التجاره شطاره والمسيار للرجال هع

هذي كمالة هذرنا الأول إلي كرشنا المنتدى ولا خلانا نكمله حسبي الله عليه
لكن قبل الهذره ، أبعتذر من الربع إلي ردو في الموضوع الأول ولا رديت عليهم تراني جيت أبرد يالربع وكرشوني المعزبين والمعزبات وخصوصا المعزبات قالوا تبي ترفع الموضوع وهو قديم ،، من زينك أنت وردك ،، اركد لا نلحط في الحاير ، قلت سمو الأمر سهل
الشاهد يمال العافيه كل إلي ردوا والسموحة منكم وعلى ماقيل إلي في الخاطر يسد
---------------------
ضاق الصدر عقب صفقة السيارات وقعدت لي كم شهر مغير أدربي راسي إما شريت جوال وبعته بمكسب 100 وإلا خذت تمر أبوي وكبسته له في المصانع وكيسته وخذت لي ربح ريالين في الكيس
هاك اليوم طالعن عقب الفجر وأشوف هاك الفوال إلي يحبه قلبك لوحته أصفر وبرتقالي واسمه عيون المها للفول وأنا إلي أطلب تاوه ومقلقل لحم وأشوف هالعالم مغير تطاق على هالفول ،، تقل لاكلت الفول تطلعه ( الله يكرمكم ) ذهب
ويشبك عرق التجارة مع لقمة الفول وأنا إلي أصمل على مخبز وفوال واتوكل على الرحمن وأنظف صحوني وأمصمص هالخبيزات وأعطيهم الدراهم .. وأنحر البلديه قلت أبفتح فوال وش الشروط ،، قالوا جب شاهدين وتوصيه من الملك وخطاب موافقه من الأمم المتحدة وملف أخضر
لعنبو بليسهم عليهم شروط تقل فاتحن مفاعل نووي مهوب محل فول
حددنا الموقع وتوكلنا على ربع العالمين وتوسطنا بواحدن في البلديه وجتني الرخصة من غير شروط
بلطنا المحل وبنينا التنور حق الخباز وشرينا صاجة المطبق وجرار الفول وكم مقلى على كم قدر على 10 اسطوانات وطقينا اللوحة إلي صفطت القرموشي على جنب
بهذلوني الدفاع المدني على ماعطوني رخصة ،، تقل الدعوه عندهم مرجلة ،، يجيني واحد يقول خل لي الغاز بلاستيك وحط الإسطوانة برا ،، وإلا مني سويتها جاني رفيدزه قال وين اشتراطات السلامة يا ابو الشباب حط الاسطوانه من داخل ومدد بمواصير حديد حطيت لكل واحدن منهم اسطوانه وقهويت واحدن منهم ويسرها رب العالمين وخذنا الرخصة ..
وأنا إلي يشخلني الأمل شخل ،، وأتهاوش أنا ونفسي ،، الفرع الثاني يصير في الخبر وإلا في جدة ،، ووش أسوي بالأرباح أفتح مشروع ثاني وإلا أزرع كشنه مرة اخرى وأروح يم الوالده قلت يام المضيوم إن قاله الله لأحج بك لو الكعبة في سويسرا ،، وتشوفي للجرايد هاليومين ونقي لك حدا هالساعات ولا أوصيك قصي الإعلان وصفطيه وعقب كم شهر عطينياه وأبشريبها ياست الحبايب يا حبيبه
قالت وأنا أمك مابي منك شيء الله يجزاك خير أنت بس فكني من غثاك هذي عاشر شغاله نسفرها والسبة ثيابك وصراويك ياخوي أنت في ركبك مشاحم وإلا تداوم في بنشر وإلا ماتعرف تاكل ،، ياوليدي الله يصلحك ماهنا بقعة مابعد لقيتها في ثوبك ، تدري إني من تالي صرت أجمع أخواتك واقول إلي تعرف مصدر البقعة أبعطيها هديه الله يهديها أميمتي وش حليلها لكن لاعطيتها وجه قلبت عليك صن وكبتتها فوق راسك بعد
