فوق هام السحب ( الشعر الشعبي) على متن القوافي

لبست الّليل وعانقني قمرها
وزفّتني نجوم الليل ساري

ركبت الموج أسافر في بحرها
على شطّين ليلي مع نهاري

وعيني صاحبت لاجلك سهرها
وقلبي وهّج الظّلما بناري

غروب الشمس أواصله بْسحرها
بنورٍ من شعاع الحب جاري

وإذا شفتك نسيت أطول شهرها
وطارت فرحتي والوقت طارِِِ

ضحك في عيني بشوفك بصرها
وغنَّى سمعي بْصوت الكناري

وهلّت غيمتي باحْلى مطرها
وطالت كل الأغصان القصارِ

رعاك الله يا ناعم زهرها
تفوح بريحك ريْاض الصحارى



الأمير خالد الفيصل

اخلفتني نظرة عيون الهنوفه
خلفة الصقار لا شاف الحباري

واقت النظره على قلبي تشوفه
واشعل بقلبي كما البرّاق ساري

صد عني طاغي النظره مروفه
ظالم(ن) قلبي وهو بالظلم داري

ياحبيبي صدتك عني حسوفه
ارسل سهوم الذوابح لاتداري

ارسل رماح الهوا وارسل سيوفه
يشتهيك القلب في كل الطواري

عيني لحسن الذي غيرك عيوفه
في عيوني غيرك من الحسن عاري



الأمير خالد الفيصل

يا سيّدي عاش راسك عاش
عسَى أكثر الناس يفدونه

شيخ(ن) لكل المراجل حاش
ما يتلي الناس يتلونه

صدره بحب العرب جيّاش
تضحك ثناياه وعيونه

ومخلاب صقر(ن) إلَى من ناش
يفصل عن الهامه مُتونه

يا سيّدي ما أرغب المطراش
لولا لزوم(ن) تعرُفونه

أخاف من هرجة الأوباش
يمشون بالكذب يرمونه

ياما تمنّيت لكن ماش
أسير مع ظلّك ودونه

وما البس بدال الحرير خُياش
ومن حبّه القلب ما خونه

وإن سلم راسك برَدْت الجاش
وما فات يا شيخ يا هونه


الامير خالد الفيصل