الصمت عن كثـر التوجـد شكالـه

الصمت عن كثـر التوجـد شكالـه

زلة رفيقـك خـل فيهـا التعـدال

والاولــه والثانـيـه لا تسـالـه

والثالثه سقهـا علـى روس عقـال

وكلن يبـي يعطيـك فيهـا مجالـه

والرابعه لا تنهزع لـه ليـا عـال

واليـا جفـاك الـدرا دور بـدالـه

ورفيقك اللي تاجده في بعض حـال

ارفق عليه اليا حصل منـه حالـه

لا بد مـن يـوم يقهويـك فنجـال

من كيف اشقـر مثـل دم الغزالـه

ترى الرجال زحول وفحول وازوال

وكلن عطاه الله على قيـس حالـه

والصبر زين وفيه مخرج ومدخـال

ومكارم الاخـلاق سـاس العدالـه

ترى الجهل يقضي على ناس جهال

اللـي تصرفهـم تصـرف جهالـه

اعط العميل اليا طلب منك معـدال

واخذ الدليل اليا صفا لـك مجالـه

وخلص ليا صابك من الحق مثقـال

واخلص ترى بعض الشكاله فلالـه

الرجل يعرف عدلته قبـل يشتـال

والخبل يحسب كـل عدلـه سهالـه

واليا اتبعت المشكله حبلهـا طـال

وقامت تلفـك مثـل لـف المحالـه

واليا قصرت حبالها صح من قـال

على ولد عشرين مـا بـه وكالـه

قبلي وقبلـك شاعـر رد الامثـال

يا زين بيـت يـا فريحـان قالـه

الرجل يطلب منه بعضات الاحـوال

والحمـره يـدرك معوشـة عيالـه


مصلح بن عياد الشلوي