فوق هام السحب ( الشعر الشعبي) على متن القوافي

‏لا تشيل هـم الوقت برده و حره
‏واحذر تصير بقسمة الناس مقهور
‏
‏وحكم القدر لاجاك خيره و شره
‏اشكر عـظيم الشان و الذنب مغفور

قصيدة بعنوان: وكالة يقولون


سرى الليل والساري سرى قبل يسرون
وأنا من صلاة الصبح وانا اتحراه

اناديه بأعلى الصوت لو كان يوحون
عسى يا لعله يسمع العلم لو جاه

نبش عن كلامٍ من هكا الوقت مدفون
وجابه وجبنا اللي يعرفون دعواه

نجاسة كلامه ما يطهره صابون
لو إنه تطهر في أول الوقت واتلاه

كذوبٍ ربادي ينقل الهرج بفنون
تفنن في نقل الهرج لين إنه أعماه

له عيون بس ما تنفعه لو له عيون
وله سمع بس ما يسمعك لو ترجاه

يدودي مع اللي في الأوادم يدودون
يسب الخطايا والخطايا خطاياه

يقولون قالوا في وكالة يقولون
كلامٍ بعد ما قاله الناس قلناه

عن فلان قلنا قولة الحق موزون
وزناه بالحكمة على قدر بلواه

وأنا اقول من كثر ترى الهرج مغبون
هروجه حطب في النار بكره تغشاه

وحتيش لو اخطأ الخطأ الناس يخطون
وش اللي يبيح إنك تسبه وتشناه

ضعيف الروابع في آخر الوقت مدفون
بقبرٍ هيالٍ دون مالٍ ولا جاه

يحسبنها عدت بعد ما يقفون
وثاري كتابه كاتبه ما تخطاه

يجيك البعض من كثرة الهرج مديون
لسانه سباه وطيره عن سباياه

مثل من جمع له مال والمال مركون
على جال بيرٍ لا وردنا وطيناه

تركها وكل الناس للبير يردون
وحنا عذلنا ثم بعدها تركناه

عيون الأفاعي حول ماله يدورون
تدور الدواير في الدواير على ماه

وجوك النشامى بعدها حيل يعدون
يبونه يوقف عن بعض من سواياه

تبخرت يامالٍ به العبد مفتون
يدين الحرامي شالته شيلة الشاة

ولا كان في حرزٍ ولا كان مصيون
وروح كما روحت يا مقيط ورشاه

تجي صاحبه تلقاه بالحيل محزون
يعلمك وش جاء له على جال مركاه

ترى ذا مثل من ينقل الهرج بلحون
كلامه كثير ولا لحقنا على اقصاه

يغرك كلامه بالفصاحة وملسون
يعبر عن اللي باديٍ في محياه

وانا اشهد شهادة حق والناس يدرون
نداري بعضنا عن بعضها مداراه

نسوي لها فرجة على شان يمشون
ما دام إنها تمشي وعلومه مسواه

على شان تبقى لك محبة ويبقون
جماعة وقايدهم قوي لا عدمناه

وفي اختامها صلوا مع اللي يصلون
على الهادي اللي دلنا وإتبعناه

عدد ما يصوم الناس واللي يحجون
ومن قام للباري يحبه ويخشاه

يصلون فرضه وآخر الليل يدعون
ومن يطلب المولى على الخير مبداه

ويرقى المعالي مثل ما الناس يرقون
على سلم الأمجاد والعز مرقاه

تبدي لك الشدات ماكان خافي
اللي بها يظهر حصان الأطاليب

ياكثرهم لاصار هون وعوافي
وياقلهم لاحل وقت المواجيب

ماينطح القالات كود السنافي
اللي مطاليعه على العز والطيب

لو شانت الايام صامل اوافي
ماهو من اللي لابدا اللازم إيغيب


سعود عايد العلوي الحربي

يانفس ما باليد حيله ولا ميل
قد راحت أيام الزمان الجميلة

لاعاد تتمني ونا فاقد الحيل
بعض الأماني للأسف مستحيلة

عيشي على الحاصل في الخير والويل
لا يقهرك همي ولا ترخصي له

لا الهم فارس ممتطي صهوة الخيل
ف ابو علي رجال يسوا قبيلة

خاويت جرحي والمعاناه والليل
وأسهرت طرفي بالحروف الجزيلة

والحلم ذي كنت احلمه شله السيل
وغاب عن عيني مراحل طويلة

لا طعم للراحه وللبن والهيل
مع معانات الرجال الأصيلة

عزاز ما للهم من عزنا نيل
ومن خضع للهم يصبح قتيلة

....

