ديوان قصائد لشعراء المملكة العربية السعودية (متجدد)☘️☘️

قصيدة هذا الوطن
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
416 مشاهدة

..
لله ربي جزيل الحمد والمنّه العادل القادر المتكبّر الرحمن
اللي عطى في كتابه رزقه وأمنه لبلاد مكّه وطيبه أطهر الأوطان
سبحانه أرسل رسول لإنسه وجنّه باليسر والمغفره والرفق والإحسان
ماكان فظٍ غليظ القلب لو إنه من حوله انفض جَمْع وزُعْزِع الإيمان
يالله صلّي على احمد ما هَمَت مِزْنه وما هَلّت دموع طفل وما تُلي قرآن
خُلقه عظيم ف كتابك قلت ذا عنّه رحيم فينا رؤوف اكرَم بَشَر قد كان
ياحافظ كتاب ربّك دارس السنّه البِر واضح وضوح الإثم والعدوان
عَلِّم كثير المجادَل تابعٍ ظنّه لا روس حنّا غدينا وْلا هم الأفغان
لبلادك المسلمين نفوس ممتنّه لبلادك الكافرين اتمنّوا الخذلان
للإسئله في الشوارع شَنّه ورَنّه وش وصّل الناس ذولا فوهة البركان
وشلون ينهي حياته في صُغُر سِنّه؟ وشلون هذي المراحل توصَل الإنسان؟
إن كان ماهو فراغٍ.. يأس يمكنّه ماهي حكاية تديّن.. ما لهذا شان
أو هي حكاية فوارق دنيا منجَنّه دكتور عاطل.. ويُثرى لاعب وفنان
أو هي حكاية عدوٍّ زاد في زَنّه لين المسامع تعبّت كره.. واستهجان
أو هي حكاية شفايف في الخفا دَرْنَه تلْعن صنيع الأيادي.. تبوس في الكتمان
هذا الوطن ياما رمينا همّنا بحضنه يستاهل أنه يفتدى بالروح والأبدان
هذا الوطن هو روح فهد وماحوى جفنه هوقلب عبدالله ونبضه هو وله سلطان
عيال أخو نورة ذراه ودرعه وحصنه هم سدرة المُلك وأهل المملكة أغصان
هذا الوطن شعبه من ملوكه وهم منّه متماسكين بصف واحد مثلما البنيان
هذا الوطن أكرم بلاد الأرض لكنه يبقى هلاك للمعتدى والباغي الخوان
لا مايهزّه حقد حاقد زاد في زنّه حافظه رب المشرقين الواحد المنان
هنّ الوطن برجال أمّنه يا فهد هنّه يستاهلون المجد كله صفوة الشجعان
المؤمنين الذايدين بروحهم عنّه أفعالهم مايحتويها نوط أو نيشان
ياللي تكفّر كثير الخلق.. بك جِنّه كل هالخلايق مضلّه؟.. وش معك برهان؟!
كل هالأمم في جهنّم..كافره عَفْنَه؟ وانت الذي مسك دمّك ضامن الرضوان..؟!
جنّه بعرض السما والأرض مِنْضَمْنَه هي حِكر لك مع رِفاقك زمرة الأعوان؟!
يالله إقطع ذيول الشر والفتنه ورُدّ كيد الأعادي فْنَحْرهم خسران
واكفِ البلاد التقيّه شرذمَه.. حِفنه ساروا بدرب الضَلال ولبّوا الشيطان
فجِّر ودمِّر بلادك.. تدخل الجنّه أفتى بهذا مشايخ آخر الأزمان!!!!

قصيدة رحل
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
370 مشاهدة

..
رحل اشتاق لجراحه
رحل
اشتاق لجراحي... رحل
يحق له طيبتي ماتحتمل
قليلة في وقت الهموم
ما كنت اعاتب أو ألوم
يحق له ما يحتمل.. هذا الملل
اسدلت أيامي لعناده
حبيته في قربه.. وبعاده
متعبه هذي السعادة
رحل اشتاق لجراحه
رحل

قصيدة اسألوا دمي
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
361 مشاهدة

..
اسألوا دمي.. وسعادتي وهمي
اسألوا التوفيق..
والكدر والضيق
اسألوا الطيب في صفاتي..
والدعاء اللي في صلاتي
واسألوا شهودي..
الدموع اللي في سجودي
اسألوهم.. واسألوا دمي..
عن غلا أمي

