فوق هام السحب ( الشعر الشعبي) على متن القوافي

‏ياباقي العمر دنيا الناس خداعة
تجــري سفنها ولا نعرف مراسيها

تطوي من أعمارنا باليوم والساعة
والعالم الله كيف نعيش باقيها

يالله بحسن الختام وصادق الطاعة
وأعمال تبقى تبيض وجه راعيها

....

‏اكتبيني شعر وانثرني حنين
لاتقولين الهوى والعمر فات

وارسميني في خيالك ياسمين
بعثري همسك ولميني فتات

افرحي فيني وقولي للسنين
توني جمّعت عمري من شتات

عانقيها يالسعادة كلّ حين
داعبي أحضان خلّي في سكات

حلّقي فيها لأحلى أكسجين
عطريها من نسيم انفس نبات

....

الحب شاطيء والعواذل سفينة
والقلب عمره ماجمع حب شخصين

العشق دولة والمشاعر مدينه
والشوق جمره والجفا طعن سكين

....

كل ماذكرتك يصبح القلب خفاق
ينبض بحبك فالدروب المعيقه

ارسلت لك قلبي مع كل الاشواق
والروح مايغلاك دامك رفيقه

ماطاق قلبي بعد الاحباب ماطاق
صعب الفراق يازين ماعاد اطيقه

....

اليا بدالك حاجةٍ عند مخلوق
أطلب عساها من وليّك تيسّر

عسى الفرج ياتيك من واحدن فوق
اللي يهون كل شيٍ تعسّر

ولاهو صحيح أن كل مطرود ملحوق
والله جعل للناس دينه ميسّر

جاك الكلام الصح والعلم موثوق
أصبر على ماجاك واحذر* تحسّر

....

لاتحرق أعصابك وتجرح مشاعرك
اللي مضى ماهو على الكيف راجع

هون على نفسك وريّح لخاطرك
ترى الهموم تزيد كثر المواجع

مافات فات وخل همّك بحاظرك
واصل طموحك وانتبه لا تراجع

وسارع لفعل الخير والرب ياجرك
والصبر وقت الضيق لك حل ناجع

....

أحذر من اللي ينقل الهرج ويجيب
وشخصٍ حكالك عند غيرك حكى فيك

متعودن طبعه بشذب العراقيب
يبغاك تمشي في طريقه ويغويك

لاتسْمع اللي ماعرف قيمة الطيب
خلك على درب النشاما مماشيك

ورزقك على اللي يعلم السر والغيب
واللي خلقك من العدم مايخليك

....

من عاش بالحيلات يرجع للافلاس
لابد من يومٍ يشوف الخساره

لاكاسبٍ طوله ولاجاب نوماس
ماشاف عند الناس كود أحتقاره

والصدق سمعة صاحبه ترفع الراس
عند العرب يبقى رفيعٍ وقاره

اللي كلامه دوم يبنى على ساس
دايم على درب النشاما مساره

....

يالعبد مالك عن مقادير مولاك
واللي كتب باللوح ملزوم ياتيك

هو الذي هيًا لك الرزق وأعطاك
واللي خلقك من العدم مايخليك

سبحان من كون صفاتك وسواك
وفي رحمته من كيد الاشرار يحميك

اغناك عن منة هل الشح واعطاك
خلك شكور لنعمته وأرفع يديك

....

بعض البشر لاشاف نعمة حسدها
حاسد ويحسد فالسماء حايم الطير

وبعض البشر لاشاف نعمة حمدها
من طيب قلبه وده الناس في خير

....