اخترنا لكم

دُخَانُهَا يُؤنِسُنِي رَاقِصاً
مُبْتسِماً وَالجَوِّ بَاكٍ عَبُوسْ

آناً أَرَاهُ كالوِشَاحِ انْطَوَى
ثُمَّ أَرَاهُ شِبْهَ تَاجِ العَرُوس

يَحْمِلُ مَا تَعْجِزُ عَنْ حَمْلِهِ
شُمُّ الرَّوَاسِي مِنْ هُمُومِ النفُوسْ

.....

‏استر عيـوب الناس تـستر عـيوبك
يـا اللـي لسانــك للمخاليـــق فضّـاح

واتـرك ذنوب الخلــق وانظـر ذنـوبك
تـــرى الزمـــن دوار والســر ينبــاح

.....

ابي خوة السامر وابي الهاتف السيار
وابي العافيه من عند ربي وابي الجنه

‎سعد بن جدلان

الناقص اللي ينقـل القيـل والـقال
نشطب على مثله مدامه خسـاره

قد قالوا الشعار في ماض الأمثال
من شق ستر الناس شقـو ستـاره

.....

ياطـالب الأجــــر والفـــوز العظيــم
لا تـــزرع الا العضــــــاه المثمـــــره

وصـــال الارحــــام واكرام اليتيــم
والجــار للجــار حســــب المقـدره

الصــــوم مشكـــاه للقــلب الرحيـم
وتزكيــــه للنفــــــوس المـــــــؤثره

كفـوف الاجـواد في الشهـر الكريم
بيـن العطـــا والتمــاس المعــذره

نســـأل من اللـه جنــــات النعيــم
والعفـــو والعــافيـــه والمغفــــــره

صالح الاحمدي

يا الله وفقنا الى خير الاعمال
وزيدنا من طاعتك اجر وافر

نفوسنا واروحنا شوق واقبال
والعفو منك والرضا جبر خاطر


.....

علمو مـن ينقل الهـرج لفـلان وفـلان
لا يجيب الهرج عندي ولا يجلس معي

السوالـــف بالقفا مالها عنـــدي مكان
قبل لا احشم السانـي حاشــم مسمعي

.....

يالله يا ربي عليك التـواكيـل
في شدة الدنيا وفي مرتخاها

ويالله يا ربي عليك التساهيل
لا ضاقة الدنياء ودارت رحاها

.....

‏ليت اﻻمانـي تحقق ﻻتمنينا
‏وياليت اﻻيام تجبر في خواطرنا
‏
‏على دروب اﻻمل سقنا خطاوينا
‏يالله عسى خيرة اﻻيام تنطرنا

.....

لك في عيوني سر ماظن مستـور
‏ولك في ضلوعي الف فزه غيوره

‏ولي فيـك واجد كثر مالف وادور
‏وارد لـك مـشتـاق مـع كـل دوره

‏عسـى حظوظ الله تباريك بسرور
‏ولا يـواجــه قــلبــك الا ســروره

‏ياعـز من مر النظر وجـه وشعـور
‏شوفـك يرد الروح لو هو بصـوره

.....