فوق هام السحب ( الشعر الشعبي) على متن القوافي

‏لا تصغر كبير ولا تجادل غبي
والمثل قال ما كل بيضةً بشحمه

النشاما تبي وحقوق ربي تبي
واحسن الله عزا من يحتزم برخمه

....

‏من طاب طبنا فوق طيبه بعد طيب
واللي تردّى وش كسب وش خسرنا

دنيا العنا فيها دروس وتعاجيب
وعلى كثر صكاتها ما انكسرنا

....

ياربّ تبعدني عن الشين والعيب
وتزيحّ عن دربّ العفو كل عايق

ياربّ قدّرني على ردّة الطيب
وأحفظ لساني عنّ عيوب الخلايق

....

‏يقول وش زودي على الناس عندك
واقول كلك يا هوى خاطري زود

نصيب قلبي قادني لين حدك
مآكن غيرك ب المخاليق موجود

....

‏مانسيتك لو تحس إني نسيت
سيرتك للحين تملاني حضور

أذكر إني يوم ودعتك بكيت
من بعد هاليوم ما أملك شعور

....

محدن بكامل والبشر كله عيوب
لا تستمع للي حكو لك حكو بك

خلك مابين الناس غالي ومحبوب
وأستر عيوب الناس تستر عيوبك

بقلمي

لاتامن العقرب ولاتامن الداب
‏السم واحد لارقا في متونك

‏ياجاهل الدنيا ودورات الاسباب
‏أعرف ترا من خان غيرك يخونك

حقيقه

‏لاتلومين المشاعر يوم فاضت فيني
شاعرك يلعب بقافه لعبه بمسباحه

العرب يانور عيني كلهم غـاديني
جعلهم فدوة عيون بفعلها ذباحه

لو تناديني وانا مبعد اجي من حيني
لو أغوص البحر والا اقطعه بسباحه

ولا يهمك هالعواذل ماهم بصاحيني
ودهم نترك هوانا بعد عصف رياحه

....

‏لاتكره الدنيا على شان مخلوق
خان العهود وحط بالقلب حرقا

قله تراك من المعاليق معتوق
خله يروح ومثل شرواه فرقا

والمحترم بداخل القلب مرفوق
في سلم الترتيب يبقا ويرقا

....

العقل نعمه والتعامل ثقافه
وكلا على ماقيل عقله يدله

وراعي التصنع والكبر والكلافه
يجيه موقف يطرحه في محله

....