حمر عين

حمر عين

الشاعر/عبد الرحمن السمين

لا اشتاق قلبك طالبك لا تضيقين
ضيقتك عندي مكرمه ومحشومه
أقوم لعيونك على ما تحبين
ولرمشك المكحول طيحة وقومه
أنتِ على هيبة شعوري تمونين
واللي يشوفك دنيته من يلومه
وطيفك لا مر و باقي الليل ثلثين
يصحّي الولهان من عز نومه
وصوتً يشنّف مسمعي يوم تحكين
كن البلابل في شفاك معزومه
لو ذقت من فرقا لقاك الأمرّين
قلبي هذا عامه وشهْره ويومه
يزفك بصوت الهوى لين ترضين
ويعطيك من روحه طرايف علومه
والله ما يكفي فيك شوق المحبين
اللي يموتون العرب من سهومه
أنتِ على قمة هواهم تشافين
شيهانة تأخذ على الجو حومه
يبغى لها قلبٍ شفوق وحمر عين
نفسه من اللهفة ما هي بمحرومه
يا غايةً يحيا بها العمر عمرين
صرتِ بعد حبّك سماه ونجومه