اخترنا لكم شعر نبطي وفصيح

في يومها الأول بدت مثل الخطوط الباهته
في لوحة الدنيا .. ولا هي ظلها ولا ضوها

وفي يومها الثاني بدا المجهول ينفض وحشته
سحب تكاثف وانحدار السيل يعلن جوها

وفي يومها الثالث تصدى للشعور ودقته
واصبحت اشوف اروع مزايا حسنها في سوها

وفي يومها الرابع بدا المغمور ياخذ فرصته
ما خلت احساس غريب ماحكته وتوها

وفي يومها الخامس وهذا اليوم يا.. يالهفته
فلت شراعاته وبعد شوي قالت طوها

.....

أنالي حبيبٍ إذا ماجبت به طاري
عنه فؤادي سألني إيش سّوا لك

أغليه أناحيل ليته بالغلا داري
واحبه أناحب مايخطر على بالك

مابعته أبداً لأني دوم له شاري
وش لون أبيعه وهو لِفؤادي المالك

هذا وله فوق حبي كل إصراري
على الوفاء دايماً واقسم على ذلك

ياعاذلي ويش لك تترقب أخباري
تموت مهموم أحسن روح في حالك

مافيه مصلوح لك من كشف أسراري
حتى ولو كان بعض الحكي يحلا لك

أنا مفوض أموري دوم للباري
وكيلي الله وحده مالي ومالك

أدري خساره حروفي فيك واشعاري
بس ودي أفضحك وافضح خيبة أعمالك

.....

شكى قلبي من عنادك وطُول الصد والهجران
وياليتك شعرت بْلوعة أشواقي وإحساسي

كذا تبعد وتتركني متيم في الهوى ولهان
كذا تقسى علي وتغيب عنّي يابعد ناسي

رسول الشوق نادى لك حبيبي لاتصم الآذان
ابي تسمع صدى صوتي وتقتل بالأمل يأسي

ابي لطفك يرافقني دواما مو بعض الاحيان
أبي أرفع حبيبي فيك مابين الملا رأسي

رسمتك لوحةٍ في خافقي تزهى بك الألوان
كتبتك لين مل من لون حبري وجه قرطاسي

يعين الله كم هي صعبة الفرقا على الإنسان
يعيش العمر في حسرة كبيرة دوم ويقاسي

ملكت الروح ياخلي وعشت بْداخل الوجدان
لك الله صرت لي أقرب الي نفسي من أنفاسي

يمر الوقت لكن لا طريقة لي الى النسيان
نسيت أنساك لا تعجب لاني أذكرك ناسي

هويتك والهوى ما يرتوي من نبعه العطشان
شربت إمن الوله لين أشتكى من شفقتي كاسي

.....