فوق هام السحب ( الشعر الشعبي) على متن القوافي

أحذر تجامل كلمة الحق قلها
ولا خير باللي عادته يخفي النور

ترى الخطيه خاسرن من فعلها
ولا بيض الله وجه من يشهد الزور

ناسٍ تشوف الطيبه في عملها
تلقى لها فعلٍ به الخير مذكور

وناسٍ بها تقصير ماكثر جهلها
ماتسمع الناصح ولا تقبل الشور

....

الرزق مايوخذ بحيله وقوه
الرزق ياتي من ولي المخاليق

واللي أمرك مدبر الكون سوه
بذل السبب والله عليه التوافيق

....

‏رسالتي لك....

امدح من يستحق
واشكر من أسدى إليك معروفاً
وقل خيراً للجميع
فبعضهم يستمد سعادته من كلماتك
ويصنع منها تفاؤله

بقلمي

‏المرايا تعكس اشكال الوجيه
‏والتعامل يعكس اخلاق الرجال

‏والكرم أما يجـي والا نجيه
‏واحترام الناس من زين الخصال

‏والزعل والضيق ماهو شي وجيه
‏واجتناب الهرج اذا فيها مجال

‏ياالله ياللي كل واحد يرتجيه
‏تهدي ارباب الدعاوي والجدال

....

يامحسن الظن لاتندم على طيبك
‏طيب النوايا فضيلة لاتخليها

‏واصبر وصابر وخل اجرك على ربك
‏عالطيب يجزيك أجور ماتخيلها

بقلمي

‏الجمايل باقية طول الأبد
والوفاءلأهل الوفاءطول السنين

والنقاء والطيب ماهو ملك حد
غير أصحاب النقاء والطيبين

....

ي ملهمة شاعر مصوب بسهمك
ودي ولو لحظات في عمري القاك

متى يزين الوقت واعيش يمك
وامسك يميني يالحبيبه بيمناك

يازينه اسلوبك ومنطوق فمك
اللي تملك وامتلك قلب مضناك

رقيقة الاحساس والحب نجمك
والذوق منك والحلا في محياك

ياورد لافاح في البساتين شمك
يعطر اجوائي بريحان طرواك

ملكة جمال الكون ي مهجة امك
ميزك ربي بين خلقه وحلاك

....

‏نخفي شعور الحب والقلب مشتاق
‏لوينكشف بوح الحب يصبح جريمه

‏مثل الشجر رغم التباعد بالأوراق
‏تبقى جذوره بالتواصل عظيمه

....

‏ياصمت حكمك بعض الأحيان قاسي
‏حرام تمنعني عن البوح ياصمت

‏كم جتني الفرصه عدد شعر راسي
‏ويا للأسف فاتت علي ماتكلمت

....

على ما قال
سعد بن جدلان رحمه الله

اما تجي حكمة تغلب على الصمت
‏ولا التزم بالصمت والصمت حكمه