لية الهبوب تصحي القلب لابات

ليه المسى عوق الشقاوي وطبه
ولية الهبوب تصحي القلب لابات


ولية القمر يدعي جريح المحبة
ويقول ياهية مافات ما مات


جرحك ظهر لو قلت للوجه خبه
وللحزن في ضحكك رسوم وعلامات


ولية المطر بالذات ريحة وصبة
كنة رسولن بين الاحباب بالذات


اشتاق فية لشوفتك واتنبهٌ
للي نسيته من مواقف ونظرات


لستانس الخافق ذكر من يحبة
ورجاي راجع في الوناسات مافات


يامرتع القلب الحزين ومربة
يزين بك مثل الذهب صدر الابيات


هيهات ينسى القلب شخصن يحبه
وهيهات يدلة خاطري منك هيهات

نبع الغلا عندك وعندي مصبة
ومن الولة في خافقي لك ولايات

وطيفك حطب عيني وعيني مشبه
والشوق بردن مانقطع دون لحظات

ومكانك الصدر ولك القلب شبه
بين الضلوع اللي فردها التنهات

ولك بيرقن في القلب حبك يهبة
شامخ ولاهزة من العذل غارات

محبتك في الوقت ذا ما تشبة
الا بخيمة بدو بين العمارات


وان شفتني ضايق واهوجس واسبة
اخاف غدر الوقت وللوقت دورات


لاتحسبن دمعي نزل دون سبة
ابكي من الفرقا وهي مابعد جات


اليوم كل امورنا مستتبة
وبكرة ماندري وش معه من مسرات


ارب قلبك مثل قلبي اربة
ما يخلفة كثر العذل والمسافات

الشاعر... محمد بن فطيس