فوق هام السحب ( الشعر الشعبي) على متن القوافي

ليت الخبر ما كان في ليلة السبت
ويوم الاحد ما كان يوم الوداعي

عز الله اني يا هوى البال شيبت
قلبي من الفرقا عليكم يلاعي

لوعة هبوبٍ يا صفق ناعم النبت
من لوعته يبست زهور المراعي


لافي الهمزاني الشمري

يا جاهل الدنيا بحالك تدرا
تراه ما غير انت والله بحالك

ياطحت منك اقرب قريب يتبرأ
لو ينظرك بالنار ماجا وشالك

يالعبد دار وللملا لا تحراء
ابوك ما ينفع وعمك وخالك


لافي الهمزاني الشمري

يقول من مرت عليه التجاريب
ميّز سلوم الباديه وأهل الأسواق

شاف السعاده والاسى والاصاعيب
وشارك جميع أهل المشاهي بالاذواق

حلو النبا والطيب شيخ المواجيب
وعند الولي علم الخفايا والارزاق

ولولا الفعل ما يعرف البس والذيب
والفرق واضح في نباتات الاوراق

وعز الفتى لو فوق نار اللواهيب
اخير من منات عفنين الاعماق


لافي الهمزاني الشمري

يبكي على ماضي زمانه وجيله
يحن يبي ايامه الماضياتي

تقل له الدنيا حياةٍ طويله
ما يعلم انه للفنى والمماتي

لابد من يومٍ سريعٍ رحيله
لو طال عمره خاتمته الفواتي


لافي الهمزاني الشمري

اروح للطيب اليا احتجت حاجه
واجنب اهل التفرقه والنقيلي

وعندي ردي الناس مثل الدجاجه
والا الدجاجه من وراها حصيلي

والقرم يا جيته لحاجه يواجه
والا ردي النفس دايم ذليلي


لافي الهمزاني الشمري

كلٍ تصاريفه على قد عرفه
لاتشمتون بذا ولا ذا ولا ذا

هذاك في حرفه وهذا بحرفه
كلٍ له اسمه والطبايع شذاذا

طيب ومتوسط ودونه وكرفه
وكلٍ يشوف بسير طبعه شذاذا

هذاك في فندق وهذا بغرفه
وهذاك ما له في حياته ملاذا

يا ناس خلو كل خطٍ بزرفه
أعوذ بالله عنكم بالمعاذا

ما للفتى عن صرفة الله صرفه
لو مالحفيظ الله صرتوا بذاذا


لافي الهمزاني الشمري

العلم ميدان المكاسب والأرباح
والجهل ميدان الهزل والقباحه

العلم أمان الحي للعالم سلاح
والجهل هو بيت الخزاء والوقاحه

والجهل سرابٍ على قاع صحصاح
والعلم ساسٍ للعلا والسماحه


لافي الهمزاني الشمري

وحنا رجال معنويات عزمنا
مثل الجبال الراسية فوق بيدها

حنا جنود الأمن نومن بديننا
ياغرت النفس الدنية بليدها

عاداتنا وقت اللوازم نشرف
عدواننا يهاجمونا نبيدها

ولا فرق بين الأمن والجيش والحرس
سور الجزيرة من عدوٍ يريدها


لافي الهمزاني الشمري

‏يالله برزقٍ على غفله من الحسّاد
‏مدة كريمٍ تجود الناس من جوده

‏رزقٍ يجي دون تخطيطٍ ولاميعاد
‏دعوة مصلي دعاها لحظة سجوده

....

اشهد ان الله عطا وجهك قبول
كل ما اشوفه اشـوف العافيه

جيتك وصدري من اللهفه يقول
ممتلي شـوق ومشاعر دافيه

انت حتى الشعر في وصفك خجول
وكل كلمه في سمـوك وافيه

نصف ساعه فاهي بوجهك واقول
اشهد ان وجهك يجيب العافيه

....