يا أم العيون الوساع اليا تبينتي

يا أم العيون الوساع اليا تبينتي
تمهلي في مسارك لا تعجليني

خلي مسارك شوي شوي لاهنتي
وردي علي السلام اليا قربتيني

وان كان يمي بعين اللطف عاينتي
عز الله اني من الناس الحظيظيني

من عقب يابنت في قلبي تمكنتي
يالله بسكناك في قلبي يهنيني

تدللي واعمليلي ما تحاسنتي
يرضيك واللي يجيني منك يرضيني

في منزل ما مسك مفتاحه الا انتي
ولا ادري تحسين ولا ما تحسيني

كانك تحسين فأنتي ما تعونتي
غير احتلالك لقلبي وش عطيتيني؟

الا انتي انك بغربالي تفننتي
ولا ادري معك مشواري يوديني

ياكثر زينك لو انك ما تزينتي
مدري مزينك رب البيت في عيني


الشاعر .. عبدالله بن عون