لاتسأل الساكت عن اشفيه مافيه
يغـني عن السكته ملامـح عيونه

مثل الشجر لحتاج لإنسان يسقيه
ساكت ونعرف حاجته من غصونه

انا رفيقك وأبن عمك وأنا أخوك
وأنا عضيدك لو تجور اليالي

وأنا الوفا لو كل الاحباب خانوك
وأنا الوطن وأنا الديار الخوالي

ياسعـود يامشكـاي ويـش التدابيـر
لاتشتكي جـور السنيـن وشطفهـا

جـور السنيـن يحـل ويـمـر ويصـيـر
راجـع حياتك واكثـر النـاس شفهـا

النـاس لاحقهـا مـن الوقـت تاثيـيـر
وتصبر على باس السنين وصلفهـا

تـمـيـل مـيــلات المـقـاديـر وتـغـيـر
وان وصفـت بتعـذب اللـي وصفـهـا

فحرص على قرب الرجال المناعير
الـلــي دروب المـرجـلـه تحتـرفـهـا

تـلـقـى بخـوتـهـم مـعــزه وتـقـديـر
ومجـالـسٍ مادنـسـت مــن عرفـهـا

تاقف معك لو همك اكبـر مـن النيـر
وبعزمهـا حتـى الصعـاب اتعسفهـا

ولا قــدر الله ثــم رمـتـك المقـاديـر
الـرجـل منـهـم وقـفـتـه لا وقـفـهـا

تسـوا لهـا فزعـة صفـوف وطوابيـر
ماهـوب لا شـاف الصمايـل حرفهـا

يقلط على الشده كما سالـم الزيـر
وتامن به الديـره وهـو فـي طرفهـا

لامازهمتـه قـام يشتـح كمـا الطيـر
لاضــف جنـحـانـه وكـفــه عكـفـهـا

واهـل الـردى مالـك وراهـا مداويـر
جـنـب مجالسـهـا وجـنــب ولـفـهـا

لو اضحكتلك في السنين المياسير
لابـد فـي وقـت القـسـا تكتشفـهـا

تفِرح بك الشمات لـو ذنبـك اصغيـر
وتحتـار فـي اصغـر غلطـةٍ تقترفهـا

ويصير همك كبر هضبـة شمنصيـر
لـكــن جـنــب معـرفـتـهـا وعـفـهــا

لانــذال رفقتـهـا مهـونـه وتقـصـيـر
وتِكثـر عنـا نفسـك وتكِثـر حسفهـا

فالرفقـه اللـي ماتدلـك علـى خيـر
آلــلّــه يلـعـنـهـا ويـلـعــن جـدفـهــا

ولا تـــرادع جاهـلـيـن المـحـاضـيـر
ولو تعترض لك كلمة اللاش طفهـا

واحفظ السانـك لـو بلـوك المعاثيـر
الكلـمـه الـلـي دون مـيـزان خفـهـا

يـجـوز تـرمـي كـلـمـة دون تفـكـيـر
والصبـح سـودان القلـوب اتخطفهـا

واصـدر ليامـا عفـت صـدارت ابعـيـر
لاترتجيـهـا واطـلـب الله خلفـهـا

وتـرا النصيـب يصيـب مافيـه تغييـر
لــو تجـبـد امــواج البـحـر وتغرفـهـا

وعـذر الرجـال الوافيـه خلـه ايصيـر
ابـيــك تـعـذرهـا وتـقـبـل وسـفـهـا

العـذر يقـبـل لاحـصـل فـيـه تبـريـر
امـن الرجـال اللـي صريـحٍ هدفـهـا

في كـل شـي قـد تجـوز المعاذيـر
الا علـى اعـراض الرجـال وشرفهـا

اقولهـا وانــا الــذي سلـوتـي غـيـر
