ديوان شعراء السعودية في العصر الحديث (متجدد)☘️☘️

يا بجاد شب النار وادن الدلالي

وإحمس لنا يا بجاد ما يقعد الراس

ودقّه بنجر يا ظريف ..العيالي

يجذب لنا ربع على أكوار جلاّس

وزلّه إلى منّه رقد كل سالي

وخلّه يفوح وقنن الهيل بقياس

وصبه ومدّه يا كريم السبالي

يبعد همومي يوم أشمّه بالأنفاس

فنجال يغدي ما تصوّر ببالي

روابع تضرب به أخماس وأسداس


محمد الأحمد السديري

الا يالله طلبتـك يــا إلـهـي و انـتـه المطـلـوب
تفـرج همـي اللـي مـن سنيـن طـوال عانيـتـه


ملازمني سواة الظل وأقرب مـن زرار الثـوب
مـع انــه لــو يضايقـنـي زرار الـثـوب فكيـتـه


تحاصرني هواجيسي وتاخذني وانا مغصـوب
تسافر بي من المجلـس وكنـي ميـر مـا جيتـه


تدور السالفة عندي وقلبي فـي سفـر ودروب
ولا عـدت وأنــا مـثـل الــذي نـايـم وصحيـتـه


تدور الدلة الصفرا ونفسي تشتهي المشـروب
ولا صبـوا لـي الفنـجـال يـبـرد مــا تقهويـتـه


ألا يا من بإحسانك رجع يوسف على يعقـوب
ويونس وسط جوف الحوت نـادى ثـم نجيتـه


تساعدني علـى الدنيـا وترزقنـي صبـر أيـوب
وتحـسـن خاتمتـنـا فــي نـهـار حــق توقيـتـه


وتغفر لي ذنوبي وانت عالم وش علي ذنوب
ولكـن بـابـك أوســع لــي وغفـرانـك ترجيـتـه


وبابك ما يرد اللـي نـوى بعـد الضـلال يتـوب
ولا أحـد يـا كريـم الوجـه جـاء تايـب ورديتـه


