فوق هام السحب ( الشعر الشعبي) على متن القوافي

هاك القصايد لا تضايقت، و أقرا
‏شف وش كثر فيها لضحكاتك أشتقت

‏لا تنشغل فيني .. أنا بحالي أدرى
‏قلبٍ تعلّق فيك ينسى مع الوقت

‏أشوف لك من وين ما رحت ذكرى
‏ولا شفتها .. صدّيت عنها ودنّقت

‏ما كل جرحٍ لا خذ أيام .. يبرى
‏بعض الجروح يزيد شرّه مع الوقت

مع إنك بعيد لكن بقى التذكار
‏ليا شافته عيني تتسابق مدامعها

‏دفنت الغرام بخافقي والقلوب أسرار
‏مشاعر هقت إن الليالي تضيعها

‏جحدت الغلا لين أمتلى بـ الخفوق وثار
‏قصايد عساها اليوم تطرق مسامعها

‏يقولون ما ودّعك؟ قلت الفراق وصار
‏والإنسان روحه تنسلب مايودّعها

‏يالله ياللي عليك الضيق وفراجه
‏يارازق النفـس ياعالـم مواجعها
‏
‏ارزق عبادٍ مافي يديها ولا حـاجه
‏بيـديك الارزاق تعطيها وتمنعها

يقولون جرح الحب حده سنه ويطيب
وانا اقول جرحي ينزف سنين ماطابي

وترى اللي يبكر بالذوايب طلوع الشيب
سهام الغياب اللي بها القلب منصابي



سلطان فيحان الركيبي

يقطعك دنيا مالها اول وتالي
لو اضحكت للغبن تقرع بالاجراس

المستريح اللي ما العقل خالي
ما هو بلجات الهواجيس غطاس


محمد السديري

‏عطوني علاجي لو انه عنزروت
ما هوب مـر المـر جـربت طعمه

ثنتين ورني مماتي قبل امــوت
يـوم الفراق وحـاجـةٍ عند رخمه

نجم الاسلمي

محدن بكامل والبشر كله عيوب
لا تستمع للي حكو لك حكو بك

خلك مابين الناس غالي ومحبوب
وأستر عيوب الناس تستر عيوبك

‏الصداقه مواقف والتجارب مراية
تكشف الوجه الابيض والوجيه السمر

لكن الصدمه الي حطمت كل غاية
لاغدربك صحيبك بعد عشرة عمر

صدرك على خافي سرايرك زره
لاتصير سطح كل ماجا المطر خر

ولسانك أصحاب الفتن لاتجره
في كلمه عوجا يجي ردها مر

‏إن بغيت تعيش مرتاح الضمير
الحسد والحقد لا يطـري عليك

وان بغيت العـز والمجد الكبير
طاعة الله ثم طـاعة والــديك