرَّة كريمةْ

وقد ترى أنثى على الناس حاكمْ
واكبر مَثل (بلقيس) تلك الحكيمةْ

والحزم بعض الحين يا خوك لازمْ
لكن بغير الحق، بلوى عظيمةْ

واللين في بعض المَواقف مَغانمْ
والبطش في بعض الأماكن هزيمةْ

والودّ لا يَلقاه من كان ظالمْ
يلقاه أصحاب القلوب الرحيمةْ

أعلى البشر في القدر بين العوالمْ
أهل النوايا الطيبة والسليمةْ

والعار يكسو من أباح المَحارمْ
واهل المخازي والصفات الدميمةْ

والدنيا خداعة لمن راح واهمْ
يَربط مع الدنيا صداقة حَميمةْ

والناس لن تبقى على الأرض دائمْ
ما نفس تتخلَّد عليها مُقيمةْ

والموت ما لُه إن أتى من مُقاومْ
كل الحِيَّل إن حلّ تبقى عديمةْ

واللي يَخاف الله ما كان نادمْ
من هاب ربّ العرش لاقىٰ نَعيمهْ

سُبحانك اللهم يا خير راحمْ
شافِ مواجعنا الثقال الأليمةْ

.....

صلو على المصطفى يا كل متغني
ومن يصلي على الهادي صلح شانه

الطير والنجم صلت والشجر تجني
وكل مخلوق صلى حسب سلطانه

صل الله عليه وسلم