وأنا مذنب وأنا تايب وأنا خايف وأنا مرعوب
ولك وحدك جبيني فـي تـراب الأرض حطيتـه




عبدالله الطلحي

يا راعي الغر العذاب المباهيش
رش الكبود اليابسة عن عطشها

دنق علي و طمن الراس بشويش
واحي العروق الذابله وانتعشها

حبك ينهش ثومة القلب تنهيش
نهش الحنيش لعرش رجل نهشها

واهل الهوى في سجن غيك دراويش
وقلوبهم وجلانه من دهشها

من ذاق من جمر السوالف بخاشيش
يبطي وروحه معتقلها بلشها

لا تستمع في هل الحكا والوشاويش
ناس انقيلي النمايم دبشها

يا خشف ريم ذار واوحي شوابيش
بدوا طلوع الشمس ذاره وغشها

والعين عين اللي جسر عقب توحيش
امير بيتي الحرار ووحشها

طرح الشبك ما قلبوه الطواريش
ولا قرنسوه اهل العشش في اعششها

وحش وجاي من بعيد المناطيش
عوق الخريش اللي طياره خرشها

لا قام يأخذ من طرف ريشها ريش
واليا قضا لعبة عليها لكشها

جابوه من عين الشمال الهماميش
ابرك الهادي طرشة قد طرشها

جابوه لمثمن طويل المطاريش
شيخ قوانين العرب ما دغشها

محمد عشير منقضات العكاريش
نجل العيون اللي ملامح بهشها

ومهدي للي براسه نغاميش
لا شوشت حياة الارض وحنشها

محمد مقابل قاصده بالتباهيش
وملفى الرجال اللي جميلة غطشها

ودايم وبيته مدهل للمداغيش
وكم روح مسعورٍ بجوده نعشها

لا يا بعد ناس تكبر على ويش
لا شافت الناصي تلوت اخششها

لو يملكون ارقام الاموال حتى ايش
در الحمارة دوب يروي جحشها

وروس الظبا ما ذكر فيها عراميش
لو هي على الزيلة كبار اشوشها


عبدالله بن عون

ابنصحك واسمع ولو مأنت مكلوف
لا تقول يا رجال مالك ومالي

هذي نصيحة حق ..والعفو معروف
يزيد قدرك في صدور الرجالي

القول بداية فعل وأفعالنا الخوف
وشعره مابين الفعل والأنفعالي

الكلمه اليا جات من صدر ملقوف
الصّمت خير وخل صدرك شمالي

زلة السانً بالخطاء خلها طوف
لا تابع الزلات يابن الحلالي

لا تصير بالمجلس خفيفً ومشغوف
ولايصير صوتك فوق الأصوات عالي

ترقاء عن الطفسه على راس هفهوف
عليك ومثلك يشرهون الرجالي

الصّمت بعض أحيان مايعتبر خوف
لا صار بعض الهرج ماله مجالي

اركد ياحتى يركد الرمي وتشوف
ويبين لك بين الخطاء والعدالي

ان كان زلة رجل و الرجل معروف
ثلاث طوّفها الكريم اسبالي

وكانه ظعيف وهرجته هرجة ضعوف
سفيه خله فالمجالس يلالي

لا صار ما لي عندهم حق مخطوف
يلقى سفيه يسد حلقه بدالي



عبيد القلادي

الوصية
أول كلامي طلبة الله بديه
يا عدل يا رواف عالم بحالي

أرجيه يغفر زلتي والخطية
لي رحت في قبري وقدني لحالي

ما عاد لي من هو يرد الوصية
ولا ابن عم لي قريب موالي

قال ابن هادي بادي في عشيه
في راس مشذوب عنيش الجبالي

سر يا قلم وأكتب بيوت طرية
واكتب مقالات على شف بالي

مثل الجنا من غرسة رازقية
والا حليب مشملات غوالي

يا سعيد أنا بوصيك مني وصية
واحفظ وصاتي يا عريب الخوالي

أوصيك تقوى الله فانها البديه
من يتقي ربه دراجه عوالي

من يتقي ربه دراجه قويه
ويفوز بالجنات يوم الهوالي

والوالدين ألطف بهم بالسويه
من قدم المعروف يبغى التوالي

اوصيك بأمك زد لها مقدريه
ولا تفضل فوقها أم العيالي

والجار له حق عليك وعليه
لا زل فاسمح زلته لا تبالي

والضيف قدم له علوم طريه
شب المنارة وادن منها الدلالي

وأكثر له الترحيب واثن التحيه
من عقبها وجدك وهرج عسالي

عند المحاضر خل عندك عنيه
ومن الردا خلك عزيز وغالي

وترى خوي الجنب له مقدريه
إسمح لزلاته على كل حالي

فإن الخوي لابد يذكر خويه
بالطيب ولا بالعلوم الهزالي

وصلاة ربي عد نشو الرفيه
على النبي عدة حقوق المخالي



عبدالله بن سعد بن محمد بن هادي

بكره نروح ونترك الناس للناس
ليت البشر بغيابنا يتركونا

محد ٍ وحنا نشتكي قال ماباس
وشلون لاطحنا نبي يرحمونا

كنا نهبنا مالهم دون الأجناس
من غير ذنب ودون حق ابتلونا

كل ٍ علينا من القهر حد الأضراس
من حقدهم محر ٍ بهم ياكلونا

ياليت نعرف وش تبي منا الأنجاس
يومنهم* دون العباد ابلشونا



متروك حاوي العنزي

عليك الفرج يا الله يا حي يا قيّوم
إلهٍ عباده كلها تلفت يمّه

الا يارفيقي والله انه عداك اللوم
انا اللي علي اللوم في ذمتي ذمه

ولكن سامحني ترى العلم فيه علوم
ولا يفرح اللي بيننا ينقل النمه

حصل ماحصل والعبد يصبر على المقسوم
يدور الزمان ويخلف العزم والهمه

طرات الرجل لا لحقه من الزمان هموم
ما يدري بسده كود خيرة بني عمه

وسيع البنايد في الشدايد قوي عزوم
لعضك زمانك شال همّك مع همّه

وانا والله اني ماتهنى بحلو النوم
ورفيقي عليه هموم الايام ملتمه

اشيل الحمل منه واحطّه علي واقوم
مقام يورد مظمي الما على الجمّه

لكن الزمان الشين ظالم وانا مظلوم
على الهون ياللي تمدح الوقت وتذمه

تهب الهبايب والسفن فالبحور تعوم
وتقفي بها صلف الهبايب عن اليمه

هبوب تصلفقها وبحر وسما ونجوم
وموجٍ تقفاه العواصيف وتزمه




سلطان الهاجري

اشهر القصائد في الخيل هي
قصيدة الامير عبيد الرشيد
واسمه كروش الذي اصبح مثلا
للجميع وهي فرس
الامير عبيد ابن رشيد