قصيدة لي صاحب
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
336 مشاهدة

..
لي صاحبٍ مرة وأنا جالس معه
كان في بالي بداية فكرة لمطلع قصيدة
وكنت أحاول قد ماقدر.. شتات فكري أجمعه
أتذكر أنه قاللي في وقتها.. رغم اني ما كنت اسمعه
هالدنيا ذي مافيها شي مبهج
كل شي ممل.. أيامنا مثل الجرايد..
كلها سواسيه
أتذكر اني وقتها تمتمت وقلت.. دونما تركيز
فعلا.. معاك حق.. هذي حقيقة قاسية
أتذكر انه قاللي.. رغم اني ماكنت اسمعه
حبيبتي مادري قست.. والا نست
أو انها متناسيه
أتذكر اني قلت له.. أيضا دونما تركيز
فعلا.. أكيد.. معاك حق.. فعلا ظروفك قاسية
أتذكر أنه قاللي وقاللي وقاللي
لين الشعر فيني تلاشى.. وقتها صرت اسمعه
كان يتأملني ويقول:
ليه الفرح دايم لأيامي يتحاشى
تبغوا الخلاصة القاسية؟
صاحبي في يومها كم كان مزعج.. حيل مزعج
مثلما رنين الهاتف الجوال.. وسط هذي الأمسية

قصيدة سفير الحزن
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
312 مشاهدة

..
غريب..
ماقلتلك..
من هو..؟
تبي تعرف..
هو اللي.. لو خذلك الحب
وبان الشوق..
في عينيك..
وعجزت إنك..،،
تداري حزنك وهمك..
واختفت..
من ليلتك..،،
كل الأماني..
وماشفت الصبر كافي..
تلاقي دمعتك عنده..
يعيش أحزانك بصوته..
ويغني جرحك الخافي..
ولو تبغى الشجن عنده..
ولو تبغى الفرح..؟
قليل من الحزن عنده..
ولو ناديت
وعذبك بعض النداء..
بصوته عنك ينادي..
عرفته؟!
سفير الحزن في الدنيا..!!
عبادي....

قصيدة اسأل الأعمى
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
301 مشاهدة

..
اسأل الأعمي.. ان كان في نومه يشوف
ليه يصحى؟!
واسأل اللي ما درت عنه الهموم
اللي درى ان العمر محدود
وان الفرح مهما اختفي.. موجود
اسأله ليه ينوم؟
وان جاوبوك اسألني ليه حنّا افترقنا
يا صاحبي مابه سبب لفراقنا
غير اننا جينا بزمن ماهو زمنا
ياصاحبي مابه سبب لفراقنا
غير اننا في حبنا عشنا الصدق
وفي وقتنا وشهو الصدق
في وقتنا لجل اللقاء تكذب
ولجل تاصل ماتبي تكذب
ياصاحبي خذها من جرحي نصيحه
كانك تبي تاصل؟ اكذب.. اكذب.. اكذب
الصدق في وقتنا اصبح فضيحه
في وقتنا دايم تهيم في شي ماتعرف مداه
دايم تهيم فلي بعد عن سكتك
واللي زهد في محبتك
واللي ف يدك ومتحمل جروحك معك
ما يهمك تنساه
ولو تقتله ما يؤلمك وبقدامك تاطاء على دماه
يا صاحبي وقتنا في اوله ضيّعنا أولى القبلتين
وفي آخرة الله اعلم وش بيبقي
في وقتنا صار الغدر شيٍ عظيم
والوفا ماظنتي ان كان بتدور بتلقى
يا صاحبي في وقتنا أطول مسافة ممكنه
تمشيها بين النقطتين
الخط المستقيم
يا صاحبي في وقتنا وقت الألم
من يسمعك مهما حكيت
من ينصفك مهما شكيت
منهو اللي ما يضحك إذا ذلتك دنياك وبكيت
يا صاحبي في وقتنا
ما للمشاعر ناس
يا صاحبي في وقتنا لبعض القلوب إحساس
يا صاحبي في وقتنا وقت الكلام
وقل الفعل.. لامات احد وانتقل لعلى رفيق
من طيبنا نحزن عليه
نصلي عليه
ناصل معه للمقبرة
وفي المقبرة غير الدعاء وقولت الله يرحمه
مابه كلام.. وندفنه.. ولا دفناه نبكي
بدون دموع أو بدموع
المهم بعد ما نبكي نتركه ونروح
وتلقانا نقول مسكين يا فلان مسكين
من دنيتك وش اللي خذيت؟
وبعد باب المقبرة بشبرين
واقل من الدقيقة لامن دخل فينا الزحام
من طيبنا نضحك ونسمع أغنية
لجل نتسلى في الطريق بين المقبرة والبيت
يا ربي سبحانك ياللي تجير من العذاب
قلوبنا وش صابها؟
في وقت غدا بين الحياة والموت
وبين البكاء والضحك
شبرين ودقيقه وباب
ويدننا اللي قد حثت في وجه ميتنا التراب
هي نفسها اللى بعد شبرين واقل من الدقيقة
اختارت شريط وحطته لجل تقتل طول المسافة
بين المقبرة والبيت
يا صاحبي في وقتنا احسن كثير
من بعضنا
في المقبره على الاقل ميت وندري
المشكلة متنا وإلى الحين ماندري
يا صاحبي في وقتنا ضاع احترام الموت
في وقتنا حكينا ما أكثره
وللأسف كل الحكي من غير صوت
وان كان به فمٍ صدق
واسمحوا يحكي بصوت.. ما نسمعه
ياصاحبي قدامنا كان اختيارين
يا نجاري وقتنا ونكذب ونخدع نفسنا
يا نفترق.. لان الفراق في وقتنا
هو الصدق.. افترقنا
يا صاحبي كانك تشك في أسباب الفراق
دور لك اعمي وإذا صحى اسأله
ان كان في نومه يشوف ليه صحي
وليه افترقنا؟؟؟؟؟