إيه يسر رب العالمين وطقينا هاك اللوحة وسميناه ( شيخ الجرة للفول ) ورحنا للبطحاء وتلينا لنا اربعة يمنيه مع رقابهم وفصلنا لبس موحد أحمر وأبيض وعليه نقوش تقول ثياب سراج سند الله لايكثر تصاميمه صارت الثياب تسنها جلابيات حريم
يوم فتحنا المحل ،، و إلا ماهنا ذاك الدخل ،، مغير ادفع رواتب هالثيران من حسابي على غير سنع
ونسأل أهل الرأي وأهل الجرار ،، قالوا مالك إلا تفتح الخباز ويبي يرزقك رب العالمين ،، العالم ماتفك خرمتهم على الفول إلا مع تميس يحبه قلبك
ونلقى في البلد أزمة خبازين ،، أبي خباز منا وإلا منا ،، مالقيت ،، الله يخس هالأفغان مغير يتغلون إلي يقول أبي راتب 4 آلاف تقل يبي يخصب يورانيم مهوب يبي يرابط عند فرن وإلي يقول ما أعرف أشتغل على فرن أرضي أبي فرن في الجدار جعله يشمّع في جدار عجلن ما أبطى يالله يقشعونه منه إلا بعتله
قدمنا على فيزة خباز باكستاني ،، يوم إنهم فحصوه ويلقون فيه لوكيميا ( سرطان الدم ) الضعيف يقول بابا أبو ضيم أنا 19 سنه شغل في سعوديه مافيه مشكله أنت كلام أنا ،، بعدين أنا فيه سفر باكستان يجي سرطان ،، الله كريم .. قلت والله مهوب منك من محق البركة وأنا أخوك
ونختار واحدن ثاني وتضبط أموره يوم جا يستلم التاشيرة من وزير ستان وتسكر حكومة باكستان المكتب حقهم يقولون إن له علاقات مع طالبان <--- مستمر محق البركة
حاولنا منا ومنا وطلعت التاشيرة ،، يوم حجز التذكرة ويقصفون مطار وزير ستان ويخيس في ديرته شهر يوم إنهم فتحوا المطار وحجز التذكرة مره ثانيه وهو إلي يصدمه باص على دبابه وتنكسر رجله وفقرة في ظهره الضعيف ويدق علي يتعذر ،، خخخخخخخخخخ قلت والله مهوب منك يابعدي ،، أنا إلي أبتعذر مهوب انت ..
دبرنا خباز فنان وفتح المخبز وبدا المحل يشتغل وتضبط الأمور وأحط أول ألفين في جيبي ربح وتروح من باتسر مخالفة للبلديه يقولون ليش مافيه مكيف في المستودع ،، والمستودع فيه خياش فول
لعنبو بليسهم حنا مالقينا مكيف نتبرد به في القيظ نحط مكيف لخياش فول لادخلت المحكمة وإلا البلديه تطلع وثوبك تقل مغسول من العرق ،، والله إنك تقوطر وكل شيء فيك مترهل تمشي مفوحج من زود الحر ..
الشاهد من هالدندره إن الفوال بدا يشتغل ومشت الامور وأجي ذاك اليوم وإلا نجيب ( اليمني مدير المحل ) فاقن كشرته الله يخسه سنونه بينهن مشاكل متفرقات وطالعن له شعر في جفونه الله لايبلانا ولا منه تبسم ودك تخبز بفرادة العجين ويالله تبرد قليبك ،، يالربع والله إنه يسد النفس ،، قلت له يانجيب رح ياخوي عدل سنونك على حساب المحل وإلا بدلتك بلبنانيه ( لو العلم معك تسان الخباز زلمة بس رب العالمين داقمك )،، قلت وش عندك يا أبو يمن ،، قال جانا واحد وعطاني هالرساله لك
وأنا إلي أفتحها وإلاه راعي العمارة يقول إجارك بينتهي عقب شهر ونبيك تطلع أجرنا المحل على وكالة نيسان

:ha::ha::ha:

هههههههههههههههههههههههه
حلوه رهيبة مرة