ياقاصدٍ بيشه

ياقاصدٍ بيشه وعندك مهمه
امسك طريق الرين وأطو المسافات
ف الموتر اللي يوم قيره تزمه
يقلع قليع الطايره بالمطارات
صممه من كيفه بيده يشمه
ملحد ولا يعرف طقوس الديانات
ماغير درسه بالصناعه يصمه
حتى تمرس في جميع الموديلات
طراز لاند كروز ماجاه ذمه
مصنوع للبيدا وروس الطويلات
انطح به الخط المسفلت وخمه
خمة يدين الذيب للعجل والشاة
وان جيت بن ظافر على ريف حمه
مني توصل له سلام وتحيات
قله ترى يوسف كلامه متمه
مافيه غير الحب بلوى ومشكات
الحب من يارد ويروى بسمه
راحت سنينه ماتبسم له شفات
يمشي ولايعرف على ايات يمه
يسج رجله قدم وافكاره شتات
وصاحبك يوسف قد رسى الحب همه
فوق الضلوع العوج مرسى الرفيعات
وخطوب وقته كلها مدلهمه
وللحزن في وجهه رسوم وعلامات
وصارت عيونه للعباير مجمه
واخنى عليه الوقت ضيقه وحسرات
على خليلٍ بالهوى دون ذمه
يرسل سهام الرمش ويصوب الذات
حبه بقلبه طاوين له معمه
ماعاد يرحل دام للقلب دقات
وجده على من حط فمه بفمه
يقضي لزوم الحب شهوه ولذات
وانت الذي بالطيب في راس قمه
من روس شمران العصاه المسمات
الحارثيه حدها من يدمه
روح مراح مقيط من عرض من مات
حلُّ على روس الجبال المشمه
على سلوم الطيب نخوه وفزعات
لاحولوا مثل البحور المطمه
يغرق بها الخصام مافيه منجاة
يوسف الشمراني