سلّمي يا روح ما من حـبّ حلـوات البناجـر > ناصر الفراعنه

سلّمي يا روح ما من حـبّ حلـوات البناجـر
غير قطعة خام غيرك ياليتيمـة مـا وجدهـا
آه ما أكبرها فضيحة عجزت أطراف الخناجـر
لا تموّتنـي ومـتّ بنظـرةٍ واهـيٍ جهَـدْهـا
العيون اللي تسوّي في القلوب سْـوات فاجـر
يحلفون أن الدواهي هي وأنا أقول إنها أدهـى
من سحايه لا جلست قْبال ساجيْـة المحاجـر
ما دريت أنـا صغيـر اخوانهـا والا ولدهـا؟!
الهنوف اللي تلملم غيّهـا فـي ثـوب هاجـر
وين روحي في هواها يا عرب ربـي قرَدْهـا؟
يوم أجيها ضلوع سرجوفي من الغيرة تشاجـر
كلّ ضلعٍ ما يبي شـوف الهنـوف الا وحَدْهـا
اتعب رْضاهـا سبيـعٍ والدواسـر والهواجـر
الولـد منهـم ولدهـا والبلـد كلـه بلَـدْهـا
لا مِشَت من عذرها الأرواح تاقف في الحناجر
كنّ عود الخيزرانـة يقطعونـه مـن جِسَدْهـا
وان عدَت يدجر بروحي من عبير الطيب داجـر
كنّ دهن المسك لا عَرْقَتْ يِقَطّر مـن نهدهـا
لو تشوف البيض من حسنٍ على (هاجر) تناجر
مْعَذوراتْ ,أُمّها وهْي أقرب النـاس تْحَسِدْهـا
شيب عيني كان أنا ماني على صبري مواجـر
ويل ويلي والله اللي رحـت يـا خالـد بيَدْهـا
والله اللي قام يسجرني من الخفـرات ساجـر
ويش عذري في عيونٍ من عمل يدْها رمَدهـا
هاجرٍ عن ما سواهـا حاجـرٍ للعيـن حاجـر
عيشتي والله ما تسوى ربـع قـرشٍ بعَدْهـا
ما حسَدْته نزلته قصرٍ مـن الياقـوت تاجـر
لا نزلت الفيضة اللـي نقّضـت فيهـا جعَدْهـا
ولّ يا بنتٍ على الطرْيا تجرّ اقصى الحشا جـرّ
فتنة المفتون فيها مـن مهَدْهـا اليـا لحَدْهـا

ناصر الفراعنه

شاعر مبدع واختيار مميز منك يا ابوعبدالرحمن

تسلم يابوعبدالرحمن
اختيار جميل

صح لسان الشاعر
وصح بدنك يابو عبدالدرحمن

صح لسان الشاعر المبدع الفراعنه
وسلمت يمناك على حسن اختيارك
اخي سعد

أبيات رائعه وجميله