يا ذا القمر قامت تغيِّر مساريك

يا ذا القمر.. قامت تغيِّر مساريك
يا بطي مطلاعك.. ويا سرع مسراك

طفت النجوم اللي من أول تباريك
ما شفت نجم بان قبلك وخاواك

قبل أمس.. أعدّ لك الليالي وراعيك
واليوم عني نازح البعد.. خفاك

يا نجد.. جعل مروّح الغيث يسقيك
يعل ريانك.. ويسقي ظماياك

يا نجد حبيناك.. من حب راعيك
اللي بنى مجدك وصانك وسواك

يا نجد.. قلبي ينفعه يوم يطريك
الله يلوم اللي يلومه إلى أطراك

الأمن.. والإيمان متوطن فيك
فضل المليك اللي ربا فيك.. وارباك

العين في سود الليالي.. تناجيك
لو هي (بلندن) كانها اليوم بحماك

كلام مشتاق يبي شوف أراضيك
جنسيته تحمل فصيلة.. رعاياك

ماهو كلام إمخادعي.. يسميك
باسم تنافا مع حلاياك.. واسماك

بالشر يدعي لك.. وبالخير ناسيك
ما يدري أن أهلك تسلو.. بذكراك

لبيك يا داري من البعد لبيك
صرخة غريب ما يصدق بلاماك




خلف بن هذال

صح لسان الشاعر
شكرا على الطرح الرائع
تسلم يداااك

والله يعطيك العافية
ودي وتقديري لك