قصة وقصيدتين

دعت بنت غلاب العتيبي زميلتها المطيريه
لزيارتها ولبت الدعوه وكان يوجد ابوها
في البيت وهو رجل وقور و كبير في السن
وشاعر معروف
وحب يداعب ابنته وزميلتها بهذه القصيده
لكن البنت المطيريه طلعت شاعره وردت عليه

إليكم القصيدتين

يابنت غلّاب ربـّي يصلح النّيّـــــه
هيّضتي النفس لين أبْدت معانيها

الله يكافيك ذنبـي يالسنافيـــه
ولّعتي ابوك في عذراً دعيتيهـــا

من يوم جتْنا خويّتْك المطيريـــه
طـرّت عليه علـومٍ كنـت ناسيهـــا

نـِـظَرْتَهـا نظْرَتـن بالعيـن مخفيــّـه
وتاقت لها النفس ثم كثْرَت طواريها

انا احسبنّي تـركت الحب موليــّه
وصِحِيـحْ راع العوايـد مايخلّيهـا

أصيلةٍ من مرابط خيل واعْبيّــه
مربط مـهارٍ رفيعاتٍ معـاليهــا

شريفةٍ من مكارم عزّ واصليّــه
من روس ربعٍ معرّبةٍ مجانيـهـا

ياعيـن شيهانـةٍ للوكـر مدعيّـه
نَدرًا عديمه توسّع صدر داعيها

ياعنق ريـمٍ من المحْواز مرميّه
تذيّرت يوم شافت زول راميها

ياقايد الصّيد ياعنق الرماحيـه
تقود جِلّ الجوازي من مرابيها

ياشبه وضحًا مع المغتر سهاويّه
يبرىٰ سلف نزلة الدوشـان راعيها

تاخذ عقول الملا عنقًا نحاويــه
لاواعذاب العذارىٰ من تحدّيهـا

والله يالولا الحيا واخشىٰ من السّيّه
لاسْري عليها توال الليل واخفيها

لوكـان من دونـها ناسٍ حراميّـه
تقطع رِقِبْة المعادي دون عانيها

حمر النواظر عداةٍ تِحتِم الهيّه
قبيلــةٍ واعذاب اللـي يعاديـها

غلاب العتيبي



الرد على قصيدة غلاب العتيبي
من البنت المطيرية

يابنت غلاب يالطرقا العتيبيه
قولي لغلاب نفسه لا يعنيها

الواقع يعيش به عيشه حقيقه
اثغاث الاحلام ياليته يخليها

حذرى تخائل عيونه برق منشيه
يلوح براقها وارضه ماتسقيها

مافيه مرعي ولا يابنت مرعيه
بعض الاماني ترى ماهو براعيها

قوليله يتوب عن هذي وعن ذيه
وفروضه الخمس في المسجد يصليها

نعمين في عتيبه الهيلا شقرديه
برقا وروق المعالي من معاليها

عقبان وفهود واحراراً نداويه
وصقور في مقدم الهجره وتاليها

لهم مع مطير فالميدان نديه
يوم القبائل آليا قمنا نجليها

واليا سرى الذيب ربعي تنجض الكيه
يصبحونه صباحً ما يشاقيها

وأبوك له نعم مربوعه ومثنيه
رجوم الأبطال من مبطي معديها

الطيب و الجود في غلاب جديه
معلقه في مواريثه عراويها

شائب وقلبه خضر روحه رياضيه
يلاعب النود والورقا يلاحيها

وابن سبيل ومحسن و الهواويه
ادروبهم تتعب العاشق مراقيها

لكن تعوذ من لحون الهجينيه
الدين قالوا نصيحه وانت توحيها

مالك يا غلاب يا كود العتيبيه
تعيش معها وترضابك وترضيها

يسلمو الله يعطيك العافية علي طرحك الراقي

ابيات رائعه ربي يسعدك

تحيتي لك

اخي الحمدان
شكرا لك على هذا التواجد الفعال
والمشاركات النافعه والمفيده
بارك الله فيك

أخي الغالي أبو تركي
شكرا لك لمرورك وتعقيبك
مع أطيب التحايا والتقدير

ألاخت الفاضلة روح الجروح
شكرا لك لمرورك وتعقيبك
مع أطيب التحايا والتقدير

أخي الغالي بكر علي
شكرا لك لمرورك وتعقيبك
مع أطيب التحايا والتقدير