ديوان قصائد لشعراء المملكة العربية السعودية (متجدد)☘️☘️

قصيدة آه يا فيصل
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
189 مشاهدة

..
إِدْلِهمّي ياليالي خابرينك تاخذي من الطيّبين..الطيّبين
واهدي يادنيا بقايا خيّرينك للديار اللي تجازي المحسنين
مير حنّا يا إلهي عابدينك ندري ان الموت هو حق ويقين
مؤمنين بحكمتك مستغفرينك بك على كل المصايب نستعين
مات فيصل.. ياقلوب الله يعينك الفجيعه مذهله يا مسلمين
آه يا فيصل.. يقول مفارقينك: لو يردّك دمع أو حتى أنين
كان هزّ الأرض رَجْع مودّعينك وكان سالت نجد بالدمع الحزين
التّعازي تنتخي..يا صَبْر وينك والذهول ف وجه أحبابك سجين
ماهو بس أهلك وربعك ناعيينك الدول والناس عُرْب وأعجمين
اليتامى يا أبوهم فاقدينك يسألون: الطيّب المحبوب وين؟
كم مريضٍ قد لقى مَدّة يدينك العلاج وقبلك أهله يائسين
تخفي عن يسراك ما أعطت يمينك ومن كثر ما اعطت ولو أخفت يبين
آه يافيصل شكَت منّك سنينك ماقِوَت طيبك ولا انتَ تِسْتَكين
شاكرينك يا إلهي وحامدينك وندري إنّا لك إلهي راجعين
ما تِشَا قَدَّرت آمنّا بدينك خاضعين لما حكمت وراضيين
يا عظيم الباس يالله سائلينك إجزي فيصل بالرِضا فوزٍ مبين
واعفُ عنه يا إلهي راجيينك تكتبه يالله من أهل اليمين

قصيدة فقير
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
1
189 مشاهدة

..
فقير وعندي المال الكثير
فقير وملبسي غالي حرير
ويا صاحبي الحافي الفقير
ابنشدك ابسألك وشهو الحصير!!
وابسألك وشلون انا امر وانهي
واذا حكيت قبل انتهي من كلمتي
يقاللي سم ويصير
ولاشكيت من غفلتي طوّل زمنها
يقاللي لاتشتكي.. ماخلقت الشكوى لأمير
وابسألك وشلون انا مع كل ذا.. اقول عن نفسي فقير؟؟؟
ياصاحبي لاصار للضحكه ثمن
وصاروا اصحابي كثير بس بثمن
والوفاء مابه وفاء الا بثمن
ابسألك ماني فقير؟؟؟
ولاصارت اقوالي حكم
ولاقالها غيري غدت حكيٍ قديم
ابسألك ماني فقير؟؟
ولاصرت انا مانيب انا
ولاغلطت قالوا صحيح.. وكل شي اعمله يصبح عظيم
ابسألك ياصاحبي ماني فقير؟
وياصاحبي ابنشدك لامن جفتني دنيتي
وابتدأ الدرب الطويل اللى ابد ماينتهي
وانتهي العز القديم وماكنت اظنه ينتهي
والموت بدد فرحتي.. وحطوني في قبرٍ صغير
وحزنوا علي.. وبكوا هلي وناس من ربعي قليل
وارتاح من وجهي كثير
وبقيت وحدي في حيرتي مابه احد
لا طال عمرك ولا تحت امرك
ماغير انا وخوف ولحد وحساب قدامي عسير
وقتها ذكرت اني من زمان
يوم انه امهلني الزمان
هذا ظلمت.. هذا جرحت.. ياما كذبت
وذنوبي ماتحصي كثير
وقتها الىَ ندمت.. ونفسي كرهت
عرفت ان الله كبير وان الهلاك اصبح اكيد
واني انا مالي رجاء.. ولاهروب من الدجى
من الجحيم الا بأمل عندي وحيد
ان الله غفّار ورحيم
ابسألك ياصاحبي عني أنا في وقتها
ماني فقير؟؟؟

قصيدة تخيلوا
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
173 مشاهدة

.
يااللي قريتوني شعر..
وشفتوا ملامح حبها..
بين المعاني والحروف..
يااللي عرفتوني صبر..
وفراق..وجروح..وحزن..
وظروف خانتها الظروف..
تخيلوا..!!
إن القصيد إللي كتبت..
كل القصيد..
أصبح كذب..
تخيلوا..!!
أصدق إحساس ف زماني..
يصبح كذب..
تخيلوا..!!
إني ماكنت الوحيد في قلبها..
تخيلوا..!! إني الوحيد..
إللي أبد..
ما قد سكن في قلبها..!!
والغريب..أحبها..إلى هلحين..
أحبها..
تخيلوا..!!
ما ودي جراحي تطيب..
لأنها الشيء الوحيد..
إللي بقالي منها..تخيلوا..!

