فوق هام السحب ( الشعر الشعبي) على متن القوافي

‏لا تستشير الناس في كل موضوع
بعض البشر مـن حقدهـا مـا تسرك

ماكل شورن يابن الأجواد مسموع
كــم واحـدن وده بـ شوره يـضـرك

بقلمي

‏يا فقــــــر قلبي للمحـبـــــه والاشواق
وياشوق روحــي لليالي الجميله

اللي بهــا كنـــا حبايــــــــب وعشاق
واليــوم صرنا كل حد في سبيله

غيب كما غاب القمـر عند الاشراق
من دون ياخذ اذن له في رحيله

من يومها والنار تشعـــل بالاعماق
والقلب نايـــح بالجروح العليله

....

‏قالت هلا قلت الهلا من شفاياك
تسوى ملايين البشر ي عيوني

قالت غلا قلت الغلا في محياك
يا صرخة ازعاجي وقمة سكوني

قالت وله قلت الوله يوم لقياك
لو وقفو حساد دونك ودوني

قالت دلع قلت الدلع في حلاياك
ياابلغ قصيده ترجمتها فنوني

....

‏قالوا علامــك ضايــــق البال محتار
قلت الزمـــن والوضـع هذا كسرني

الحــظ عاثـر والزمـــــن صار غدار
والوقــت يا عالــم بأســـره غدرني

اصيـح باعـلا صـوت والحال منهار
والقهـر في كبــــدي ولاشي جبرني

ماغير اترجــم كل حزنـي بالاشعار
والدمع من ضيق المحاني غمرني

....

‏الصمت يجبـــر كل مخلـوق يخفي
هرجــه بصــدره مايحاكيه لانسان

لاكــن انا الشاعـــر ابوحــه بحرفي
وادون احساسي على شكل قيفان

ياهاجس ابياتي مـن الشعر يكفي
يكفــي نبيـن ماحوتنا مـن احزان

خل المشاعر داخل القلب تغفي
واخفي ألمها داخلي قدر الامكان

....

‏عسى خير بعد اتعابنا يوم نرتاح
وعسى الامل يأتي بطيب الاماني

وعسى ورا الاحزان تأتينا الافراح
وعسى السعاده ماتفارق كياني

وعسى حظوظ الوقت تنسينا الاجراح
وعسى القدر يمحي جروح المحاني

وعسى الزمن يضحك لناعقب ماطاح
وعسى المرح يبقى طوال الزماني

....

‏يا حبيبي مُـــت انا والقلـــب فيك
وصاب قلبي من هوا عشقك بلاء

مامعي فالكون غيرك من شريك
ماخـذن في داخلـي كل الغلاء

بي جنون العشق ذابحني عليك
جعل حبك في حياتـي ماخلاء

ايه احبــك ايه احبـك ايه ابيك
وايه احبك حب خالص من ولاء

وايه احبـك ايه احبـك ايه ابيك
بصوت عالي يسمعه كل الملاء

....

لاتدور من ورى العالم شعور
اشعر بنفسك ونفسك تشعرك

وأي واحد قال لك هذا غرور
قول له بكره تجي واذكّرك

....

ماكل فعل ٍ تنضرب فيه الأمثال
الفعل كايد والكلام بسهوله

فعل ٍ يموت وفعل يبقى للأجيال
وفعل ٍ تبيه الناس ماحد يطوله

....

‏يا احلا صباح عمري واجمل ايامي
‏يا للي خذيت الغلا كله وحليته
‏
‏لاصرت اشوفك بعين الحب قدامي
‏في كل صباح على طاريك غنيته

....