فوق هام السحب ( الشعر الشعبي) على متن القوافي

لاصكت الناس بيبان العمل والدوام
بيبان عفوك ياربي مايصكونها

‏نعوذبك من عذابك والبرص والجذام
‏وجرثومةٍ ماتراها الناس بعيونها

خلت عقول الاطباء مدعين العلام
‏مذهولةٍ كل طبٍ مايجي دونها

انت العظيم القوي محيي هشيم العظام
بطشك يهدالجبال ويسقط ركونها

بامرك يزول الوباء ويحل فينا السلام
رحمتك يارب كل الخلق يرجونها

....

يشوف الغلا بعيونك الناعسات الحور
مثل من يشوف الموت بعيون ذباحه

يبين لك انه هادي وخاطره مسرور
وهو والله انّه يزعجه صوت مسباحه

شجاع حذف لك بندقه والرصاص يثور
ولا تذبحينه عقب ماسلم سلاحه

....

مابقى عندي لياقة لـ تفسير الكلام
السوالف معك ماهيب بيت محاوره

سولف بكل اريحيه ولذه وانسجام
مثل حكي الشايب المنصح لمن شاوره

....

‏وش فيك تزهد بي وتلحقني الياس
‏قلبٍ مثل قلبي ماظنّيت تاجد

‏معطيك شيٍ ما انعطى لأغلب الناس
‏أنا سلامي لأغلب الناس واحد

....

ماودي افتح مع العالم ملفاتي
ولاني من اللي يدوّر عندهم خِله

أنا على نيتي وامشي بنيّـاتي
ولاني بمجبور اجيب اللغز مع حله

خليت لفظ المحبّه من حساباتي
إلا محبة الي احبه لوجه الله

ماهمني ساعة الفرقى متى تاتي
مادام عندي قناعة تبري العله

....

ياللي تعلمني على النحو والصرف
ماعلموك شلون جبر الخواطر

عطني حروف الجر واختار لك حرف
خابرك في جر المعاليق شاطر

....

كان المسافة ترفض اني اشوفك
خل اتصالك غصب عنها يجيني

وكان اتصالك يمنعنه ظروفك
تكفي الرسايل شوق بينك وبيني

وان كان مالي حظ حتى بحروفك
خلك بعيد ومسكنك وسط عيني

....

رسالتي لك....

وضعفت علاقتهما
ليس بسبب مشاجرة
أو موقف عنيف
إنما بسبب حالة
من الإهمال التدريجي

الطرف الأول
وثق بتواجده الدائم فأهمله

والآخر لايتحمل
أن يكون هامش
بعد أن كان قريب
‏تذكروا أن ماينتهي ببطء
لايعود أبدا بسهوله

بقلمي

‏الرفيق اللي يسّر العين وينومس رفيقه
نشتريه ونشتري عرفه وحنا الرابحين

بقلمي

الله اكبر يوم ميّل عودها واكبر ظلاله
وانثنت يمّي وغطى جيدها الاتلع شعرها

احسب انها ميّلت يمّي غلا ولا جمالة
مادريت ان غصنها المسكين يتعب من ثمرها

....