حين قال :



يا بيه أنا لكروش ما اعطي ولا ابيع
قبلك طلبها فيصلٍ وابن هادي


يا بيـه لو كثّرت بالقول ما اطيع
يـا حيف تبغيـني أسلّم جوادي

مـا جمّع أصله بالقراطيس تجميع
بـيته يـعرفونه جميع البـوادي

بـاغٍ إلـى ما لقمّوها المصاريع
وصاح الصياح وثار عج الطرادي

يلحـق وانا فوقـه ترثّع تراثيع
مثل الفحل لا صال وقت الهـدادي

هـذاك بيعـه والصبايا مفاريع
بين الـقنا ومـخفّرات الـهنادي

يا بيه أنا مسمع كلامك ولا اطيع
هـرجك بمقلة ناظري والفـوادي

يـا سابقي ما نرخصك بالمطاميع
حتـى ولـو قيل ارفعوا بالحدادي

أبغـى إلى ثـار الدخن بالزعازيع
وحطـّوا على عجلاتهـم العدادي

أنطـح ورا ربعي وجيه المداريع
وأقضـي عليها دينهـم والعيادي

حلفـت ما يطري علينا بها البيع
إلى الحشر ما يفخت سواده سوادي

مـا دام راسي للرياح الذعاذيع
حـيٍ فطلابه من الناس غـادي



عبيد ابن رشيد

حنا العرب يا مدعين العروبة
وحنا هل التوحيد وانتم له أجناب

وحنا شروق المجد وانتم غروبه
وحنا هل التاريخ وأنتم به أغراب

يوم الفقر شلتوا علينا عيوبه
واليوم عقب النفط جيتوا لنا أنساب

ويوم الفقر فينا البداوة سبوبة
واليوم صرتوا مثلنا بدو واعراب

لو الهوى منكم منعتم هبوبه
لا شك رزاق الملا رب الأرباب

ولو المطر منكم منعتم صبوبه
لا شك رزق الخلق من عند وهاب

جيش الحسد سقتوا علينا حروبه
كل يبي يزرع على جسمنا ناب

حرب على المحسن تراها عقوبة
بالله عساكم ما تفيدون حراب

يا ما عطينا ما ندور مثوبه
إلا من اللي من ترجاه ما خاب

ويا ما نصرنا صاحب ضيقوا به
عاداتنا نقدم الى مالردى هاب

وياما نصانا من تعثر دروبه
يدخل حمانا من تعذرة الأصحاب

حنا بنينا دارنا من طيوبه
وانتم سلبتوا داركم كل ما طاب

الله سقانا من بحرنا عذوبه
وانهاركم مثل البحر هدر تنساب

حنا زرعنا الحب بارض خصوبه
وانتم زرعتوا كره الأجيال بتراب

وحنا دعينا السلم نوبه ونوبه
وانتم حمام السلم بعتوه بغراب

يا من دعا للحرب ما درك خطوبه
لا تحسب أن الحرب تهديد وخطاب

من شب نار الحرب يصلى شبوبه
ومن ثور الفتنة تعرض للأسباب

ما يستر الرجال ملبوس ثوبه
الدين وافعال الكرامة له ثياب

ما يقبل الرجال بحماه حوبه
ما دام له حق وللحق طلاب


الأمير الشاعر خالد الفيصل

مرحبا بك يا ثمانين عمري

لو ما هَقيْت إِني أَشُوفَك وأَنا حَي

تناسلت شعرات الأيام تجري

وأبيضَت السودا على ضامي الرَي

الشمس تمضي وانجم الليل تسري

وكل شيٍ صار في عيني شُوي

أَبْحث عن اللي يرفع الرأس واشري

ما أشغلت نفسي بالملذات والغي

أغضي ولكن ما تناقصت قدري

واسمح ولكن ما تنازلت عن شي

درست علم الفكر والعز بدري

في مدرسة جدي وابوي واعمامي

واليوم لو ثقلت بي الرجل بُصري

لي عزمٍ امشي به على كل ما في

أماوج المعنى على بحر شعري

والوي قوافيها على شراعها لي

هي سلوتي بالعمر إذا ضاق صدري

اداوي جروحي قبل حامي الكي



الأمير الشاعر خالد الفيصل