فوق هام السحب ( الشعر الشعبي) على متن القوافي

‏يطيح واقف راعي الطيب لو طاح
طيبه رصيده فالشدايد يشيله

يموت راع الطيب والطيب ماراح
يبقى مع الأجيال لو راح جيله

....

‏التوفيق الحقيقي....
أن تتوكّل على الله
بكلّ جوارحك
وتؤمن بقدرة الله الكاملة
على تصريف أمورك
وفق رحمته ولطفه ومعيّته

بقلمي

أنت حبك مرتبط في حب ذاتي
أعمق من إعجاب وأصدق من موده

أنت تسع أعشار مجموع أمنياتي
أمنياتي الماضيه والمستجده

أنت صوتي وابتساميّ والتفاتي
للحنين الليّ ماوقف عند حدّه

أنت مستقبل جديد لذكرياتي
والوحيد الليّ عجزت أكون ضده

....

لولا ظروف الوقت ماقيل لابأس
ولولا الأمل ما يبتسم فالزمن حي

الله خلق هالناس تحتاج للناس
لاتبخل إليا صرت تقدر على شي

....

‏ياقلبي لاتفضح مشاعر البوح
خل الغلا مستور بينك وبيني
⠀⠀
اغليه من قلبي ولا ودي ابوح
ليت المشاعر حكمها في يديني

....

‏سألت سود الليالي واين ضاو الـقـمـر
قالت لي اطرح سؤالك للسماء والنجوم

قلت اطرحه كيف قالت ياقليل البصر
استعلم الجار عن جاره تحصل علوم

قلت المسافة بعيدة رغم بعد النظر
وانـا ونـور الكواكب والـثـريـا خصوم

حتى سهيل اليماني لـو طلبته خـبـر
عن الذي غاب حملني جميع الهموم

قالت وانا وايش دخلي غاب والا حضر
قلت الخبر مـن جهاتك والإجابة لـزوم

فقالت الصبح يصبح خير لاجـاك شـر
قلنا قد الصبح مثل الليل ظالم غشوم

قالت لي ايش ذي تدور قلت دفع الضرر
قالت لي افضل وسيلة للـدفـاع الهجوم


....

الحسد والحقد ماهو من صفاتي
لو بنوا لابليس في الفردوس دار

وان تراني نلت من كيده كفاتي
ذاك مابيني وما بينه جدار

موقعي ثابت وانا مؤمن بذاتي
نجم عزي ماتغير له مدار

ياحكاياتي خذي مني وهاتي
ارتفاع البعض في الدنيا انحدار

....

‏المحبه ثلاث ارباعها اهتمام
‏وانت لاجيتني ماهمك إلا تروح

‏المحبه بدايتها نقيض الختام
‏أولتها هدايا وآخرتها جروح

....

‏يحن قلبي للحبايب ويشتاق
‏والشوق يرسم طيفهم في منامي

‏لو يعرف المحبوب قدره بالأعماق
‏مايبتعد عن وصل خله ثواني

....

‏ياوجودي كل ما هبّ نسناس الشمال
‏وجد من حدّه زمانه على اللي مايبيه

‏ياوجودي كلما اضحيت ثم مال الظلال
‏لاغفت عيني ولاذقت شييٍ مشتهيه

‏وجد من قفّى و هْو في رجا كلمة تعال
‏وإلتفت من عقب ماقفى ولا أحد ٍلدّ فيه

ضيدان بن قضعان