اخترنا لكم شعر نبطي وفصيح

كَأَنَّها إِذ خُضِبَت حِنّا وَدَم
وَالحُرُضُ العن وَالهَرمُ العُصُمْ

.....

على الوعد طال انتظارى هنيّا
وان جيت ابمشى شفت مانى بقالي

اصفق بكفينى واقلّب يديّا
حيره وتاخذنى خروص وهقاوي

واقول يمكن "ياجميل المحيا"
نسيتنى والا على الصد ناوي

راعى غنم ومعلقه بالثريا
روحى وقلبى للسحايب هواوي

تصلانى اشواقى واجيك اتفيّا
عنها بظلك وانت عنى نحاوي

فديت منّك أى شى ايتهيّا
عليه أعلّق غايتى والرجاوي

بس لاتخلينى أمانه كذيّا
على جمر طول انتظارك خلاوي

.....

أحلى تيراميسو على كوفى لاتيه
وانتى على بالى تزيدى حلاته

توى أذوق من الزمن طعم حاليه
معاك يا أحلى وأجمل بناته

ياكن هالمقهى وانا أستحضرك فيه
تغيب ناسه من على طاولاته

ألقاك حولى تجلسين بكراسيه
هنا وهنا وهناك وبكل جهاته

يلوح وجهك المحه عدة وجيه
فى وجه واحد تجتمع بالتفاته

آخذ قلم أرسمه أسرح أراعيه
ألقاه مثلى غارقن فى سكاته

.....

صباح النوايا الصافيه والقلوب البيض
وصباح الفرح والشوق والحب والطيبه

قضى يوم من عمرك وبدا يوم للتعويض
تجنب به اعراض المخاليق والغيبه

.....

‏أحدن يجي وأن راح محدً درى فيه
يعني حضوره و العدم شي واحد

و أحدن حضوره غير وان غاب ندعيه
واحد و يسوى بالعرب ألـف واحد

.....

انشوفها عوجا ونترك عوجها
تكرم لحانا عن هروج الرديين

وان كان نقال النمايم هرجها
انصد ما كنا عن الهرج دارين

.....

‏صباح الرضاء والحمد والذكر والتسبيح
صباح النفوس السامية والجناب الزين

أوصّل تحياتي مع كل نسمة ريح
عسى الله يجمّلنا ونوفي مع الوافين

عبدالله أبو عيون

‏أحلامنا طارت سما كنها ريش
نشأ السحاب وفرّق الريح شمله

أثر الزمن دوار وأيامنا طيش
ومصادم الأيام تحتاج صمله

الطير يأكل نملة الأرض ويعيش
وإن مات لحم الطير تأكلة نمله

رايد بن هلال

‏نعيــــش ونقــــاوم زمنــــا وما فيه
ونمشي ولا نشكــي لحــــد ما كتمنا

نكفــــن اوجاع الجـــوارح ونخفيه
ولا نبــــدي اللي فـي الحشايا دفنا

نضحك بوجه الناس والفرح نبديه
ونحاول اسعـد البشــر غصب عنا

ونصنع سعاده تحـرق اللي نعاديه
ونحفـــظ كرامتنا ونحفــظ قيمنا

.....

‏ليت الوجـع ما جاء على يد الاحباب
جرح الحبايب صعب نوصف علاجه

لو هو غريب الناس مابحسب احساب
امـا قريــــــــب الناس يا الله خراجه

جرح الحبايب داخــل الصدر ماطاب
اوجاع تفـــــرق عـن وجع كل حاجه

تبقــى معـي طول العمـر جرح لهاب
واكسار قلبــي مثل كســـر الزجاجه

.....