قصيدة البرواز
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
164 مشاهدة

..
قلتيلي انسى
ومن يومها وانا كل ليلة.. قدامي البرواز
حبر العيون ودمع القلم.. في دفتري
وصورتك.. رغم الألم.. ورغم انها خذت من اطباعك كثير
وخانت البرواز.. اشوفها في خاطري
حبيبتي مابيدي حيلة
لاصرتي الصورة.. وعيوني البرواز
وشلون ابنسى
اتعبتي الصورة مشاوير
وتعبت انا بلقى لغدرك معاذير
وصورتك اللي سجنت بروازها طول السنين..
كانت جسد وبروازها الروح
ويوم انزعت منها الجسد.. تجرّحت اطرافها
وبجروحها راحت لمين؟
لبروازها الثاني!!
مسكين.. بيسجنك ويبقى سجين
مسكين
تشبهلك اقداره.. خانته
وصورتك يجي يوم وتخونه
حبيبتي..أو للأسف حبيبته
لاصرتي الصورة.. وجفونه البرواز
وشلون ينسى؟!
حبيبتي لجل انسى جرحك واستريح.. ببكي
وبعد البكى.. ببكي
وأكيد فيه لحظة بتجي.. وبيجف دمعي
وعندها صورتك اللي في عيوني
بتموت من ظلم العطش..
بروازها بيصبح نعش
وبتمرني الدمعة الأخيرة... تاخذ معاها صورتك وتطيح
وكني بالمسافة تطول مابين عيني.. ودمعتي.. وخدي
وكني بقلبي الحاير المسكين
نبضه يقول لا تودع الفرقى.. الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني.. واكسر البرواز
وانسى

قصيدة موشح عربي
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
156 مشاهدة

..
يا سراب السلم في الوقت الذي فيه يعلوا الإفك في مسرى النبي
وجيوش العُرب يجري حشدها لجيوش العُرب لا للأجنبي
ندد القوم بصوتٍ واحدٍ بفعال المجرم المغتصبِ
أبشروا بالنصر هذي حربنا جندنا الطفلة فيها والصبي
يازمان الوهن عند العربِ
أيُ ليلٍ حالكٍ نحن به أيُ ذُلٍ فاضحٍ لا يختبي
أين مجداً دانت الدنيا له مرَ دهرٌ شمسه لم تغربِ
من روابي نجد حتى نينوا من بلاد الشام حتى المغربِ
ضاع ذاك المجد في الماضي سُدى كالأساطيرِ وبالي الكتبِ
يازمان الوهن عند العربِ
ماسئمتم من بيانات الأسى؟ ماسئمتم لهجة المنتحبِ
ماسئمتم وضعكم بين الورى ماسئمتم حبكم للعبِ
حثّت الدنيا الخُطى نحو العُلا ووقفتم دون أدنى سببِ
أفصح الأقوام أنتم في الوغى أشجع الأقوام عند الطربِ
يازمان الوهن عند العربِ
ماسئمتم مشيكم دون هُدى ماسئمتم مفردات الخطبِ
ماسئمتم شككم في بعضكم ماسئمتم كل هذا الكذبِ
مايعزي أنكم في ضعفكم قد بلغتم دون أدنى الرتبِ
ليس دون القاع هذي موضعٌ سوف تعلون فيال العجبِ
يازمان الوهن عند العربِ
إن سئمتم نقطة البدء هنا قد يسير الوقت للمنقلبِ
إن صمدتم صار نطقاً فعلكم ماسكتم طولَ تلك الحقبِ
إن صفت نياتكم مابينكم ودعوتوا ربكم أن يجتبي
من بنيكم جيل فعلٍ قادرٍ يمتطي الأهوال للمجد الأبي
قد تعود القدس قلب العربِ

