عيشي حياتك .. !

شكلك جرحتيني ومن جرحك نويت ابعد واروح
عيشي حياتك مثل ماكنتي بدوني عايشه

والحب لا صار آخر المشوار مصدر للجروح
ما ني بمتحمّل جراحاته ولا بلايشه

تعبت اشيّد لك مداين عشق وابني لك صروح
ملّيت من صب المشاعر في مشاعر طايشه

طمحت اكون العاشق الصّب وتعدّيت الطّموح
الين صارت معظم افكاري غرام وشايشه

ياقلبي الطيب تعال انعيك واسكت لا تبوح
في مأتمك كل المشاعر لو تبيها جايشه

أمّا كذا ولا كذا ولا كذا كيف النزوح
لازم نجامل وضعنا ونسايره ونعايشه

يابنت يا سكر يا كل الحب يالوجه الصّبوح
انا دخلت الحب مااعرف غدره وخشايشه

ماجيت مثلك دارس الدنيا ولا افهم بالشروح
ابيض ولا ادري وين بيبانه ولا درايشه

جيت بجموح ورحت من عندك وانا خالي جموح
متكبد آلآم الغرام وظلمه وغشايشه

وين الوضوح بذمتك وبذمتك وين الوضوح؟
الصدق في قلب السما وابعد ولاني نايشه

عشان انا ما ابغى اكرهك با لملم اشيائي واروح
عيشي حياتك مثل ماكنتي بدوني عايشه


علي سعد ظافر الشمراني