يابو علي جددت لك جرح منصاب

يابو علي جددت لك جرح منصاب
وموضوعك اللي قلت راس السبايب

جرحه بقلبي ماتداويه الاطباب
فقد الزحول اللي تسد النوايب

عز الرفيق وغم من كان حراب
روس الرجال موردة كل هايب

على النقاحزب ولا صاروا أحزاب
واهل الردى والكذب راحو حزايب

من بعدهم عايف وقانع ومرتاب
ولا اطمعو يكون بعفو جزل الوهايب

اكثر مشاكل عصرنا بين الاقراب
وحرب القريب اقوى الفتن والعقايب

والعاقل اللي يحسب لرأيه حساب
عن رايه استدو براي الزلايب

شاف الردي انه مثل ابو زيد وذياب
ويقول انا اصلح شيخ وفلان نايب

واللي يعارضني منافق وكذاب
وماجاب غير التفرقه والطلايب

وكان الولد ذيب على منهج ذياب
عز لابوه وحامي للركايب

واكثر عيال اليوم شبوط وغراب
في صدر ابوه يشب نار لهايب

عسى صبي ماهو بللمدح كساب
وتفخر بطيبه لابته والقرايب

يستره في بطن اللحد رب الارباب
الموت ستر لكل هافي وعايب

والحل عند الله وراجيه ماخاب
يارب يامجري نسوم الهبايب

تفتح لنا من عفوك ولطفك ابواب
وترد عاصينا من الذنب تايب

والنصح واجب بيننا ياهل الالباب
باللين والحكمه وزين الجنايب

ويارب ترحم فقدنا اقراب واصحاب
وفي جنة الفردوس نلقى الحبايب

الشاعر /ذيب سعيد ال سوده القحطاني

اخي الحمدان
شكرا لك على هذا التواجد الفعال
والمشاركات النافعه والمفيده
بارك الله فيك وجزاك الله خير

الله يعطيك العافية علي جماليات طرحك

أخي الغالي أبو تركي
أشكرك لتعقيبك وتواجد
لك أجمل تحية وتقدير

ألاخت الغالية روح الجروح
أشكرك لتعقيبك وتواجد
لك أجمل تحية وتقدير