اخترنا لكم شعر نبطي وفصيح

اروى وانا جرحي ثمل طين وتراب
قاع ٍ خطب ود الغيوم ونفاها

اروى وتكسر ضحكتي دمعة اسباب
وكم فرحة بعت بكدرها صفاها

تبعثرت في ذاكرة صيف كذاب
ادركت باديها ولذت بجفاها

كلي رجا ومنادمة ليل وعتاب
وجروح تركض عكس نقطة شفاها

اغمّض عيوني على برد الاهداب
واتذكر احضان امنحتني دفاها

والليل درويش ٍ حمل رفض الابواب
خبل ٍ شرب زيت الشموع وطفاها

وانا على جال السهر ظل وكتاب
احاول استرجع لاولى جفاها

.....

‏سبحان من يعطي قبول المخاليق
‏ وسبحان من يفرق عطا عبد عن عبد

‏ بعض الأوادم شوفها يجلي الضيق
‏ وبعض الأوادم شوفها يلوع الكبد

.....

تغانموا فعل الجمايل مع الناس
‏الناس صعبات الظروف اجرحتها

‏فعل الوفاء والخير فالناس نوماس
‏الطيب فوق الأرض ماهو تحتها

.....

‏إما تجي حكمة وتغلب على الصّمت
‏والا إلتِزم بالصمت والصمت حكمة

‏سعد بن جدلان رحمه الله

مد كفِّك للسلام ومد كفِّك للوداع
لا تبالغ بالتمسّك تنجرح قلب ويدين

.....

يا ساحة الشعر والشعّار والساحه
وش حيلة اللي جمال الكون في شَفّه

بعض القلوب الرهينه جات مرتاحه
لكن فؤادي من اللي واقف بصفّه

حسبي على اللي أخذ قلبي ومفتاحه
وعرق الهوى في ضميري لفّه بلفّه

أبو عيونٍ كحيله .. سود .. ذبّاحه
وغمازتينه دمارٍ تغزو الشفه

وليلٍ تحدّر ياكنّه لفّة وشاحه
ورموش عينه غرامٍ جات مصطفه

والخصر ياكثر ماني شايف لحاحه
على الردايف يقول بليز يالعفه

ما كنّه الا زجاجة عطر فوّاحه
زيِنه بكفه وزين الناس في كفه

عزّاه ياهب نفح الشرق ورياحه
ولبيه لامن وصلني من كذا هفه

.....

العاذل اللي يدوّر عثرة دروبي
ما يدري انّي عنيدٍ بايعٍ فادي

ياما طلبت وجاني عكس مطلوبي
يا ما خذلني رفيق وقلت له عادي

أحدٍ رجمْني بغيبٍ والتفت صوبي
أقبل يكيل المديح ويطلب ودادي

واحدٍ طلبني وعطيته يافهد ثوبي
لا ما هقيته يصير الدّ حسّادي

طيّب وصار الطيب عوقي وعذروبي
أشْره على النوق والا اشره على الحادي

استغفر الله عسى الله يغفر ذنوبي
مايغفر الذنب غير الواحد الهادي

مع كل شمسٍ جديده تشرق عيوبي
طالت دروب الخطايا وين انا غادي

علّم الريح تصهل واستثار الغمام
وعلّم الغصن الأرعن ينحني للنسيم

علّم الشمس تشرق من هديل الحمام
وعلّم الليل يضحك عقب ما هو كظيم

وعلم الحرب تخجل من رصيف السلام
والمشاعل تعيّي لا تشب الهشيم

أه يا ليت شعري ويش يفيد الكلام
الليالي غدت لي تقل خصم وخصيم

.....

اسرجت خيلي وامتلت روحي اصرار
هذا وانا اوّل عاشقٍ يشعل النار

ماجيتك اشكي غربة الاهل والدار
ولاجيت افلسف بالحكي بعض الافكار

انا خوي اللي يبي يآخذ الثار
وانا اليقين اللي به الشك يحتار

قلبي وطن للحب وظلوعي اوتار
إنْ جيت ريحٍ قابلك منّي اعصار

.....

كان الوفا نجر وفناجيل ودلال
يابوي انا مبطي مبهر دلالي

صبيتها للناس فنجال فنجال
ماهمني يقضون والا قبالي

ماعزني عمٍ ولاعزني خال
أنا الذي باعز عمي وخالي

ورّتني الدنيا خفيفات وثقال
الله يجيرك شفت غبن الليالي

أهْدتني الفرقا وانا طالب وصال
ماقدّرت يابوي صرخة سؤالي

يوم انّي اكتب ماخطر لي على بال
إنّ القصيد اعزّ واغلى عيالي

اكتب ويسري في المخاليق موّال
اكتب وتصهل مهرةٍ في خيالي

يابوي لاتجزع على كل الاحوال
ما تلحقك شمسٍ وانا لك ظلالي

ان قالها الله غير ابرهن بالافعال
ومافاتني أوّل أجيبه بتالي

.....