فوق هام السحب ( الشعر الشعبي) على متن القوافي

‏تمطر مشاعرنا من الود مالاق
لاهل النفوس الطيبة والانيقة

اللي غلاهم في صميمي والأعماق
ومكانهم وسط الخفوق العميقه

صباحي يصلكم بالمحبه والاشواق
واطيب ورد الكون واجمل رحيقه

خطيتها من هاجسي فـوق الأوراق
مني لكم يا اهل القلوب الرقيقه

....

‏شفتك ولا مليـــت من نظرتــي فيك
سبحـان من زيـــــن حلاتك وسواك

من يوم شفتـك خافقي صـار بيديك
والعقل عنـــدك ماقـدر يوم ينساك

فيك الجمــال اللـي به الله محليك
وفيك الوصوف اللي به الرب حلاك

وفيك الدلع فارق على الكل يغنيك
وتطغى عن اللي في جماله تحداك

....

‏ذرابتك واسلوبك وحسن ذوقك
وإحساسك المتفرّد الغير عادي

مواصفات تخلي أبسط حقوقك
إنك تكون المُنفرد في فؤادي

....

‏قلبـــي سجيـــــن الحيأ وطيبته زاده
لو شان وجه الزمـن ما شانت أخلاقي

وانا تربيــــــت والطيبــــه لنـا عاده
واخلاقـــــي العاليه واسلوبي الراقي

قصــر المكارم مشيـد فيني امجاده
وقصر الوفاوالشهامه ساكن اعماقي

والطيب في داخلي مغروسه اوتاده
ماحيل وابقـى على عهدي وميثاقي

....

‏اشكي لمن يارب من ضيق الأنفاس
طول العمر ضايق وفي وقت قاسي

صابتني الدنيا بالإحباط واليأس
ومرت على حالي جميع المأسي

من باطل الدنيا وإبليس والناس
اتلخبطت فيني جميع الحواسي

ومن شراب المر خذيت لي كاس
والحظ عاندني ولااشتد باسي

ومن هموم الحظ قدشيب الراس
وانا الفتى المارد مثيل الرواسي

....

‏والله انـي مابقـى فيني مشاعر
كامل اشعاري مــن اوهـام الخيال

اكتـب ابياتـــي لقلبي جبـر خاطر
رغم ان الحزن في صــدري جبال

يا ظـروف العمــر كم نبقى نكابر
ضاقــت انفاسي ولاعد بي مجال

راحتي ساعـه وباق الوقت ضاجر
والسعادةاصبحت صعب المنال

....

‏لاحــد يلوم القلــب لو جاله الضيق
لان السعــاده بيــن الايــام شاحت

مـات الفــرح فينا مــع كل تشويق
وافراحنا فـي العمــر ولت وراحت

قهر الزمن والحال نشـف لنا الريق
وهموم ياسه للقلـــوب استباحت

واحلامنـــا ماتـت بــلا اي تحقيق
وحظوظنا من جورالاوجاع طاحت

....

‏ليت المواجـع تبتعـــد عــن طريقي
وليت المأسي ماتجيني مــن الساس

وليت الملل واليـاس ماهـــو رفيقي
وليت الزهـق ماحـل قلبي والانفاس

وليت الامل يملا الشعــور العميقي
وليت الفرح يملاخفوقي والاحساس

وليت ان حظـي ماتعلـــق بضيقي
وليت ان قلبي ماعرف لحظة الياس

....

‏صـدري وطــن لو خانتك كل الاوطان
لو فارقـــوك الكــل عمــري مخونك

انت الذي لك في حشا الروح بستان
ووسط الكبد غارس ونابت غصونك

والله لو ماضـــل في الكــون انسان
انا معــك احفــظ مقامك واصونك

ولو حــال فيمـا بيننا قهـــر الازمان
يحــرم عليا العيــش لحظه بدونك

....

‏لاتسأل الشـــوق عنـي وانت أدرابي
نفسي تمنـاك وانـت أغلـى حبايبها

أغلى من عيوني الثنتيـن وأصحابي
وأغلى من الناس حاضـرها وغايبها

ياراعي الحـب حبك ذوب اعصابي
والهجـــر والبُعــــد ذابلها وذايبها

والروح تشكي غلايا جــور الاغيابي
بالله عليـــك يا غــلايا ليـه سايبها

....