فوق هام السحب ( الشعر الشعبي) على متن القوافي

‏طلبت انا من صحتي الف صحه
لجل الحبيب اهديه مني العوافي

لاجاه من شر الزمان شي جرحه
ياليت هـو فيني وهو ضل شافي

....

‏اسمـع لقولـي واسمـع اخر علومي
يا نسمتي يا راحتـــي يا ضنيني

في ساعة الضيقه وساعة ضلومي
اتذكــرك وانسـى اســاي وانيني

....

‏ذبحني غيابــك يامـن الروح لك بيت
والقلــب فاقــد لك من اعماق ذاته

بكيـــت مـن بُعـــدك عليـا وونيت
ونت مصــاب اليـآس دمـــر حياته

في كـل لحظـــه لاذكرتــك ووليت
اصيــح لك من قلـب واضح شتاته

فيك الامـل ياللي في القلب حليت
وانت السلا للقلـــب وانت امنياته

....

‏يا فاتني قلبي تمنــــى ملاقاك
مشتـاق لك بالحيل ودي اشوفك

يا كـم سهــرت الليـل وانا تمناك
ودي بضـم ايدك وضمة كفوفك

قلبي غدا في نار من عُقب فرقاك
والعقــل متلهف يعانـق طيوفك

والروح مشتـاقــه لطلـه محياك
والعيـــن ولهانــه تمنى تشوفك

....

‏ياعين نامـي مابقــى لك من الليل
لاتحتريــن اللي مـن الخلق ناموا

اظن مالك من وراهــم محاصيل
ولا ظنتي حســوا بشوقك وقاموا

ياشوق والله مابقـى داخلي حيل
من السهر واصــل عيوني تعاموا

....

‏مـر الزمـان وراح عمـري ودهـري
وانا علـى وعدي ولا حيل او ميل

زادت جروحي واكتفى نار صبري
والدمع سالت من عيوني كما السيل

....

انت الذي قلت والله لو سماي امطرت
وتلاطم البحر بامطار السـحاب الثقال

ماحب غـــــيرك ولا الفرقا ببالي طرت
اما معك أنت ولا قبــــــر تحت الرمال

واليــوم يا للأســـــف اقوالك اتبخرت
وصرت عايش بعيد وصرت مرتاح بال

اما انا والقـــــسم لليـــوم ما اتغـــيرت
مشاعري نحـوكم لو طال فيها المطـال

....

سجت بي الذكري مع تالي الليل
اقلب الصفحات في ما مضى لي

طلعت باستنتاج بعد التحاليل
وامنت بالمكتوب فيما جرالي

....

من لا يبادلك التحيه والسلام
ما انته بملزم بالصله دايم معه

لاصار طيب له مكانه واحترام
حاول تخلي بينك وبينه سعه

بقلمي

‏ياليت عنـدي قلـــب ماعنـده احساس
من شان اطنـش من جرحنـــي غروره

واتجاهل اللـي شاف حاله من الناس
واصـد وجهـي واقهــــره في حضوره

بس انخلق لي قلـب طيب وحساس
فيه الوفــاء والطيـب ساكـن شعوره

مااحب اجرح من جرحني من الناس
ولا احب اعاتب مـن وصلني قصوره

....