أنا رفيقي ما سمع اللي حكابه

أنا رفيقي ما سمع اللي حكابه
لو جاتنا منه السوالف مضاريع

اقرا مفاهيمه واحسب حسابه
واشوف مدخال القدم والمطاليع

ماني عجول بالزعل في غيابه
قدام ما سمع منه ما عطى ولا ابيع

لاخير في رفقه بليا حبابه
ولا خير في جمعا القلوب المواجيع

ورفيقك الغالي تحمل عتابه
واحلم عليه إليا دفعته دوافيع

شيع ثناه ولا تبين عيابه
عاره يعورك يابعيد المراميع

وان كان دون مرافقك صك بابه
لقه قفاك وخل مشيك مع الريع

خله على بعدك يسرح ركابه
يقضي سنه والا شهورن وأسابيع

وإليا طلبك الصلح يا مرحبا به
سهل طريقه لايجي له موانيع

واحفظ لسانك عنه واستر جنابه
لاتجرحه بين الذياب المجاويع

ترى اللسان ملكع يندعابه
مثل الحصان اللي يبي له مصاريع

واجعل على هرج تقوله رقابه
عقل يصرف طايشات المواضيع

والصمت في بعض المجالس مهابه
يكفيك شر اهل الفمي اللواسيع

عن كلمتن يقضب خطاها قضابه
يركض عليها مصنع الهرج تصنيع

خله يروح ومنك خال جرابه
يرجع كما المفلس بسوق المطاميع

واحفظ صداقة طيبين القرابة
ربعك إليا قلت عليك المشاريع

سيف نهار الضيق تقضب نصابه
ياقاك من حدب السيوف البواتيع

وإليا جفاك الدار مالك ومابه
رزقك على اللي طوع الكون تطويع

ممشاك في حزم تطارد سرابه
أخير من شوف الوجيه المدانيع

خطو الرخوم مصاحبين الخيابه
تجار هرج وباللوازم كراسيع

الرجل مثل الذيب رزقه نهابه
ياخذ مع الدو الخلاوي قراطيع

والطيب ضلعن زامياتن هضابه
للريح في شامخ ركونه ذعاذيع

عسر المراقي يتعب اللي رقاب
ما ياكرهه كود الحرار القواطيع

والا الردى جرف هيال ترابه
حوله لزهران المقافي مرابيع

يرقد به الصحنى ويلقا الذرابه
والبوم بين غصون قشعه مواقيع

رجل على الناموس بيض ثيابه
ورجل يرقعها على المتن ترقيع

ورجل يزايم علته من عذابه
عيدان ناره للقريب مواليع

على الجماعة كل يوم طلابه
خماش وجه لا لقي به منافيع

ورجل مع الأيام ما ينصخا به
عز الرفيق إليا صفعته صوافيع

غيث على من جاه يمطر سحابه
عشبه على روس النوابي مفاقيع

ورجل سوات الليث عطب صوابه
من دون حقه سنع الخصم تسنيع

طيب وعصمان الشوارب تهابه
يرجا وتخشاه الرجال الصعاصيع

ومن لا درى بالناس محدن درابه
ماله على سجل النشاما تواقيع

ومن لا يحوش النعم بأول شبابه
في شيبته يحسب حساب الرواضيع

وختامها ذكر النبي والصحابه
واستغفر اللي ما يضيع ولا يضيع


الشاعر .. مفرح الضمني رحمه الله

قصيدة رائعة
كل الشكر لاناملك
تقبل تواضع مروري
تحياتي الرقيقة لرروحك

المشاركة الأصلية كتبت بواسطة ريهام خالد

قصيدة رائعة
كل الشكر لاناملك
تقبل تواضع مروري
تحياتي الرقيقة لرروحك

شكرا لك على تعقيبك الرائع
وتواجدك المستمر بمتصفحي
لك مني أجمل تحيه وتقدير لاعدمتك