البعـد عـن ضيـق البـيـوت وكنفـهـا

اسـج فـي خبـت كستـه النواويـر
حيثـه ظفـر روحـي وحيثـه نصفهـا

واسواق الاسهم والذهب والدنانير
لـو سلموهـا فـي يـديّ اصطرفـهـا

ينوبهـا ملـحـاٍ مــن ابــل المناصـيـر
ارعابـهـا زهــر الفـيـاض وقطـفـهـا








الشاعر عبدالرحمن بن بديع

لوجيهنا قيمة ولصدورنا غيب
ما الله خلقنا ريشة في عجاجة

للطيب طيب وللمودة تراحيب
وللجد حد وللسماجة سماجة

ابعد عن اللي لا زعل ينكر الطيب
اللي تقلب عشرته مع مزاجه

ان راق رقاها طوال المراقيب
وان ضاق ضيقها على ادناة حاجة

ماهو صحيبن لي ولاني له صحيب
حتى لو انا كل يوم نتواجه

احرص على اللي خوته حوة الذيب
لماح دماح طليقن حجاجه

يفز لام نجت منك المناديب
ويجلي عمس عين الخوي وانزعاجه

يستر رفيقه عن كبار العذاريب
ويعرف مداخيله ويعرف خراجه

جربت في الاصحاب كل الأساليب
ولقيت معظمهم سواة الخواجه

اما لقى عندك متاع وملي جيب
ولا يبيعك بيع شاوي نعاجه

رفقة فلس ما من وراها مكاسيب
تبي لا حمية الأيام ساجه

في كل يوم كاسب له معازيب
واللي قضى من درب الاشغال ماجه

ولا حزامي في الليال المعاصيب
روس الرجال وعز راسي وتاجه

محازم مافي فشقها مكاذيب
ونار يشب الجار منها سراجه

افخر بهم ما تطلع الشمس وتغيب
واعينهم واسدهم في المواجه

ولاني على الزلة قريب محاضيب
حر على روس الطوال دراجه

اعامل العالم بحنكة وتهذيب
واشوم عن بعض الحكي واللجاجة

وان شفت عوج الاش صديت
ماني بمكلوف اعدل ميلته وانعواجه

وليا وردنا صافيات المشاريب
نشرب قراح الماء ونترك هماجه



ناصر الرزيني

هكذا الإنسان عقله والشعور
الأماني حلم والواقع مخيف

من تحلى بالثقه قالوا غرور
ومن تواضع للبشر قالوا ضعيف

كالطير فرقت الدموع بخفية
مثل المداد على القصيد فأوجعك

يا مسكني و سكينتي وسكوني
قد جف حبري في القصيد مطلعك

كيف الحديث عن العيون وعشقها
فاق الكلام بلاغة فأخضعك

عجز اللسان عن الكلام بوصفها
فالنور نور و النجوم ملمعك

كل الحروف لوصفك تترنم
ماذا فعلت لكي أنال مرجعك

فالليل أظلم في سواد عيونها
فأنارت القلب الضعيف و أخشعك

سبع عجاف بالليالي موجعة
فلرب وصل بالفؤاد أدمعك

كيف الفراق والعيون أدمعت
شوقا وحزنا فالقلب مودعك

كيف النجاة من العيون وسجنُها
قد ضمد الجرح العميق و أخضعك

يا ويلتي ليت الغرام يكفه
لكنه قتل الفؤاد مدمعك

أضغاث أيام أيا قمري أنا
فلرب وصل في الفؤاد مرجعك