قصيدة تحضنه
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
147 مشاهدة

تحضنه لجل تضحك للي وراه
وماهمها لو شافها..
غايته اسمى كثير من العتاب ومن الغضب
تحضنه وفي بالها.. ذاك اللى اعطاها الرقم
في ليلةٍ كان النهار.. فيها بقايا سكرته
وللأسف انه نسي يكتب لها.. كم غرفته
تحضنه وفي يدها ساعة ذهب
كان اشتراها لها البارحه
لجل تعرف كم مساحه غرفته

قصيدة الشاعر الأول
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
147 مشاهدة

..
قرّر التاجر يكون الشاعر الأول افرحوا يا اهل القصيد وجهزّوا الساحة
سهلّوا الأوزان لجل المبدع الأفضل بعد إرهاق العمل يحتاج له راحة
فاضي هو يوزن؟.. كلامه كامل مكمّل يكفي انّه لجلنا يكتب عن جراحه
الكسر فاسماعكم وإدراككم يجهل عبقرية فرحته والفن في نواحه
جدّدي له يا صحافة عهدك الأمثل وارسمي الأشعار صحرا وشعره الواحة
واكتبي عنه العظيم الشامل الأشمل كان يحتاج الشعر جهده واصلاحه
واسألي كيف ومتى وهل كان أو يعقل عمرنا من غير فكره تكمل افراحه؟
وين نوبل عن قلم من أشرق واشعل ظلمةٍ كنّا بها أفناها مصباحه
من يقول ان الشعر في وقتنا مبهذل شعرنا عقب الخساير زادت ارباحه
لحّنوا الشعر البديع الأصعب الأسهل واعرضوه بكل شاشة ليل واصباحه
وادفعوا للي شدا للشاعر الأجزل مبلغ وقدره كذا يستاهل صياحه
ابشروا يا مطربين الدفتر الأجمل يكفي عن مُرّ السؤال وذل إلحاحه
دفترٍ فيه القصايد تشتري الأخطل وعنتر يضحّي بعبله ويرمي سلاحه
دفترٍ فيه المعاني في اليمين اسفل أقوى أبياته: فقط لا غيري في الساحه

قصيدة لجل أوصلك
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
136 مشاهدة

..
بفارق فراقك وبخنق..عبرتي واجرّح اضمادي واسافرلك..معك
بشد للماضي واقدم ساعتي واعاند اعنادي واقودك واتبعك
بجامل احزاني واجافي فرحتي واعادي خلاني واحبك واخدعك
بصير انا طبعك وأنتي طيبتي وبيحزنك ضحكي.. وهلّي بمدمعك
بسامر دموعي واعزّي ضحكتي وبهدي انا ضلالي.. ضلالٍ ياسعك
بلبس انا ذلك.. وقيسي عزتي وبتصيري ذنوبي وخيري بيطبعك
بحارب في ضعفي وافر في قوتي وإلى رضختيلي لموتي بدفعك
ولجل اللقاء برحل وتمضي رحلتي وإلى حصل شوفك بكون مودعك
اببعد واوصلك وبسبق خطوتي وبنثرك فيني وانسى اجمعك
بضم أنا هجرك في قربك وحدتي وتدلك عيوني وقلبي مضيّعك
واذا اضلمت دنياي بطفي شمعتي واذا كثر زادي بجوع وبشبعك
شردتي رقادي وسمعتي نضرتي وغمضت أنا عيوني لجل ما اسمعك
صرخت في سكوتي ولمستي صرختي وقربتي وجهك لي لجل ما اصفعك
عند الحزن تثقل خطاكي دنيتي وعند الفرح قالت خطاكي مسرعك
قصيدتي يكفي.. غبية كذبتي حبيبتي آسف بخونك.. بس معك

قصيدة يا كاعب
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
137 مشاهدة

.

