فوق هام السحب ( الشعر الشعبي) على متن القوافي

‏تخطي وأجيك أعتذر كن الخطا منّي
‏متقمّص الدور وجروحي هي جروحي
‏
‏يهزمني الشوق لين أرضيك لو إني
‏لاني براضي عليك ولا على روحي

....

‏حتى عشيري بعد ماراح مالدّ في
‏وانا احسب ان القصايد تاصل لمسمعه

‏يوم الفراق استوى له قلت خلّه وعيّ
‏لكنّه اختار باب البعد والله معه

‏كنت احسب انّي بموت ان راح ماني بحي
‏واثر الذهب ملمعه يبقى على ملمعه

‏ماهو مخرّب مزاجي دامني ماعلي
‏وموجّهٍ للحفر ومعقّب المجمعه

....

‏ياقمر لو تكتمل كل يوم وكل ليل
‏والله انك ماتسيّد على سيد الملاح

‏الخليل اللي مابعده ولا قبله خليل
‏هني من سجله معه في عقد النكاح

‏والله ان جنسه وشكله مع العالم قليل
‏ويش فيها من ذرابه وفيها من سماح

‏ياجميله قدريني على رد الجميل
‏وإقراء اذكار المساء واقرا اذكار الصباح

....

‏ياريم نجد العذيَّة للدروب الطوال
‏مسافةٍ يتعب الرحّال من طردها

‏ماعلّمتك الأراضي والسماء والجبال
‏عن صدفةٍ كم لي أرمي للمدى نردها

‏لازلت أحبك وانا أحبك على كل حال
‏وأخاف من ليلة الذكرى ومن بردها

‏يومي بي الريح وإن هبّ الهوى من شمال
‏ماعاد تعني لي القصة ولا سردها

....

‏ياوقت الفرح حتى لو انك وسيع بطان
‏اباخذ معك فنجــال واحد عن الشكه

‏أنا والهموم اللــي تجيني ربع واخوان
‏نسامر بعضنا مثل الاصحاب فالدكه

‏ليا قال دجال السوالف يقول فلان
‏عن اللي يقول خل صدرك حرم مكه

....

‏كل مانويت ابتعد واجزاء الغياب بغياب
‏ابلشني الشوق لين اشتقت وابلشتها

‏اقرا رسايل غلا وارسل رسايل عْتاب
‏وان وصلني رد طنّشته وطنّشتها

‏بداية الحُب عذب ونصفه أعذب عذاب
‏ونْهايته ودّك انك تموت ماعشتها

....

‏تسوق الطف أنسام الغلا ضحكة محياك
‏على روح من طالت عقوده وهو ضامي

‏ياسبحان من خلاني أدورك والقاك
‏وأشوف أبسط حقوقي معاك أكبر أحلامي

‏لاتستغرب إن بعت الوجيه وشريت رضاك
‏وأنا مرخص ليومٍ معك جملة أيامي

‏تمثنى فجوج القلب وأسلى وسج خطاك
‏على عين حاسد ضحكتي لك ولوّامي

....

أهَجر الساري ويوحشني قديم عْتابه
‏الغياب أسهل عليّ وأنا ما أعرْف أجادل

‏وين أروح بْعيد يافجرٍ خذَا جلبابه
‏من زمانٍ مِسدل مْن أسود عتيمه سادل

‏وأنت تتعمَّد تراود غايبك فـ غْيابه
‏مثل ماتتعمَّد إحراج الصغير الجادَل

‏مايقصَّر عمر الإنسان أكثر مْن أحبابه
‏والتشبّث والشعور اللي ماهو متبادل

‏أوجَع مْن الشعر لانبَّش حزن كتَّابه
‏وأكذب مْن الضحكة اللي في محيَّا النادل

‏قلّ لطرفك لايناديني كسول أهدابه
‏مبطي وما عادني بْـ داري أدلّ أو ما ادلّ

‏ويش حبَّبني بـ فيضة موطنْك وتْرابه
‏وأنت لاقاضي نزيه ولا أنت حاكم عادل

....

‏يجي الفرق مابين الرياجيل فـ الميراد
‏حدن يتبع الجره واحد يصنع الجره

‏ترا أحياناً ضعيف الروابع حفيد أسياد
‏يجي من ظهر حر ويجي من بطن حره

‏لاكثرو معاديني أنا أستاهل الحساد
‏لو أفشل ماعين لي معادين بالمره

....

طرقني غرامك ياجميل المزايا طرق
‏كما يطرق الحداد صيخٍ على جمره

‏ترى الحب يسرق حال راع المحبه سرق
‏خفايف خفايف لين يقضِي على عمره

....