قصيدة ما أظن
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
299 مشاهدة

..
ما أظن الصبح.. يدري بالليالي وماأظن الليل يعنيه الصباح
وما أظن في يوم قد زارك خيالي وماأظنك حاسبٍ عمري اللى راح
ياقديم الظلم ما فارقت بالي ومافي بالك لي سوى هم وجراح
لو همومي تسعدك.. زد لا تبالي ولو معي اخطيت اطلبك السماح
تبعد دروبك اذا اقبل وصالي ولجلك دروبي يضيقبها البراح
رغم بعد البعد جرحك هو ظلالي كنك الرامي وفرقاك الرماح
يالغرام السجن والسجّان غالي والسجين يخاف إطلاق السراح
لو هو في الأوراق قدر الغصن عالي بتاخذ الاوراق اقدار الرياح
للكسر غصنك وانا يمضيبي حالي ولضمى اورقي خلق ربي قراح
بسبقك للصبح مليت الليالي واتركك في ليل ناسيه الصباح

قصيدة وش تبين
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
292 مشاهدة

..
وش تبين؟!
تجرحي؟!..
افرحي.. مابقى مني أنا غير الجراح
وش تبين؟!
تعذبي؟!..
ابشري.. الفرح من دنيني ولىَ وراح
والحين سويتي كل اللي تبين..
اتركيني دمعة في خد الجراح،،،
الثواني عمر.. والفرقا دهر
والحقيقة كذب.. والدنيا حذر
حبك انتي شمس.. ناسيها الغروب
بالحيل تحرقني.. ولا منها هروب
وش تبين؟!.. اشكي!؟
والا تبين ابكي!؟
ياللي الملل طبعك،،
طبعك نسى همي،،
كانك تبين الكل يدري بقسوتك
عليّ أنا سمي
بَعاهدك أني أقول انك قتلتيني
واكتبت على صدر السما..
أصدق قصيدة حزن
واني كثر عشقي لكِ..كنتي تجافيني
وان شككوا في ضعفي فيك وفي قسوتك
كونك جرحتيني
أبوعدك أني.. أسقي العِدا دمي

قصيدة وش تبين
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
291 مشاهدة

..
وش تبين؟!
تجرحي؟!..
افرحي.. مابقى مني أنا غير الجراح
وش تبين؟!
تعذبي؟!..
ابشري.. الفرح من دنيني ولىَ وراح
والحين سويتي كل اللي تبين..
اتركيني دمعة في خد الجراح،،،
الثواني عمر.. والفرقا دهر
والحقيقة كذب.. والدنيا حذر
حبك انتي شمس.. ناسيها الغروب
بالحيل تحرقني.. ولا منها هروب
وش تبين؟!.. اشكي!؟
والا تبين ابكي!؟
ياللي الملل طبعك،،
طبعك نسى همي،،
كانك تبين الكل يدري بقسوتك
عليّ أنا سمي
بَعاهدك أني أقول انك قتلتيني
واكتبت على صدر السما..
أصدق قصيدة حزن
واني كثر عشقي لكِ..كنتي تجافيني
وان شككوا في ضعفي فيك وفي قسوتك
كونك جرحتيني
أبوعدك أني.. أسقي العِدا دمي

قصيدة أصدق ماكتبت
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
273 مشاهدة

..
انتي.. تدرين من انتي؟!
تدرين انك لي غديتي كل شي
وانك غديتي شمس ليلي وفي الهجير الفيّ
وانك اصدق ماكتبت
وانك احزاني وفرحي.. لاضحكت اوانجرحت
وانك غديتي ياعذابي اغلى من حبك علي
قبل أحبك.. يا ما كذّبني القصيد
وبعد حبك.. صار يكتبني القصيد
هو يوصفك بسمة وطرف
وأنا اعشقك في كل حرف
منك شكالي.. وصف حسنك اتعبه
وانا شكيتك.. وعشقي لحبك اعجبه
ومهما شكى ومهما وصف
انتي احلى ماكتبت.. انتي اصدق ماكتبت
وانتي احساسي وجرحي.. لاضحكت أو انجرحت
وانك غديتي يا عذابي اغلى من حبك عليّ
تدرين من انتي..!!