يا كاعب الطبع الفريد

ياللي في صدقك تكذبي

يا أقدم الكيد الجديد

كيد انسجن منه نبي

يا جاريه تملك عبيد

يا مقيّده تسبي سبي

القوه في ضعفك تبيد

وسلاحك الدمع اسكبي

ما يعجزك قاسي عنيد

الكهل يصبح بك صبي

ينصاد ويظن انه يصيد

ويصدقك هذا الغبي

ويظن انه الفذ الوحيد

ما يدري انك تلعبي

مسكين هالجاهل بليد

ظنك بوصله ترغبي

ان جاك اقفيتي بعيد

وان صد عنك تقربي

وان شفتي اخلاصه يزيد

في حيرتك تتقلبي

وان بان لك فجأة سعيد

من هالسعادة تغضبي

وان قلتي عني لاتحيد

وطاوعك تستغربي

وان قلتي فراقك أريد

وغاب عنك تندبي

ياطالب الراي السديد

يا حاير بطبع الظبي

أقرب من حبال الوريد

وابعد من المجد الأبي

وأوضح من أنوارٍ تقيد

واخفى من النملة دبي

الشك فيها والأكيد

وغموضها به تختبي

شف فعلها يحكي ويعيد

الغدر شيمة مذهبي

زادي النكد به استزيد

والمكر صافي مشربي

البعض ينصاني مجيد

والبعض يحبيلي حبي

ضعفي قوي وذلي عتيد

ياليت اعرف مأربي

شف فعلها برجلٍ شديد

تلقى طلبك ومطلبي

تعطيه بعض اللي يريد

وتاخذ جميع اللي تبي

أستثني من هذا القصيد

كل النساء بكوكبي

قصيدة كباريه
الشاعر: عبد الرحمن بن مساعد عبد الرحمن بن مساعد
#العصر الحديث
#المملكة العربية السعودية
0
134 مشاهدة

..
فرقة موسيقية
كمنجة بثلاث أوتار.. قيتار.. ثلاث طبّالين
اورق.. ناي.. شاي
فُرقة موسيقية
يجون.. كل ليلة يجون.. ومع أول الصبح يسرون
لجل ثاني ليلة يجون
هم يعزفون.. وما يعزفون في مكان تسمع فيه الناي قانون
ازعاج.. صجة.. دجة
ايقاع خليجي غالبا مقلوب
ايقاع خليجي دائما مطلوب
شباب.. بنات ترقص.. والعطر في اول الرقصة حلو..
وفي آخر الرقصة هبوب
غناء وطرب.. عرض وطلب
واحد يغني.. بدلته تلمع.. يُفترض فنان
ياليلة دانة لدان
قرقعت كيسان.. دخان.. ما اسعد الشيطان
ضوء خافت.. كل شي حلو والضوء خافت
كل شي كذب والضوء خافت
وفي اطرف الصالة.. هناك اثنين.. واحد يقول:
شفت هاذيك الطويلة اللي ترقص؟
الثاني وين؟
هاذيك اللي مع حسين
واعدتها البارحة وجتني.. مالومها حبتني..اعطيتها ألفين
مسكينة هي.. ماودها تجلس في ملهى.. بس انها تساعد اهلها
الثاني قال: كل البنات اللي هنا تساعد اهلها
غسان.. غسان.. مدير هالصالة
ركض غسان.. وصل فلان.. وصل المهاب.. معاه عشر اشخاص
ركض غسان اهلين وسهلين..شو هالحلو..يخزي العين
الفرقة تنهي الأغنية.. وتعزف بسرعة..
حمد لله ع السلامة.. ياجاي من السفر
أحلى طاولة للمهاب.. طاولة على البست
لفلان اللي من اسبوع كان لابس البشت..
اليوم على البست
غسان قلقان.. مضت ساعة.. وما نقّط أحد
نادى ياجارسون وحط يده في جيب البنطلون..
خذ هالألفين..على المغني ارميها.. وشاور على فلان
ادريس قام فلان ينقّط وانا لا.. ياللإهانة.. والله لنقّط
يادريس لا.. هذي فلوس التذكرة.. وشلون نرجع.. السفر بكرة
ادريس قال بكره اروح لفلان احلف له انسرقت فلوسي.. الاوتيل غالي.. وانا معي عيالي وارجع انقّط
جارسون هناك يحكي مع زميله
غسان قال الفواتير ماتنزل الا آخر السهرة
الحق معه.. بهذا الوقت.. مافيه احد يقرا
جوزيف وين.. اليوم فل.. ودوه للشرطة.. غسان شافه يسرق من النقطة
والكل عارف.. الثلث للفرقة.. والثلث للنمرة.. والثلث للصالة
وكله لغسان
طلعت الشمس.. الساعة ثمان
الكل سكران.. الكل تعبان
ماعدا غسان قفل الصالة..الوعد بكرة
:...