ياكثر ماصعرت للوقت خدي

يا كثر ما صعرت للوقت خدي
وانا تحت ضغط السنين الشديده

وظروفي اللي دايم تصير ضدي
خلقت لي منها حياةٍ جديده


جاريتها من باب حب التحدي
واقنعتها بـ إن الاعاده مفيده

جربت جياتي وجربت صدي
لين اكتشفت اهل العلوم الاكيده

اللي يقولون الصراحه تقدي
واللي يقولون الهقاوي بعيده

يا وسع صدري مير ياضيق سدي
من طبعي اللي ودي بـ طي قيده

معاد ابي لـ جروحي ابرة مهدي
لو العمر ينعاد قررت اعيده

ودي بشخصٍ قد حبي وقدي
ايشوفني ميلاد حزنه وعيده

امااا انت ياللي كل يوم متردي
غلق رصيد اللي يشوفك رصيده

صبري قبل على الحديد مصدي
واليوم صبري صار تحت الحديده

اجيك مستعجل واعود مهدي
حاول تحس ان العلاقه وطيده

احساسك اللي مايبي شوف ردي
متى يبي يوصلك ساعي بريده

ياعازف الزلّه على اوتار حدي
دور عذر لو دون جمله مفيده

دامك تبي مزحي ويزعلك جدي
هاذي ماجت فـ السلم والا العقيده

ترى الدروب اللي ترجع تودي
اقطع وريد الوصل واقطع وريده

‏رح وين ماودك ليا ارخصت ودي
‏يمكن بعد روحتك فرصه سعيده
‏
‏ماني بقايل روح مرواح جدي
‏جدي فقيده وانت مانت بفقيده