اخترنا لكم

تخطي واجيك اعتذر كن الخطأ مني
‏متقمص الدور وجروحي هي جروحي

‏يهزمني الشوق لين ارضيك لو اني
‏لاني براضي عليك ولا على رووحي

.....

اللي حلاها غير وأسلوبها غير
‏ماغيرها فالوقت عيني رجتها

‏غيدً تتل القلب من غير تبرير
‏حتى بنات الفكر غصب سهجتها

‏تربعت فالجوف حشمه وتقدير
‏مال المشاعر عذر يوم سهجتها

‏متميزه بالزين حسب المعايير
‏من حدّ ماطاها لفوق رقبتها

.....

‏مامسحت محادثتنا كل يوم اقراها
‏وكل يوم يطيح دمعي لا قريت حروفك

‏يا سقى الله ليلةٍ نسهر على قمراها
‏يوم أقول الشعر من جوفي ويدخل جوفك

‏عشت أنا وياك بأغلا ايامنا وأحلاها
‏يوم كنت تزورني ما تعتذر بظروفك

‏كيف رحت مع الجفيّا وأنت ما تقواها
‏كيف ترقد عينك الحلوه وأنا ما اشوفك

.....

أتحرى مجيّك وأتشوّق لقاك
‏والمُتيّم عقارب ساعته تقرصه

‏كيف ضحّيت في قلبٍ يدوّر رضاك
‏الذهب ما يفرّط فيه من يبخصه

‏ليه تجبرني اكره كل ذكرى معاك
‏من ملك في الحياة أحباب وش ينقصه

‏لا تراهن على الحُب ويغّرك غلاك
‏قلبي أثمن من إن إنسان يسترخصه

سعود مهدي

يا بَحَر لوّ أكتب أبياتي على موجك رسالـه
بيت واحد من بيوتي يقلب أملاحك عذوبـه

يا بَحَر يا ليتني باقي على طيـش الجهالـه
يوم كنت صْغِير ما اواجه من الدنيا صعوبـه

.....

الـتـواضع يعـطي الرجال قدرٍ واحترامي
والمكارم من طباع أهل الوفا وأهل العزيمه

من حفظ قدرك حفظته بالمبادي والتسامي
ومن جهل قدرك جهلته صدك عنه حشيمه

....

تبي الرزق خلك صافي النيه
لآ تجعل الخبث في نيتك متخبي

الشخص إذا نيته عوجا وملويه
لو وش يسوي مهوب موفقـه ربي

.....

‏عساني عند هقوات الرفيق الطيّب الفزاع
واجي من فوق هقواته واكون قريّب لظله

منافعنا ورا الرفقه مثل نفع المطر للقاع
يازين الصيّب النافع لامنه جاك في حله

.....

‏يخدعني الحب دايم في غلاف الكتاب
هذا و أنا عيني تلاحظ وقلبي يدل

ماكنت اشوفك عدل قبل الجفا والغياب
لكن بعد مابعدت شوي شفتك عدل

.....

‏ليت الليالي علمتني بالأقدار
كان ابتعدت وزال عني خطرها

وأثر الليالي ما تبيّن بالأسرار
تضحك لنا ساعه وتبدي كدرها

.....